Англискиот фудбалски судија Дејвид Кут ги отфрли обвинувањата дека намерно му покажал жолт картон на играч на Лидс пред пет години, откако претходно разговарал за оваа работа со негов познаник.

„Силно ги отфрлам овие лажни и клеветнички наводи. Без оглед на проблемите што ги имав во мојот приватен живот, тие никогаш не влијаеле на моите одлуки на теренот. Секогаш сум го почитувал интегритетот на играта, судејќи ги натпреварите непристрасно и најдобро што можев“, рече Кут.

Според британскиот весник „Сан“, пред натпреварот, познаник му рекол на Кут да му покаже жолт картон на тогашниот играч на Лидс, македонскиот репрезентативец Езџан Алиоски за да може да се обложи на таа опција. Следната вечер Алиоски доби жолт картон во 18. минута.

Натпреварот помеѓу Лидс и Вест Бромвич (1:0) се одигра во октомври 2019 година.

Истрагата за овој случај ја води Фудбалската асоцијација на Англија (ФА).

„Ова се многу сериозни обвинувања и ние итно ги истражуваме“, изјави портпаролот на ФА.

Кут неодамна беше суспендиран откако на социјалните мрежи се појави видео на кое тој дава погрдни коментари за поранешниот менаџер на Ливерпул, Јирген Клоп.

Навивач на Арсенал кој на социјалните мрежи расно го навредуваше фудбалерот на неговиот клуб Томас Парти доби тригодишна забрана за присуство на сите натпревари.

Чарлс Огунмиладе, навивач на Арсенал со нигериско потекло, призна дека испратил грубо навредлива порака на социјалната мрежа „X“, за која тврдеше дека е сатира на она што би рекол бел расист.

Тој објави навредлив коментар минатиот април, откако Парти пропушти шанса за време на ремито 3:3 против Саутемптон.

Објавата била пријавена во полиција, која го посетила навивачот во неговиот дом во Лондон. Тој рече дека коментарот бил наменет да биде сатиричен цитат меѓу група пријатели.

Судијата рече дека немала друг избор освен да наложи тригодишна забрана, но дека комисијата го зела предвид неговото признание за вина, неговиот претходен добар карактер, личните околности, искуството со расизам и намерата на објавата да биде сатирична, објави Би-би-си.

„Не сум расист“ – изјави Огунмиладе пред судот.

Тој рече дека тој и неговите пријатели биле погодени од расизам насочен кон репрезентативците со темна боја на кожата по нивниот пораз во финалето на Европското првенство во 2021 година.

„Нашиот механизам за справување со тоа беше да го исмеваме таквиот вокабулар, да ја ограничиме моќта што овие луѓе ја имаат над нас“, додаде навивачот.

Огунмиладе ќе мора да го предаде својот пасош на полицијата секој пат кога репрезентацијата на Англија игра натпревар во странство, а исто така ќе треба да плати 260 фунти како трошоци.

Огунмиладе рече дека е загрижен за предавањето на пасошот бидејќи тоа може да влијае на неговата кариера и посетите на неговото семејство во Нигерија.

Вечерва во дербито во Лигата на шампионите, на „Енфилд“, Ливерпул ќе го пречека актуелниот шампион Реал Мадрид.

Натпреварот е од исклучителна важност за Реал, бидејќи неочекувано тимот на Карло Анчелоти по четири одиграни натпревари има само шест бода, за разлика од Ливерпул кој има максинален скор со гол разлика 10:1.

Доколку, вечерва Реал загуби, ќе се најде во многу непријатна ситуација, во пресрет на последните три рунди.

Во пресрет на натпреварот, „Марка“, медиуми близок до Реал, објави дека ќе има предиигра, односно состанок меѓу челниците на двата клуба.

Според овој извор, од Ливерпул ги контактирале колегите од Реал со прашањето „Дали навистина го сакате Трент Александар-Арнолд?“, со што јасно ставиле до знаење дека се подготвени да го продадат англискиот репрезентативец во јануарскиот преоден рок.

Намерата на Ливерпул е јасна, клубот сака да ги искористи проблемите со провредите, со кои се соочува Реал, за да заработи од трансферот на Алкесандер-Арнолд.

Десниот бек има договор со Ливерпул до крајот на сезоната и не сака да потпише нов. Доколку Ливерпул не го продаде во јануари, Александер-Арнолд по завршувањето на сезоната ќе го напушти „Енфилд“ без обесштетување.