Германскиот канцелар, Олаф Шолц, денеска го посети Киев за првпат по две и пол години, носејќи порака за поддршка од Берлин и ветувајќи дека Германија ќе остане најсилниот поддржувач на Украина во Европа.

Германскиот канцелар, кој во понеделникот наутро пристигна во украинскиот главен град по деветчасовно патување со воз, најави дополнителни испораки на оружје во вредност од 650 милиони евра до крајот на декември за зајакнување на одбраната на Украина, вклучувајќи борбени тенкови, проектили, беспилотни летала и системи за противвоздушна одбрана.

Украинскиот претседател Володимир Зеленски, кој го пречека Шолц во Киев, се заблагодари на Германија за континуираната поддршка.

Но, Зеленски, исто така, истакна дека двете итни украински барања, за покана за членство во НАТО и за испорака на крстосувачки ракети Таурус од германско производство со долг дострел, останале неисполнети.

Шолц избегна прашања за аспирациите на Украина за членство во НАТО, велејќи само дека претходните резолуции на НАТО го отворија патот за евентуално членство на Украина во алијансата.

Канцеларот мисли на состаноците во 2023 и 2024 година, на кои земјите од НАТО само потврдија дека Украина во одреден момент треба да стане членка на западната одбранбена Алијанса. Но, тие не понудија конкретна временска рамка или детални услови за пристапување на Украина.

Шолц, исто така, уште еднаш повтори на заедничката прес-конференција со Зеленски дека одбива да испрати ракети Таурус бидејќи вооружувањето на Украина со оружје со долг дострел ризикува ескалација со Русија.

Во последниве недели, украинскиот лидер повторно го забрза обидот на Украина да се приклучи на НАТО во светлината на територијалните придобивки на Русија во крвавите битки на фронтот.

Така, во неделата официјалната покана за членство во НАТО ја опиша како неопходна за нивниот опстанок, додавајќи дека не се надева оти ќе ја добие поради скептицизмот во САД, Германија и Унгарија.

Пред разговорите, двајцата лидери заедно ги посетија ранетите украински војници во Киев, вклучително и некои кои ги загубија екстремитетите борејќи се со руската инвазија. За време на посетата Зеленски им додели медали на поединечни војници.

Зеленски и Шолц, исто така, гледаа презентација на беспилотни летала користени во одбранбената кампања на Украина против Русија.

Уставниот суд на Романија денеска ги потврди изненадувачките резултати од првиот круг на претседателските избори, со што се отвори теренот за вториот круг на 8 декември што може да ја загрози прозападната ориентација на Романија и да ја поткопа поддршката на таа земја за Украина.

Одлуката ја отстранува неизвесноста што ја надвисна нацијата откако судот нареди пребројување на гласовите минатата недела, бидејќи победата на 24 ноември на помалку познатиот кандидат на екстремната десница Калин Георгеску покрена сомневања за надворешно мешање во изборниот процес на земја која е цврста сојузник на Украина.

Во вториот круг на 8 декември, Георгеску ќе се соочи со противничката од десниот центар Елена Ласкони.

Во неделата во Романија се одржаа парламентарни избори, на кои поединечно води владејачката левичарска Социјалдемократска партија (ПСД), но екстремно десничарските партии освоија третина од местата во новиот законодавен дом.

Кој ќе ја формира владата на крајот ќе зависи од тоа кој ќе победи во претседателската трка бидејќи претседателот го избира премиерот од парламентарното мнозинство.

Хезболах денеска објави дека цел на израелската воена база Руисат ал-Алам во окупираните ридови Кфар Шуба во јужен Либан, ја опишува акцијата како прелиминарно одбранбено предупредување како одговор на континуираните израелски прекршувања на договорот за прекин на огнот.

Во соопштението, Хезболах потсети на повеќекратните прекршувања на прекинот на огнот, вклучително и израелски оган врз цивили, воздушни напади низ Либан кои резултираа со цивилни жртви и континуирано нарушување на либанскиот воздушен простор, дури и над главниот град Бејрут, според милитантната шиитска група.

Израелското воено радио објави дека Хезболах истрелал две ракети кон областа Хар Дов, област на либанско-сириската граница во моментов окупирана од Израел, кои паднале на отворени полиња без да предизвикаат повредени. На социјалната мрежа „Икс“, израелскиот министер за финансии Безалел Смотрич ги нарече дејствијата на Хезболах сериозна грешка и повика на силен воен одговор.

Договорот меѓу Тел Авив и Бејрут, кој стапи на сила во средата, стави крај на повеќе од 14-месечните борби меѓу израелската армија и либанскиот Хезболах, кои започнаа во Појасот Газа минатиот октомври. Но, откако стапи на сила, либанските медиуми објавија 73 израелски прекршувања на договорот. Израел, пак, тврди дека Хезболах е тој што континуирано го прекршува примирјето.

Според условите на прекинот на огнот, Израел ќе ги повлече своите сили јужно од границата, де факто Сината линија, во фази, додека либанската армија ќе ги распореди своите сили во јужен Либан за период кој не надминува 60 дена.

Спроведувањето на договорот ќе го надгледуваат САД и Франција, но деталите за механизмите за имплементација не се познати.

Повеќе од 3.960 луѓе се убиени и повеќе од 16.500 повредени во израелските напади во Либан, а повеќе од еден милион раселени од октомври минатата година, според либанските здравствени власти.