Претседателот на Србија, Александар Вучиќ, во интервју за „Еуроњуз“ изјави дека се што е потпишано во дијалогот меѓу Белград и Приштина и што е потпишано од претставниците на Европската унија, мора да се спроведе. Тој вели дека, кога станува збор за Заедницата на српските општини, под покровителство на ЕУ, потпишани се четири договори – план за имплементација, принципи, управување и Првиот договор.

„ Ова се четири договори. Веќе имаме потпишано сè и секако дека е потпишано од претставниците на Европската Унија и тоа мора да се спроведе. И тоа не е крајната цел. Крајната цел е Србите и Албанците да живеат заедно, да живеат многу подобро и да се почитуваат, без непријателство. Не планирам да зборувам за нечија вина, не е важно дали тоа ќе се случи за три месеци или три години, но ако успееме, тоа ќе биде историски успех“, изјави Вучиќ.

На прашањето дали се подготвува за нова рунда разговори со претставниците на Косово и кои се „црвените линии“, претседателот на Србија вели дека не често зборува за црвените линии, бидејќи ако многу се зборува за тоа, тогаш нема вистински преговори и „другата страна ќе инсистира само на тие црвени линии“.

Поважно е, според Вучиж, да се разговара соодветно, а тоа „значи обид да се најдат компромисни решенија“.

„ Ние сме подготвени да го направиме тоа. Се разбира, двете страни имаат свои црвени линии и не можам да го негирам тоа, но ние, верувам дека двете страни, мораме да направиме многу за нормализирање на ситуацијата меѓу нашите народи, и имајќи го предвид тоа, верувам дека во интерес на двете страни е да се обезбеди слободен проток на стоки, луѓе, капитал. Мора да работиме многу посветено на тоа, како и на спроведување на сите претходни договори“, подвлече Вучиќ.

На прашањето дали Србија е подготвена да направи некои отстапки на косовската страна кога станува збор за членството во Советот на Европа или барем да ја започне таа процедура, Вучиќ рече дека тие „веќе ја започнале таа процедура во Советот на Европа, без да ја прашаат Србија и дека Србија не им треба за тоа“. Сепак, тој додаде дека има регулативи и план предложен од Германците и Французите во однос на меѓународните организации:

„ Тие го добија мојот одговор на тоа, директно им кажав на (Емануел) Маркон и (Олаф) Шолц што мислам за приемот на Косово во Обединетите нации и некои други работи. Но, ние сме подготвени да разговараме за други прашања, секогаш сме подготвени да разговараме. Исто така, треба да разговараме за некои закони кои мора да се донесат, а за тоа ќе разговарам во Охрид со моите соговорници и со некои други луѓе. Но, ние сме подготвени да разговараме за многу прашања и тие ги знаат моите црвени линии“, рече Вучиќ.

Српскиот претседател истакна дека луѓето се заситиле од секакви притисоци со кои се соочени во однос на Косово, санкциите и се друго, поради што популарноста на Европската унија е речиси на најниско ниво.

„ Но, исто така, луѓето ја ценат и ја почитуваат поддршката од Европската унија што ја добивме, особено неодамна. Го добивме најголемиот грант досега, 610 милиони евра за брзата пруга меѓу Белград и Ниш, 165 милиони, како и сите други земји од Западен Балкан, за енергетскиот сектор во готовина за нашиот буџет.

Ние сме мала земја, но сме најголема на Западен Балкан, најголема економија. И овде треба да направиме многу реформи. Згора на тоа, верувам дека направивме многу во однос на судството, кое беше признато и од Европската Унија. Ако вака продолжи, верувам дека еден ден ќе станеме полноправна земја членка на Европската унија“, рече Вучиќ.