Европа
Балтикот бара ЕУ-дебата откога кинески амбасадор го доведе во прашање нивниот суверенитет
![кинески амбасадор во Франција](https://makfax.com.mk/wp-content/uploads/2023/04/Лу-Шаје.jpg)
Откога кинескиот амбасадор во Франција предизвика меѓународен скандал доведувајќи го во прашање на суверенитетот на земјите што произлегоа од поранешниот Советски Сојуз, се очекува гневот од Источна Европа и Украина да прелие на состанокот на министрите за надворешни работи на ЕУ закажан за денеска, пренесува „Еурактив“.
Според кинескиот амбасадор во Франција, Лу Шаје, земјите што произлегоа од поранешниот Советски Сојуз немаат ефективен статус според меѓународното право бидејќи не постои меѓународен договор што го потврдува нивниот статус како суверени нации.
Коментарите на Лу фрлаат сомнеж не само врз суверенитетот на Украина туку и врз сите поранешни советски републики, кои станаа независни нации по падот на Советскиот Сојуз во 1991 година, вклучувајќи ги и земјите членки на ЕУ.
Иако француското МНР изрази вџашеност од коментарите на Лу, нема индиции дека амбасадорот бил повикан да ги објасни своите забелешки зашто Париз чека официјален Пекинг да потврди дали овие коментари ја одразуваат позицијата на Кина.
Естонија, Литванија и Латвија, пак, во неделата координирано ги повикаа амбасадорите на Кина во секоја земја за објаснување.
Контроверзните коментари на Лу доаѓаат пред денешниот редовен состанок на министрите за надворешни работи на ЕУ во Луксембург, на кој требаше да се разговара за односите меѓу ЕУ и Кина.
Високиот претставник на Европската Унија за надворешна политика и безбедност, Жозеп Борел, кој ги нарече коментарите неприфатливи, додаде дека ЕУ се надева оти тие не ја претставуваат официјалната политика на Кина.
Борел минатата недела во Европскиот парламент ја критикува какофонијата од ставови и немањето координација меѓу членките на ЕУ во однос на Кина. Коментарите на Лу повторно ја разгореа дебатата за единствен пристап на ЕУ кон Кина и дали ЕУ треба да смета на помош од Пекинг за менување на позицијата на Русија.
Тајмингот е проблематичен и за францускиот претседател Емануел Макрон, кој со својата посета на Пекинг претходно месецов и последователните изјави предизвика вознемиреност кај некои западни сојузници.
Според Антоан Бондаз, експерт за Кина во Фондацијата за стратешки истражувања (ФРС) со седиште во Париз, ЕУ треба да ја ревидира својата постојна стратегија за Кина од 2019 година за целосно да ги вклучи политичката, дипломатската и економската поддршка на Кина за Русија, како и заклучоците од говорот на претседателката на Европската комисија, Урсула фон дер Лаен, за Кина, во кој таа посочи дека Европа треба дипломатски и економски „да се ослободи од ризикот“ со Кина, која станува порепресивна дома и понаметлива во надворешните односи.
„Затоа мора да се задржи триптихот – партнер за соработка, економски конкурент и системски ривал – но, стратешките цели на ЕУ мора да бидат подобро дефинирани, особено во смисла на намалување на ризикот“, додаде тој.
Бондаз смета дека ЕУ, пред сè, треба да биде понаметлива и јасно да стави до знаење дека војната во Украина е приоритетно безбедносно прашање за блокот, како и дека испораките на оружје за Русија би биле против меѓународното право и против нашите безбедносните интереси на Унијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Европа
Шумски пожар во популарно турско одморалиште: „Продолжуваме со воздушна и копнена интервенција“
![](https://makfax.com.mk/wp-content/uploads/2024/07/pozarnikari-shuma1.jpg)
Шумски пожар избувна во неделата во областа Лара во турското летувалиште Анталија, каде што се наоѓа хотелски комплекс, соопшти градоначалникот на градот, Мухитин Бејек.
„Продолжуваме со воздушната и копнената интервенција за гаснење на пожарот што избувна во шумската област во регионот Лара“, изјави тој на социјалната мрежа „Икс“.
Бејек додаде дека властите се во состојба на готовност поради зголемениот ризик од шумски пожари истакнувајќи дека моментната температура во Анталија е 36 степени. Претходно денеска, беше објавено дека големи шумски пожари ги зафатија турските провинции Чанаккале, Измир и Ајдин.
