Европа
Тајани: Балканот не може веќе да чека
Балканот не може повеќе да чека, вели италијанскиот министер за надворешни работи и потпретседател на Советот на министрите, Антонио Тајани, во авторски текст за српски „Блиц“. Тој пишува дека заедно со министрите за надворешни работи на Албанија, Босна и Херцеговина, Косово, Црна Гора, Северна Македонија и Србија, како и Шведска, која претседава со Советот на ЕУ, и со комесарот за проширување и соседска политика, разговарале како да се направи поконкретен процесот на европска интеграција на овој регион.
„Од дискусијата произлезе потребата од заедничка работа на интеграција во механизмите и институционалниот живот на Европската Унија од почетните фази на преговарачкиот процес, особено во клучните сектори, како енергетиката и дигиталната транзиција, инфраструктурата, образованието и истражувањето. Некои од моите колеги рекоа: „Сакаме да помогнеме во поставувањето на фазите на ова патување, а не само да ги следиме“, вели Тајани.
Тој нагласи дека го поддржува овој пристап, кој мора да ги вклучи сите шест земји во креирањето на следните фази од процесот на интеграција.
„Она што го бараат земјите од Западен Балкан не е попуст на реформите што треба да ги усвојат за да влезат во Европската Унија. Бараат сигурност за процесот, роковите и, пред сè, конечниот резултат. Навистина можев да ја почувствувам нивната фрустрација од процесот на интеграција, кој во последните години станува сè понестабилен благодарение на честото бирократско толкување на динамиката на преговорите од страна на Европската Унија. На овој начин се заборава извонредната трансформативна вредност што ја има процесот на интеграција за институциите и граѓанското општество на овие земји. Европскиот сон ризикува да стане илузија за сите нив“, вели Тајани.
Италијанскиот министер потенцира дека средбата во Рим послужила веднаш да се дадат конкретни одговори.
„Јас сум оптимист за резултатите што може да се постигнат бидејќи ја видовме подготвеноста на сите да работиме заедно, да изградиме синергија, што може да му обезбеди на регионот иднина на мир и просперитет работејќи на рушење на бариерите што го ограничуваат слободното движење на луѓето, стоки, услуги и капитал, со цел да се постигне заеднички регионален пазар како прв чекор кон интеграција на единствениот пазар на ЕУ. Имаме заеднички предизвици со Балканот, а кои исто така бараат заеднички одговори: енергетска транзиција, поддршка за раст и вработување, борба против нерегуларната миграција“, истакна Тијани.
Тој додаде дека Италија има намера да развие повеќедимензионална акција кон Балканскиот Регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите утрово го нападнаа Киев со дронови, сите ги соборивме
Русија рано утринава изврши неколку напади со беспилотни летала врз Киев, а единиците за противвоздушна одбрана успешно го бранат градот, соопшти украинската армија.
Ројтерс пишува дека сведоци слушнале бројни експлозии во главниот град на Украина, како и дека виделе како воздушната одбрана ги уништува објектите во воздух.
Сите беспилотни летала лансирани од Русија во Киев се уништени со одбранбени системи или неутрализирани со електронско војување, изјави Серхи Попко, шеф на воената администрација во Киев.
Проценките за размерите на нападот ќе бидат објавени во текот на денот, но според првичните информации нема жртви и не е забележана штета, додаде тој.
Предупредувањето за воздушен напад за подрачјето на Киев, Киевската област и целиот источен дел на Украина беше во сила утринава повеќе од пет часа, соопштија од украинските воздухопловни сили.
Европа
Норвешка размислува за изградба на ограда на границата со Русија
Норвешката влада размислува да изгради ограда долж границата со Русија за да ја подобри безбедносната ситуација во земјата. Оградата треба да помогне во случајот на протокот на бегалци од Русија во Норвешка, пишуваат норвешките медиуми.
Тие потсетуваат на ситуацијата во 2015 година, кога 5.000 руски баратели на азил пристигнаа пеш и со велосипеди преку Сторског, еден од граничните премини меѓу Норвешка и Русија.
Норвешката министерка за правда Емили Енгер Мел рече дека изградбата на ограда може да биде еден начин за подобрување на безбедносната ситуација.
НРК известува дека Мел е инспирирана од примерот на Финска, која продолжува да гради огради на границата со Русија. Таа нагласи дека тоа е скап процес, па затоа е неопходно да се процени релевантноста на ваквите инвестиции.
Конкретно, министерката за правда смета дека е можно да се инвестира во набавка на дронови за патролирање на територијата, како и зголемување на бројот на граничари во Сторског.
Копнената граница меѓу Норвешка и Русија е долга 200 километри.
Европа
Нови детали за смртта на Алексеј Навални: се појавија тајни документи
Рускиот портал „Инсајдер“, кој е на списокот на „странски агенти“, денеска објави стотина документи кои содржат информации поврзани со смртта на рускиот опозициски лидер Алексеј Навални, а кои укажуваат на можно труење на опозиционерот.
„Инсајдер“ добил пристап до стотици официјални документи поврзани со смртта на Алексеј Навални во поправната колонија „Поларниот волк“.
Врз основа на тие документи, порталот наведува дека руските власти намерно ги отстраниле референците за симптоми кои не биле вклучени во официјалната верзија, пренесува Танјуг.
Според лекарскиот извештај, „овие симптоми недвосмислено укажуваат дека Навални бил отруен“, се наведува во текстот на медиумската куќа за истражувачкото новинарство.
Според порталот, меѓу документите се пронајдени две верзии на одлуката со која се одбива да се поведе кривична постапка.
Зборовите дека Навални имал стомачни болки, гадење и грчеви пред смртта исчезнале од втората и последната верзија, а истата информација ја има и во вториот документ во описот на „отстранетите ставки“.
Судејќи според текстот на документот, тие се испратени на преглед, иако претходно не се најавуваше ниту самиот преглед, ниту фактот дека Навални воопшто имал мачнини.
Документите ги коментираше лекарот Олександр Полупан, кој го лекуваше Навални по труењето со „Новачок“ во август 2020 година во Омск. Тој изјави дека симптомите укажуваат на труење со органофосфати.
Според „Инсајдер“, овие документи ги потврдуваат зборовите на Јулија Навални, која претходно изјавила дека во последните минути пред смртта Навални навистина се пожалил на остра болка во стомакот.
Навални беше затворен во 2021 година и по бројни судења беше осуден на повеќе од 20 години затвор.
Почина во затвор во февруари 2024 година. Руската опозиција смета дека станува збор за насилна смрт.
Истражниот комитет на Јамало-Ненецк автономен округ на Руската Федерација тврди дека лидерот на руската опозиција починал на медицинскиот оддел по неуспешни мерки за реанимација, па истрагата нема да се води.