Македонија
Герасимовски: Роденденот на Горан Стефановски го славиме со неговите рокенрол-приказни
Општина Центар денеска ги славеше рокенрол-приказните на бардот на македонската драма, Горан Стефановски. Традиционално, на 27 април, денот кога е роден Стефановски, Општината пред неговото спомен-обележје во Дебар Маало организира настан, посветен на неговата љубов кон рокенролот. Артистот Александар Микиќ со својата извонредна глума го збогати настанот со извадоци од рокенрол-мистеријата „Лонг плеј“ на Стефановски. Музичарите Марија Каева, Владан Дробицки, Мирко Попов и Дина Јашари ги изведоа популарните рок-нумери од „Леб и сол“ и „Фолтин“, чиј автор е исто Стефановски. Перформансот беше во режија на Јордан Симонов.
Градоначалникот на општината, Горан Герасимовски, говореше за уметничкиот бит на Стефановски.
„Можеби некој ќе се запраша зошто годинава избравме да се посветиме на љубовта на Горан кон рокенролот. Имавме две причини: првата, Горан уште од средношколските денови, па сè до крајот на својот живот го испишувал својот музички дневник во кој мошне речито истакнувал колку многу му значела рок-музиката. Тој е едниот од ретките колекционери што имал илјадници плочи и цедиња уште од 60-тите години на минатиот век, а втората причина е – посветата што професорот Горан Стефановски ја напишал на драмата ‘Лонг плеј’ на својот некогашен студент Јордан Симонов, а која гласи: ‘За Јоцо, рокерски поздрав, од Горан’“, изјави Герасимовски.
Герасимовски истакна дека Горан Стефановски преку неговите безвременски дела пренесуваше универзални пораки. Тој преку своите уникатни драми создаде национална слика за нашиот народ.
„Во земјата на уметноста, Горан беше исто толку роден во Англија колку и во Македонија. Тој потекнуваше од театарот, како што самиот напишал во есејот ‘Искрата што бега’: Кога луѓето ме прашуваат од каде потекнувам, им велам – од театарот, тие мислат јас се шегувам, ама не е така. Каде што има театарски простор, таму сум сигурен. Сцената е храмот во кој се молам. Дома е таму кај што е театарот“, рече градоначалникот на општина Центар.
Горан Стефановски е роден на 27 април 1952 година, почина на 27 ноември 2018 година, на 66 години. Во неговото омилено Дебар Маало, во триаголниот парк, е поставено негово спомен-обележје.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Боки-13 за операцијата „Бумеранг“: поднесе кривични против Заев, Спасовски, Русковска
Бојан Јовановски-Боки 13 поднел кривични пријави против поранешниот премиер Зоран Заев, ексминистерот за внатрешни, Оливер Спасовски, и двајцата генерални секретари на СДСМ, поранешниот Александар Кирацовски и актуелниот Миле Зачевиќ, како и против поранешната шефица на Јавното обвинителство за гонење организиран криминал и корупција, Вилма Русковска.
Тој дошол во Обвинителството на покана на актуелниот шеф на оваа институција, Ислам Абази.
Најави дела кривично-правната операција е наречена „Бумеранг“.
„Сите мои наводи и описот на настаните ќе бидат материјализирани со докази што потекнуваат од мојот телефонски уред, кој ми беше одземен при моето апсење во предметот ‘Рекет’. Се работи за кривични дела што се однесуваат на злоупотреба на службената положба и овластувањето, за изборни измани, незаконско финансирање политичка партија, злоупотреба на јавните набавки“, додаде тој.
Најави и продолжение на предавање докази во писмена форма.
„Поднесена е кривична пријава и против Вилма Русковска за злоупотреба на службената положба, примање поткуп, примена на тортура. Зоран Заев е речиси во секоја пријава“, рече Јовановски.
Македонија
Мицкоски на средба со коалицијата: доби поддршка за почнување преговори за состав на идната влада
Претседателот на ВМРО-ДПМНЕ, Христијан Мицкоски, денеска оствари средба со претседателите на партиите во состав на коалицијата „Твоја Македонија“.
Беше констатирано дека коалицијата оствари успешен и историски резултат, кој создава и одговорност за реализирање на очекувањата.
Мицкоски доби поддршка од претседателите на коалициските партии за почнување преговори за состав на идната влада.
Според заклучокот на состанокот, разговорите треба да се водат врз основа на постулати за забрзан економски развој на Македонија, силна борба против криминалот и корупцијата и европските интеграции врз база на принципи и вредности, соопштија од партијата.
Македонија
Лукаревска: СДСМ секогаш бил достоинствен поради зрелоста на неговите раководства да се соочат со поразот и одговорноста, јас не сакам да бидам исклучок
Изборните резултати ги искушуваат нашата искреност како политичари и искреноста на нашите зборови дека сме ја разбрале вашата порака, напиша на социјалните мрежи потпретседателката на СДСМ, Сања Лукаревска, откога неколку членови и партиски функционери во СДСМ претходно си поднесоа оставки.
СДСМ, додава таа, секогаш бил достоинствен и поради зрелоста на неговите раководства да се соочат со поразот и со одговорноста.
„Јас не сакам да бидам исклучок. Благодарам за укажаната доверба да бидам заменик-претседател на СДСМ. И таа должност ја извршував со почит, совесно, одговорно и чесно. Секако, со поддршка од сопартијците и незаменливата потпора од моите родители. Благодарам е најмалку што можам да им речам.
Горда сум што 8 мај беше празничен ден за демократијата. Тоа беше и суштината на борбата на СДСМ за ослободување од ‘заробената’ држава. Воедно, им благодарам на сите граѓани за секој глас за СДСМ, особено во Третата изборна единица. Вредна за внимание е и пораката од оние што не излегоа на гласање, како и на оние што гласаа против.
На ред е нашата внатрепартиска средба со вистината. На отчетниот конгрес на СДСМ неминовна e отворена, искрена и самокритична анализа на нашите погрешни чекори, на лошите кадровски решенија, како и за нашата немост за успешните политики што ги спроведовме во исклучително тешки услови предизвикани од светските кризи.
Го презедовме товарот и на тешките политички одлуки. Но, тоа е СДСМ кому државата, нејзината стабилност и иднина секогаш му биле пред сė друго. Така било. Така мора и да остане“, порача во напишаното Лукаревска.
Оценува дека на Македонија ѝ потребен СДСМ.
„Што побргу заедно ја консолидираме партијата толку побргу ќе можеме да кажеме – тука сме. Јас верувам во СДСМ, а уште повеќе во неговата сила да се реформира, да се обедини и да се подготви.
Честитки на победникот и на сите 120 пратеници.
Во искреното соочување со причините за изборниот пораз е нашата прва победа. Тоа е најмалку што им го должиме на сопартијците, на симпатизерите и поддржувачите на СДСМ, но и на демократска Македонија“, додава Лукаревска.