Во провинцијата Чанаккале пожар зафати земјоделско земјиште во регионот Езине. Спасувачите морале да ги евакуираат жителите на неколку села. Шумски пожари ги зафатија областите во близина на градовите Бурса, Едрене, Баликесир, Караман и Караманмарас.
Европа
(Видео) Украинците објавија невидени снимки од преземањето на Змискиот Остров
![](https://makfax.com.mk/wp-content/uploads/2024/07/zmiski-ostrov-prezemanje.jpg)
Досега невидени снимки објавени вчера од Украинската служба за безбедност (СБУ) покажува како киевските сили пред две години зазеле клучен пункт во Црното Море. Украинските сили, заедно со агентите на СБУ, „спроведоа уникатна и исклучително важна операција“ на Змискиот Остров во јуни 2022 година, се вели во објавата на СБУ во „Телеграм“.
Московските воени авиони го гаѓаа Змискиот Остров во првите часови од инвазијата, која почна на 24 февруари 2022 година. Украинските војници стационирани на островот добија култен статус кога одговорија со пцости на барањето да се предадат.
Судирите меѓу руските и украинските војници за Змискиот Остров повторно се најдоа на насловните страници во јуни истата година. Украинците ја презедоа контролата на островот, а Русите најавија дека ќе се повлечат од островот.
Звільнення о. Зміїний: унікальні кадри воїнів СБУ
У червні 2022 року спецпризначенці ЦСО «А» СБУ разом із бойовими побратимами з ГУР МОУ та ЗСУ провели унікальну та надзвичайно важливу операцію.
Пам’ятаємо Героїв України, які віддали свої життя у цій битві.
1/3 pic.twitter.com/qtDOT8nNLg
— СБ України (@ServiceSsu) June 30, 2024
„Руските вооружени сили ги завршија задачите на Змискиот Остров и се повлекоа“, изјави тогаш портпаролот на руското Министерство за одбрана.
Видеото на СБУ покажува како украинските војници се приближуваат до Змискиот Остров и пукаат во цели. Камерите покажуваат и војници како слетуваат на островот и се пробиваат низ срушените згради додека пукаат со оружје, пишува „Њузвик“.
Операцијата „се состои од неколку фази“, соопшти СБУ. Тие додадоа дека повторното заземање на Змискиот Остров „било од стратешко значење бидејќи оттогаш почнало постепеното движење на непријателот од Црното Море“.
Кирило Буданов, шеф на украинската воена разузнавачка агенција (ГУР), претходно го опиша Змискиот Остров како стратешки клучен од цивилни, комерцијални и воени причини. „Оној што го контролира островот може во секое време да го блокира движењето на цивилните бродови во сите правци кон јужна Украина и да ја нападне западна Украина“, рече Буданов во средината на мај 2022 година.
Островот се наоѓа во близина на Романија во северозападниот дел на Црното Море. За време на војната, Украина ја ослабе руската Црноморска флота, која делумно оперира од руската база Севастопол, на западниот раб на анектираниот полуостров Крим.
Извештаите сугерираат дека Кремљ планира нова воена база во пристаништето Очамчире во Абхазија, отцепен регион на Грузија. Ова би ги ставило руските бродови уште подалеку од украинскиот брег. Западното разузнавање процени дека Русија веќе ја ограничила својата активност во северозападниот дел на Црното Море преместувајќи ги своите бродови уште на исток во својата база во Новоросијск.
Европа
Маж со нож нападнал полициска патрола во Германија, убиен е
![](https://makfax.com.mk/wp-content/uploads/2024/03/germanska-policija-1.jpg)
Маж вчера со нож нападнал тројца полицајци во близина на Нирнберг во Германија. Тој почина откако беше застрелан од полицијата на железничка станица, изјави портпаролот на полицијата.
Тој починал на местото на настанот, во јужниот град Лауф ан дер Пегниц, и покрај итните мерки за прва помош, изјави портпаролот.
Според полицијата, напаѓачот најпрвин нападнал полициски автомобил во патрола. Кога полицајците излегле од возилото, тој тргнал кон нив.
„Имаше нож“, рече портпаролот.
Портпаролот рече дека нема повредени полицајци и не даде детали за тоа колку истрели биле испукани, кој испукал или каде бил погоден човекот.
Тој, исто така, првично не го коментираше идентитетот на напаѓачот или позадината на неговиот напад.
Според портпаролот на полицијата, просторот пред станицата е ограден.