Словачкиот премиер Роберт Фицо објави дека имало обид за саботирање на неговата посета на Москва. Според него, плановите за билатерални средби биле нарушени поради доцнењето на летот, што Фицо го објави на својата Фејсбук страница.

Во својата вчерашна објава, Фицо изјави дека добил порака од Естонија со која го информираат дека на неговиот авион нема да му биде дозволено да лета низ естонскиот воздушен простор на пат кон Москва.

„Секако, ова е намерен обид за саботирање на мојата посета на Москва. Тоа сериозно го нарушува целиот наш распоред – нема да можеме да присуствуваме на планираните состаноци утре вечер“, објасни словачкиот премиер.

Тој нагласи дека прави сè што може за да стигне до Москва и „да учествува на четири исклучително важни билатерални средби“.

Како што пишува РБЦ-Украина, според најновите извештаи, Фицо нема да учествува на парадата на рускиот претседател Владимир Путин по повод Денот на победата.

Голема парада ќе се одржи во Москва на 9 мај по повод 80-годишнината од крајот на Втората светска војна. Рускиот лидер Владимир Путин покани неколку странски лидери да присуствуваат на настанот.

Кинескиот претседател Кси Џинпинг пристигна во Кремљ на средба со рускиот претседател Владимир Путин, кој го опиша како „драг пријател“.

Путин рече дека ја цени можноста за директни разговори со кинескиот лидер и додаде дека наскоро ќе ја посети Кина „со големо задоволство“.

Рускиот претседател рече дека соработката меѓу двете земји е „насочена кон доброто на нивните народи“, а не против трети страни.

Кси го нарече Путин „стар пријател“ и изрази задоволство што е повторно во Русија.

Кси, исто така, рече дека Кина ќе соработува со Русија во преземањето посебна одговорност како светска сила.

Тој додаде дека Кина е подготвена да соработува со Москва за еднаква, уредна, мултиполарна и инклузивна економска глобализација.

Кинескиот претседател, исто така, нагласи дека двете земји „решително ќе ги бранат правата и интересите на огромното мнозинство земји во развој“.

Светлата се секогаш исклучени, а завесите се спуштени. Како што минуваат неделите, собите во Белата куќа што отсекогаш ги користеле првите дами остануваат темни бидејќи сегашната прва дама всушност не живее во Вашингтон. Меланија Трамп не се појавува во јавноста со недели, туку престојува во Трамп Тауер на Менхетен или во Флорида, каде што може да се скрие во Мар-а-Лаго.

Функционерите во администрацијата на претседателот Доналд Трамп тврдат дека таа е во Белата куќа почесто отколку што јавноста знае, но не се подготвени или можеби не им е дозволено да кажат кога точно и колку долго. Како да ја имаме Грета Гарбо за наша прва дама, пишува „Њујорк тајмс“.

Се очекува г-ѓа Трамп повторно да се појави во главниот град во четврток за да открие поштенска марка во чест на поранешната прва дама Барбара Буш и да присуствува на гала за мајките од американската војска.

Но, две лица запознаени со распоредот на Меланија Трамп велат дека таа поминала помалку од 14 дена во Белата куќа откако нејзиниот сопруг положил заклетва како претседател пред 108 дена. Други велат дека дури и тоа е дарежлива проценка.

Претставници на Белата куќа постојано одбиваа да коментираат за целите на овој напис. Тоа што местото каде што се наоѓа првата дама е една од најчувствителните теми во оваа Бела куќа само ја зголемува интригата. „Не сме имале толку повлечена прва дама уште од времето на Бес Труман, пред речиси 80 години“, вели Кетрин Џелисон, историчарка на Универзитетот во Охајо чие истражување се фокусира на првите дами.

Г-ѓа Труман, исто така, го поминувала поголемиот дел од времето надвор од Вашингтон. „Таа едноставно го обожаваше својот приватен свет“, рече Џелисон. Истото важи и за сегашната прва дама.

Таа ангажирала персонал да работи за неа во Источното крило на Белата куќа, но ретко доаѓа во канцеларијата. Дури и редовните гости на Мар-а-Лаго велат дека не ја гледаат Меланија често на имотот.

Секој брак има свои подеми и падови, но како и со многу други работи, Трампови се посебна категорија. За само неколку месеци минатата година, тие доживеаја јавно судење поради неговата неверност, два обиди за атентат и претседателска кампања.

