Младо момче и две девојчиња биле однесени од водата по излевањето на реката Натисоне во провинцијата Удине во Италија, и им се губи секаква трага.

Како што пишува локалниот портал „Удине тудеј“, станува збор за 21-годишна Италијанка и двајца млади луѓе со романско потекло. Засега не е утврдено зошто и како тројцата авршиле во реката.

Спасувачките служби трагаат по нив, но безуспешно.

Нивото на водата на реката порасна за неколку минути, пишува порталот. Како што покажува последното видео, тројцата се гушнале, но струјата ги однела. Спасувачите се обиделе да им пријдат со кран и да им фрлат јаже за да ги спасат, но не успеале. Недолго потоа им се губи секаква трага.

„Јас не сум од овде, но мештаните многу добро знаат дека не треба да се игра со реката во услови како овие бури“, изјави еден од сведоците за порталот.

„Тоа е прекрасна река, но и опасна, водата може да достигне и до 5 метри“, додаде тој.

Хакерскиот напад врз полската новинска агенција (ПАП) сведочи за намерата на Русија да ја дестабилизира ситуацијата во Полска пред изборите за Европскиот парламент, изјави денеска полскиот премиер Доналд Туск.

„Уште еден многу опасен хакерски напад добро ја илустрира стратегијата на Русија за дестабилизирање на ситуацијата во пресрет на изборите за Европскиот парламент“, напиша Туск на мрежата „Икс“.

Тој оцени дека се поочигледно е колку се важни изборите за Европскиот парламент, кои ќе се одржат на 9 јуни.

Хакери, најверојатно поврзани со руските специјални служби, извршија сајбер напад врз ПАП, ставајќи на системот на полската државна новинска агенција две лажни информации за мобилизација на 200.000 Полјаци во блиска иднина да се борат во Украина, соопштија претходно полските власти.

Генералниот секретар на Обединетите нации, Антонио Гутереш, го поддржа новиот предлог за запирање на војната во Газа, претставен од американскиот претседател Џо Бајден синоќа, а Хамас потоа сигнализираше негово одобрување.

Бајден претстави план кој предлага шестнеделен прекин на огнот, преговори за условите за траен прекин на непријателствата и обнова на Газа. Палестинската милитантна група Хамас подоцна објави дека позитивно гледа на содржината на предлогот.

„Генералниот секретар со месеци повикува на прекин на огнот, целосен и непречен хуманитарен пристап и итно и безусловно ослободување на сите заложници држени во Газа“, изјави портпаролот на Гутереш Стефан Дујариќ. „Генералниот секретар силно се надева дека тоа ќе доведе до договор меѓу страните за постигнување траен мир“, додаде тој.

Германската министерка за надворешни работи Аналена Баербок исто така го поздрави новиот предлог.

„Израелскиот предлог што Бајден го повтори и потврди денеска е трошка надеж и отвора излез од војната“, најави таа и нагласи дека „сега останува на Хамас да ја докаже својата посветеност за ставање крај на конфликтот“.

„Секој нов ден со заложници во рацете на терористите на Хамас е еден ден премногу. Секој нов ден кога умираат палестински цивили во Газа е еден ден премногу“, напиша таа на платформата X.

Нејзиниот британски колега, Дејвид Камерон, најави дека Хамас „мора да го прифати“ предлогот за новиот договор. „Како што веќе долго време кажуваме, прекинот на непријателствата може да се претвори во траен мир доколку сите сме подготвени да ги преземеме вистинските чекори“, рече тој.

„Да го искористиме овој момент и да ставиме крај на оваа војна“, напиша британскиот министер кој минатата недела повика на истрага за израелските воздушни напади врз Рафах.