Македонија
Пекарниците попуштија: од утре ќе носат леб по 33 денари, но за штетите од 4,5 милиони евра ќе ја тужат државата
Пекарниците од утре ќе продолжат со производство и ќе носат леб на пазарот, но за штетите што ќе им бидат нанесени поради замрзнатата цена ќе ја тужат државата. Горан Малишиќ, претседател на групацијата за мелничко-пекарската индустрија во Стопанската комора на Македонија, вели дека ваква одлука донеле по консултации со домашни и странски експерти по одлуките на Владата, со кои им беше укината субвенцијата за струја и цената на белиот и полубелиот леб беше замрзната на 33 денари.
„Пекарите се согласија со одлуката од утре да се почне со испорака на одредени видови леб во зависност од можностите на секоја пекарница за да може да им се излезе во пресрет, пред сè, на граѓаните, но и да се остане во периодот на погрешни одлуки што ги носи Владата со несогледливи последици за македонската прехранбена индустрија. Индустријата ќе ги почитува мерките, но ќе си ја бара штетата по правна основа“, рече Малишиќ.
Експертите утврдиле дека владините одлуки се неуставни и незаконски или донесени без утврдено прекршување на пазарот според Законот за трговијата. Спротивно на одлуката, Малишиќ вели дека со записниците од инспекторатите се потврдува оти од 1 декември па сè до крајот на февруари се почитуваат сите мерки и претходните одлуки што Владата ги донела.
„По оваа основа, пекарската индустрија здружено ќе почне правна постапка со цел наплата на штетата, односно загубата што Владата ѝ ја нанесе на индустријата со донесените одлуки. Штетата до 31 мај, до кога е навестено дека ќе трае одлуката за замрзнување на цените на белиот и на полубелиот леб, ќе изнесува над 4,5 милиони евра. Битката за заштита и опстанок на индустријата ќе продолжи на правна основа“, најави Малишиќ.
За тужбата веќе ангажирале адвокати и најавуваат дека ќе ја поднесат следната недела.
Ставот на групацијата е дека пекарската индустрија е жртва на безумието и популистичките одлуки на Владата се носат на штета на индустријата. Малишиќ предупреди дека сегашната одлука за лебот не смее да се дозволи да помине оти ако помине, истото тоа ќе се случи и со остатокот од прехранбената индустрија, особено по најавата на премиерот Димитар Ковачевски дека се подготвува замрзнување на цените и на други основни прехранбени производи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ВРЕДИ: Елми Азири подготвен да го потоне ДУИ
„Елми Азири, пратеник од таканаречениот Европски фронт, во телевизиска изјава јавно призна дека учествувал на состанокот одржан во собраниска канцеларијата 161!“, велат од ВРЕДИ.
„Со оваа, пратеникот Азири го призна тоа што Коалицијата ВЛЕН го зборува во контуинитет: Состанокот помеѓу ВМРО и ДУИ заедно со нејзините сателити се случил на барање на Али Ахмети пред основањето на Владата. Средбата е одржана во Собрание во канцеларијата 161. На тој фамозен состанок присуствувале Блерим Беџети, Елми Азири и Мендух Тачи.
Оваа „европска“ тројка коленичела пред претставниците на ВМРО со цел да издејствуваат да станат дел од Владата наместо ВРЕДИ со само четири министри и без претседател на Собрание. Дури, нуделе на локалните избори да сработат ВМРО да добие Македонци за Градоначалници на Кичево и Струга и да направат список на поранешни функционери на ДУИ кои Ахмети бил подготвен да ги жртвува само за да ги спаси своите внуци.
Со оваа јавно признавање, паднаа сите маски. Се потврди дека „Европскиот фронт” за да ги спаси своите поранешни функционери од кривична одговорност за сторена политичка корупција нема дно кое може да го пробие“, соопштуваат од коалицијата ВРЕДИ.
Македонија
Наутро студено, преку денот сончево со умерена локална облачност
Наутро студено, преку денот сончево со мала до умерена локална облачност. Ќе дува слаб до умерен ветер од југоисточен правец. Минималната температура ќе биде во интервал од -2 до 7, а максималната ќе достигне од 19 до 25 степени.
Во Скопје утрото посвежо, а преку денот претежно сончево со слаб југоисточен ветер. Минималната температура ќе се спушти до 4, а максималната ќе достигне до 25 степени.
Во четврток попладне претежно во западните подрачја ќе има повремен дожд.
Под влијание на циклонска активност во петок и за време на викендот на повеќе места ќе има повремени врнежи од дожд кои наместа ќе бидат пообилни, проследени со грмежи и засилен ветер. Локално ќе има услови за појава на невреме.
Скопје
Без вода Кисела Вода и Центар
Од ЈП Водовод и Канализација известуваат дека денеска имаат планирано две интервенции во водоводната мрежа.
– поради изведување на водоводен приклучок ф- 200 мм на улицата Борис Трајковски бб, прекинато водоснабдување ќе имаат корисниците на дел од истата улица, односно зградите од комплексот „Трим & Лум“. Водоснабдувањето ќе биде прекинато од 09:00 часот до завршување со работните активности. (општина Кисела Вода)
– поради менување на вентил ¾ на улица Македонија 16, прекинато водоснабдување ќе имаат корисниците на дел од истата улица. Водоснабдувањето ќе биде прекинато од 09:00 часот до завршување со санација на дефектот. (општина Центар)