Судењето во врска со исплатите на Трамп на порно ѕвезда за да молчи беше особено предизвикувачки момент, рекоа две лица запознаени со нивната врска. Госпоѓа Трамп се држеше подалеку од судот во Њујорк.

Во јануари, Меланија го лансираше својот сопствен криптовалутен токен. „Сега можете да купите $МЕЛАНИЈА“, напиша таа на социјалните мрежи еден ден пред втората инаугурација на нејзиниот сопруг. И тука е договорот што го склучи со „Амазон“, наводно вреден околу 40 милиони долари, за документарец што нуди „поглед зад сцената“ на нејзиниот живот како прва дама.

Што би можел да покаже овој документарец? Тешко е да се каже точно. Г-ѓа Трамп чекаше со месеци за да се пресели во Белата куќа минатиот пат. Но, во тоа време, нејзиниот син имал само 10 години и на неговата мајка ѝ требало време да го организира неговото образование и да се пресели во нов град.

Додека таа се навикнуваше на својата нова улога, родителите на Меланија Трамп беа постојано присутни во Белата куќа. Нејзината мајка, Амалија Кнавс, почина во јануари 2024 година. Денес, г-ѓа Трамп поминува многу време со својот татко, Виктор.

Барон Трамп сега има 19 години. Тој ја завршува својата прва година од студиите на Универзитетот во Њујорк и станува сè понезависен. Сепак, Меланија сè уште има заштитничка мајчинска улога во неговиот живот, велат луѓе блиски до неа.

Кога ја прашале каде планира да го поминува поголемиот дел од времето во овој мандат, таа одговорила: „Ќе бидам во Белата куќа, но и во Њујорк и Палм Бич. Но, мојот прв приоритет е да бидам мајка, да бидам прва дама, да бидам сопруга.“

Бидејќи г-ѓа Трамп ретко се гледа или се слуша за неа, моментите кога таа се појавува даваат увид во тоа како таа ја гледа својата улога. Некои од нејзините избори се во согласност со традиционалните должности на првата дама – до одреден степен. Таа стоеше покрај својот сопруг за време на потрагата по велигденски јајца во Белата куќа, но и тоа покрена етички и правни прашања откако беше откриено дека корпоративните спонзори донирале средства.

Режисерите на документарни филмови и холивудските продуценти велат дека 40-те милиони долари, наводно платени за филмот, се далеку повеќе од вообичаената цена на ваквите проекти. Исто како што присуството на г-ѓа Трамп може да биде интересна глетка, така може и нејзиното отсуство. Кога првата група посетители беше водена низ Источното крило, Трамп беше тој што се чинеше дека ги изненади.

„Првата дама работеше напорно за да биде сè совршено“, им рече тој на посетителите. Но, таа не беше таму. За време на првиот мандат на Трамп, Меланија повторно засади и ја реновираше градината со рози во Белата куќа. Сега претседателот планира да го поплочи просторот за да го претвори во тераса за собири на отворено.

Г-ѓа Трамп првично била вознемирена од идејата, според две лица запознаени со прашањето. Подоцна ѝ било гарантирано дека грмушките од рози ќе останат недопрени. Таа, исто така, ја прифати идејата за балска сала што претседателот е решен да ја изгради во Белата куќа – откако ѝ беше кажано дека изградбата нема да се одвива премногу блиску до нејзината резиденција.

Една личност која долго време ја познава Меланија Трамп е Паоло Замполи, поранешен моден агент од Италија кој првпат ја забележал во Милано во 90-тите. Трампови велат дека Замполи ги споил во 1998 година во клубот „Кит Кат“ на Менхетен.

Тој со почит ја нарекува г-ѓа Трамп „дама“. Сите љубопитни прашања за отсуството на дамата од Вашингтон, рече Замполи, се неосновани: „Таа ја сака Белата куќа и ја сака улогата на прва дама“.

Кога американскиот претседател следната недела ќе тргне на патување на Блискиот Исток, не се очекува првата дама да го придружува. Но, таа го придружуваше во Ватикан на погребот на папата Франциско.

Кога се вратија во САД во саботата попладне, беше нејзиниот роденден – наполни 55 години. Претседателот ја бакна во образ. Таа влезе во колата, тој во хеликоптерот „Марин Уан“. И секој си тргна по својот пат.