Свет
Руската ФСБ спречила саботажа на Крим, уапсен украински агент
Руската Федерална служба за безбедност (ФСБ) соопшти во средата дека нејзини агенти спречиле саботажа во објект на енергетскиот систем во градот Керч на Крим додавајќи дека е уапсен украински агент со рачно изработена бомба, пренесува „Спутник“.
„Федералната служба за безбедност на Русија во градот Керч во Република Крим спречи саботажа на објект од енергетскиот систем на полуостровот. Како резултат на преземените мерки уапсен бил државјанин на Русија и Украина (52), кој бил вклучен во подготовката на ова злосторство“, се вели во соопштението на ФСБ.
Во домот на уапсениот запленети се импровизирана експлозивна направа и средства за комуникација, како и преписка со претставник на украинските специјални служби, кои ги координирале неговите диверзантски активности.
Осомничениот диверзант е во притвор, а против него е поведена кривична постапка по два члена од Кривичниот законик на Русија, кои предвидуваат затворска казна од 20 години до доживотен затвор.
Во друго соопштение од ФСБ објавено вчера се известува дека жител на Крим бил осуден на 10 години затвор за предизвикување пожар во канцеларија за регрутација и за подготвување напад на мост. Тој бил уапсен во јуни минатата година.
Диверзантот бил осуден за предизвикување пожар во канцеларија за регрутација во Симферопол, регионалниот главен град на Крим, и за подготовка за уништување на железнички мост.
При претрес во неговиот дом била запленета граната РГД-5, а истражителите пронашле и телефон со фотографии од железнички мостови на полуостровот, како и тетратка со рачно нацртана мапа на скриен арсенал со оружје, противтенковска мина и детонатор.
Откако Москва ја почна својата воена кампања во Украина во февруари 2022 година, имаше неколку обиди за саботажа на бази на руската армија, регрутни канцеларии и на железнички пруги што се користат како линии за снабдување на руската армија.
Директорот на ФСБ, Александар Бортников, ги обвини Украина и западните сили дека ги поттикнуваат Русите на вооружен бунт. Бортников истакна дека од февруари минатата година во Русија се спречени 118 терористички дела.
И рускиот претседател Владимир Путин ги обвини западните безбедносни служби дека се вмешани во терористички напади во Русија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Кралицата Елизабета немала убаво мислење за Трамп поради негов коментар за принцезата Маргарет, пишува „Дејли мејл“
Кралицата Елизабета наводно го сметала Доналд Трамп за непристоен. Извор вклучен во организирањето на неговата посета на Обединетото Кралство во 2018 година со сопругата Меланија, изјави за „Дејли мејл“ дека реакцијата на кралицата била поврзана со коментарите што Трамп ги имал за сестрата на Елизабета, принцезата Маргарет.
Таа почина во 2002 година на 71-годишна возраст.
Трамп, наводно, и’ рекол на кралицата Елизабета дека „Маргарет мора да била карактерно тешка сестра“, што ја налутило кралицата и таа го сметала за навредлив неговиот коментар. Таа секогаш ја бранеше Маргарет.
Не е јасно зошто Трамп ја споменал, но во серијата на Нетфликс „Круната“, Маргарет беше прикажана како бунтовничка, нестабилна и огорчена за нејзиниот однос со кралицата Елизабета.
Британскиот таблоид пишува дека покојната кралица му рекла на еден гостин дека „особено не и се допаѓало како Трамп гледал преку нејзиното рамо, како да барал некој поинтересен“. Трамп вели дека нејзините негативни впечатоци се целосно лажни.
„Слушнав дека сум и бил омилен претседател. Имав одличен однос со кралицата. И’ се допаднав. Таа беше неверојатна жена“, изјави тој за „Дејли Мејл“.
Свет
Зеленски верува дека војната со Русија може да заврши следната година
Украинскиот претседател Володимир Зеленски изјави дека руската војна против Украина најверојатно ќе заврши во наредната година.
„Кога ќе заврши војната? Кога Русија сака војната да заврши. Кога САД ќе заземат посилна позиција. Кога глобалниот југ ќе застане на страната на Украина и ќе застане до крајот на војната“, рече Зеленски во разговор со претставниците на странските медиуми во Киев на третата меѓународна конференција за безбедност на храна, жито од Украина.
„Тоа нема да биде лесен пат, но убеден сум дека ги имаме сите можности тоа да се случи следната година“, ги пренесе неговите зборови новинската агенција „Укринформ“.
„Отворени сме за предлози од лидерите на африканските, азиските и арапските земји“, продолжи Зеленски.
„Би сакал да ги слушнам и предлозите на новиот американски претседател и мислам дека ќе ги слушнеме во јануари и ќе имаме план да ставиме крај на оваа војна.
Новоизбраниот претседател на САД, Доналд Трамп, во текот на својата предизборна кампања повеќепати даваше до знаење дека сака да ја намали големата американска поддршка за Киев. Откако е избран веќе не вели дека во рок од 24 часа ќе стави крај на војната во Украина, што претходно го потенцираше.
Свет
Орбан го покани Нетанјаху да го посети без да биде уапсен, Борел реагира
Унгарскиот премиер, Виктор Орбан, го покани својот израелски колега, Бенјамин Нетанјаху, да го посети, потврдија од кабинетот на Нетанјаху.
Орбан вчера изјави дека го поканил Нетанјаху во Унгарија иако некои членки на ЕУ најавија дека ќе биде уапсен доколку стапне на нивна почва откако Меѓународниот кривичен суд (МКС) издаде налог за негово апсење поради војната во Газа.
Високиот претставник на ЕУ за надворешна политика, Жозеп Борел, претходно изјави дека владите на земјите-членки на ЕУ не можат да изберат дали ќе ги извршат налозите за апсење издадени од МКС против Нетанјаху, поранешниот израелски министер за одбрана Јоав Галант и водачот на Хамас Ибрахим Ал-Масри за наводни злосторства против човештвото.
Сите земји-членки на ЕУ се потписници на основачкиот акт на МКС, т.н на Римскиот статут. Неколку земји-членки на ЕУ најавија дека ќе ги исполнат своите обврски од статутот доколку има потреба. Но, унгарскиот премиер Виктор Орбан го покани Нетанјаху да ја посети неговата земја, уверувајќи го дека нема да биде на никаков ризик ако го стори тоа.
„Државите што ја потпишаа Римската конвенција се обврзани да ја спроведат одлуката на судот. Тоа не е опционално“, рече шефот на европската дипломатија, Жозеп Борел, за време на посетата на Кипар, каде што присуствуваше на работилница на израелски и палестински мировни активисти.
Соединетите Американски Држави ја отфрлија одлуката на МКС, а Израел потегот на судот го оцени како антисемитски.
„Секогаш кога некој не се согласува со политиката на израелската влада, тој е обвинет за антисемитизам“, рече Борел, чиј мандат истекува овој месец.
„Имам право да ги критикувам одлуките на израелската влада, без разлика дали е тоа Нетанјаху или некој друг, без да бидам обвинет за антисемитизам. Тоа не е прифатливо. Доста е“, посочи.