Републиканскиот претседателски кандидат Доналд Трамп изјави дека еврејските американски гласачи ќе бидат делумно виновни доколку тој ги загуби изборите на 5 ноември и ако победи актуелниот потпретседател и кандидат на демократите Камала Харис.

Во говорот на Националниот самит на израелско-американскиот совет во Вашингтон, поранешниот американски претседател се пожали дека заостанува зад Харис меѓу американските Евреи.

„Израел веројатно ќе престане да постои во рок од две години доколку Харис победи на изборите, а Евреите ќе бидат делумно виновни за тој исход, бидејќи тие имаат тенденција да гласаат за демократи“, тврди Трамп.

„Ако јас не победам на овие избори, а еврејскиот народ, ако тоа навистина се случи, ќе има многу врска со тоа бидејќи 40 отсто, мислам, 60 отсто од нив гласаат за непријателот – Израел, според мое мислење, ќе престане да постои во рок од две години“, им рече Трамп на толпата.

Трамп се осврна на анкетата која покажа дека Харис освоила 60 отсто од гласовите меѓу американските Евреи. Во исто време, тој изрази жалење што на изборите во 2016 година, на кои победи, и на изборите во 2020 година, на кои победи демократскиот претседател Џо Бајден, доби помалку од 30 отсто од гласовите на американските Евреи.

Сопругата на Сергеј Трифуновиќ, Исидора проговори за неодамнешниот случај на српскиот актер. Таа во интервју за ТВ Блиц изјави дека актерот е осуден на една година затвор и дека мора да ја напушти Хрватска до 22 септември.

„Сергеј е казнет за меме фотографија, тој не е автор на таа фотографија, тој е дистрибутер. Фотографијата е спорна. Овој случај нема врска со оној од минатата година во Сплит. Сергеј тогаш беше осуден и плати. Имајќи предвид дека тој не беше на територијата на Република Хрватска кога ја сподели таа фотографија, не ни е јасно дали важат хрватските закони“, изјави Исидора.

„Нему му е забранет влез во Хрватска на три месеци. Тој мора да ја напушти Хрватска до 22 септември“, додаде таа, а потоа раскажа како таа и Сергеј го поминале времето во Хрватска откако тој бил ослободен.

„Одморивме, прошетавме, тој е разочаран поради начинот на кој го третираа. Не се чувствува добро за околностите. Моите родители живеат во Хрватска, никој не ни гарантира што ќе биде следниот пат ако решиме заедно да ги посетиме“, заклучи Исидора.

Сергеј Трифуновиќ беше уапсен во вторник околу полноќ на граничниот премин Бајаково додека преминувал од Србија кон Хрватска. Потоа бил спроведен во Општинскиот суд за прекршоци во Сплит. Трифуновиќ пред судот изјави дека не се чувствува виновен за она за што е обвинет.

Севернокорејскиот лидер Ким Џонг Ун ја посети контролната соба во објектот за збогатување ураниум.

Северна Кореја за прв пат покажа капацитет за збогатување ураниум кој произведува материјал за нуклеарно оружје.

Фотографиите го прикажуваат лидерот Ким Џонг-ун, кој претходно вети дека „експоненцијално“ ќе ги зголеми резервите на нуклеарно оружје во земјата со контролирање на областа.

Државната корејска централна новинска агенција (KCNA) во извештајот во петокот објави дека тој на сличен начин повикал на зголемено производство во фабриката за ураниум.

Збогатениот ураниум е од суштинско значење во производството на нуклеарни боеви глави.

На фотографијата Ким поминува покрај редовите центрифуги и разговара со воени претставници.

Тоа доаѓа во време на зголемени тензии на Корејскиот полуостров.

„Ким ја обиколи контролната соба на базата за збогатување ураниум за да дознае како функционира производната линија“, објави КЦНА, додавајќи дека „се чувствувал силен“ кога ја видел локацијата.

Владата на Јужна Кореја соопшти дека остро ги осудува плановите на Северна Кореја да го зголеми производството.

Експертите долго време се сомневаат дека Северна Кореја тајно управува со најмалку една постројка за збогатување ураниум во близина на Јонгбјон.

Леиф-Ерик Изли, професор на Универзитетот Ева во Сеул, рече дека Северна Кореја го прикажала објектот за да се пофали со својот нуклеарен развој, но и да сигнализира дека нејзината програма за оружје е неповратна.

„Режимот на Ким, исто така, може да се пофали дека сè уште ја ужива дипломатската и економската поддршка на Русија и Кина, и покрај неговото нуклеарно засилување“, изјави професорот Исли за Би-Би-Си.

Хонг Мин, аналитичар во Корејскиот институт за национално обединување, изјави за новинската агенција АФП дека фотографиите би можеле да бидат „порака“ до претстојните претседателски избори во САД, со цел да и се покаже на следната администрација дека ќе биде „невозможна денуклеаризација на Северна Кореја“.

„Тоа е порака која бара од другите земји да ја признаат Северна Кореја како нуклеарна држава“, рече Хонг.

Јужнокорејското Министерство за обединување го осуди Северот за објавувањето на објектот, додавајќи дека незаконското распоредување на нуклеарно оружје прекршува неколку резолуции на Советот за безбедност на ОН.

„Секоја нуклеарна закана или провокација од Северна Кореја ќе биде дочекана со силен одговор од нашата влада и војска, врз основа на цврстиот сојуз меѓу Јужна Кореја и САД“, соопшти Министерството за обединување.

Не е познато колку нуклеарно оружје има Северна Кореја, но една неодамнешна проценка вели дека бројот е 50, со доволно материјал за производство на уште 40, пренесуваат светските медиуми.