По повод Светскиот ден на волонтерството – 5 Декември, Собранието на Република Северна Македонија, во соработка со Црвениот крст на РСМ, организираше заеднички активности со цел да се истакне значењето на волонтерскиот ангажман и да се даде признание на сите кои несебично придонесуваат за доброто на заедницата.

Денот започна во Централната канцеларија на Црвениот крст, каде пратениците беа поздравени од проф. д-р Ромел Велев, претседател на Црвениот крст, кој ја нагласи важноста на волонтерството како двигател на солидарноста и хуманоста. Пратениците добија ориентирање и конкретни волонтерски задачи, по што беа распределени на различни работни позиции на територијата на град Скопје.

Во периодот од 10:00 до 11:00 часот, претставници на законодавниот дом учествуваа во волонтерски активности во:

– Дневниот центар за лица со посебни потреби „Пролет“;

– „Нега Центар“;

– Центарот за прва помош;

– Дневниот центар за активно стареење „Даре Џамбаз“;

– Дневниот центар за активно стареење – Чаир;

– Центарот за доброволно дарување крв „Даре Џамбаз“;

– Центар „Копче“;

– Пунктот за бездомници „Момин Поток“;

– Логистичкиот центар „Момин Поток“.

Вклучени во овие активности беа пратениците: Ваљбона Емини Адиљи, Павле Арсовски, Оливер Спасовски, Димитар Ковачевски, Моника Зајкова, Сања Лукаревска, Јованка Тренчевска, Беким Сали , Рашела Мизрахи, Грација Бакаревска, и Ангелинка Петкова.

Активностите продолжија во Собранието, каде се одржа прием. Присутните ги поздрави претседателот Африм Гаши.

„Бидејќи отсекогаш сум се стремел да бидам промотор на човечноста и во политиката, не е случајност што, заедно со почитуваните пратеници на Собранието, сме тука не само како претставници на граѓаните, туку и како сограѓани-волонтери. Со нашето волонтерско ангажирање денес сакаме да дадеме пример дека волонтерството не е само повик, туку морална, институционална и човечка одговорност“- кажа Гаши во неговото обраќање.

Обраќање имаше и Саит Сати, генерален секретар на Црвениот крст, кој се заблагодари за партнерството и за придонесот на волонтерите во заедницата. Исто така тој ја истакна силата на волонтерскиот дух и потребата од натамошна поддршка на граѓанското ангажирање.

Во рамки на свечениот дел беше извршено доделување благодарници за сите волонтери вклучени во операцијата за помош и поддршка на населението погодено од несреќата во Кочани.

Следуваше потпишување на парламентарна декларација за поддршка на волонтерството, со која Собранието ја реафирмира својата заложба за унапредување на волонтерските програми.

Македонија, Грција, Србија, Унгарија и Австрија ќе потпишеме Договор за брза пруга на Коридор 10 со кои се обврзуваме да воспоставиме брз транспорт, истакна заменик претседателот на Владата и министер за транспорт Александар Николоски по средбите во Брисел со претставници од ЕУ и министрите за транспорт од регионот на Министерскиот совет. Тој најави дека на иницијатива на Австрија ќе се потпише и Договор за доизградба на Коридор 8.

“ Она што очекував дека ќе се случи се случува, а тоа е дека ќе потпишеме заедничка декларација Грција, Македонија, Србија, Унгарија и Австрија за изградба на железнички коридор 10, нешто што беше подготвено од минатата година, но за жал заради несреќата во Нови Сад тоа беше одложено. Тоа е многу значајно за нас бидејќи нема поента да потрошиме над 2 милијарди евра, а другите држави да не градат. Ќе се обврзе Грција да го заврши делот од над Солун до Гевгелија. До јануари ќе ја завршат сигнализацијата до Гевгелија, ќе има најмодерна сигнализација и после тоа ќе почнат да работат на двоколосечна пруга, што значи дека едноколосечната пруга веќе до јануари ќе биде со брзина до 120 км на час за карго што значи дека возовите многу побрзо ќе одат до солунското и атинското пристаништа. Понатаму ќе треба да ја работат и втората линија која треба да биде патничка и ќе се поклопи со горе/долу 2030 година период кога и ние ќе ги завршиме двете линии, додека првата карго линија ќе биде готова 2028 година.
Понатаму, Србија треба да го изгради делот што недостасува од граница до Ниш, Белград – Будмипешта е готова и ја ставаат во функција, а Будимпешта -Виена постои како брза пруга, што е една одлична вест за Коридор 10. Исто така на иницијатива на Австија ќе потпишеме и Договор за Коридор 8, за да Албанија се обврзе да гради затоа што нема поента ние да трошиме средства, Бугарија да троши, а Албанија да не го прави истото, бидејќи треба да се поврземе од Драч до Црното море” – истакна Николоски.

Тој додаде дека визијата на Владата предводена од ВМРО-ДПМНЕ, Македонија да стане центар на Балканот, во овие година и половина почнува да дава резултати и како факти ги истакна овие меѓународни средби и средства што се одвојуваат за крупните капитални проекти.

Во текот на минатата недела, царински службеници открија неколку обиди за криумчарење разна стока.

27 штеки цигари со македонски акцизни маркички од марките Marlboro и Rothmans, откриени се на Меѓународниот аеродром Скопје при контрола на куфер на патничка која имала намера да отпатува со лет за Лондон.

Употребуван мотор за возило MITSSUBISHI PAJERO 1994 е пронајден во багажникот на автомобил при влез во државата на граничниот премин Ново Село.

На граничниот премин Св.Наум на влез во државата запленети се 75 пакетчиња и 123 ленти различни видови лекови (Amaryl 2 mg, Anafranil 25 mg, Procto Synalar-N 15 g, Androcur 50 mg, Pilokarpine, Arava 20 mg и други) за чиј увоз е потребна дозвола од Агенција за лекови и медицински средства. Лековите се пронајдени во една ќеса и една торба сместени под предните седишта на автомобил. Вредноста на привремено задржаните лекови изнесува 83.180 денари, додека вредноста на избегнатите давачки изнесува 8.526 денари.

58 пакувања со ветеринарни лекови (Limoxin, Pentstrep, Alben Care, Macotyl 300, Agalaxipra, Exiptol, Genta 100и други) за кои е потребна дозвола за увоз, се откриени во патните торби на двајца патници при контрола на автомобил кој бил пријавен за влез во државата на граничниот премин Стење.

5.600 евра се пронајдени при личен претрес на патник кој се пријавил за излез од државата на граничниот премин Делчево. Возачот пријавил дека со себе носи 2.000 евра, но во внатрешен џеб од неговата јакна биле пронајдени 7.600 евра за кои не поседувал документ за потекло. Согласно законските прописи му биле вратени 2.000 евра, а 5.600 евра се привремено задржани.

На влез во државата на граничниот премин Богородица во просторот за резервна гума на автомобил пронајдени се 31 штеки цигари PS без акцизни маркички. Вредноста на непријавените цигари изнесува 27.900 денари, додека вредноста на избегнатите давачки изнесува 55.890 денари.

Во багажник и помеѓу седиштата на патничко комбе кое се пријавило за влез во државава на граничниот премин Ново Село, пронајдени се 5 делови за автомобили (браници, крила и менувач) и 1 детски мопед на бензин.

10 ќилими ICON-120*170 см, 1 правосмукалка со чистач на пареа KIWI и 600 метри пластични лајсни се пронајдени при контрола на стока со потекло од Турција. Стоката била пријавена за увозно царинење во Царинска испостава Гевгелија и наменета за увозник од Гостивар, но не била опфатена во царинските документи.

842 разни верски предмети, 50 креми за лице и 84 килограми мед се пронајдени во 16 кутии и една ќеса сместени во товарниот дел на камион кој се пријавил за влез во државава на граничниот премин Дојран. Вредноста на производите, кои не биле опфатени со царинските документи изнесува 899.460 денари, а избегнатите давачки се во износ од 327.067 денари.