Македонија
Семејствата на изгубените девојчиња стравувале да не се повтори Србија, тинејџерките им рекле: „Непотребно кренавте паника“

Речиси осум часа траеше агонијата на родителите чии девојчиња се изгубија вчера во Скопје. Беа пронајдени доцна вечерта по 23 часот откако МВР ја потврди информацијата.
Според сведоштво на близок роднина на едно од семејствата на девојчињата, тие дошле на екскурзија за да го посетат Саемот на книгата во главниот град. Се изгубиле околу 16 часот кога последен пат биле видени во друштво на своите соученици во „Веро Џамбо“.
Таму наставничката им кажала дека имаат еден час можност да прошетаат и да разгледаат самостојно и оттогаш на девојчињата им се губи секаква трага, раскажува роднината за „Макфакс“.
Според планираното, тие требало да си заминат од Скопје во 16 часот, групата се собрала во 15.50 часот, но двете ученички не се појавиле на договореното место. Наставничката чекала да се вратат, а по извесно време пријавила и во полиција. Оттогаш почнала потрагата по нив, објаснува нашиот соговорник.
На социјалните мрежи синоќа беа споделувани апели за помош и фотографии од местото каде што последен пат беа видени двете тинејџерки.
Од МВР, по неколкучасовната потрага, потврдија дека децата се пронајдени и се во добра здравствена состојба.
Тоа денеска го дообјасни и нашиот соговорник, кој рече дека девојчињата не биле воопшто исплашени додека талкале низ скопските улици и понесени од желбата да го пронајдат местото на кое требало да се вратат, тие не ни размислиле да прашаат каде да се упатат, туку едноставно само се движеле по улиците.
„Тие си одат нормално, си разговараат меѓу себе, кажуваат дека не биле исплашени“, раскажува роднината.
„Зошто кренавте таква паника, ние имавме пари, ќе си фатевме такси и ќе си дојдевме“, им кажале подоцна девојчињата на загрижените родители.
Соговорникот за „Макфакс“ додава дека децата носеле со себе телефони, кои, како што вели подоцна, биле со испразнета батерија.
„Тоа се деца. Носеа со нив постари телефони и, најверојатно, додека патувале во автобусот, ги користеле по што им се испразнила батеријата и не можеле да се јават. Не може да ги обвините нив затоа што се деца од село, кои никогаш не биле во Скопје и не го познаваат. Тие биле пред ‘Веро Џамбо’, таму наставничката им дала одреден временски период да шетаат самостојно и да разгледаат, но тие, најверојатно, сакале да одат во трговскиот центар ‘Ист гејт’ и потоа заталкале“, раскажува нивниот роднина.
Додава дека децата не биле исплашени и врз нив, како што беше потврдено и од страна на полицијата, нема забележано траги на насилство.
Траума и голем страв, според него, доживеале нивните семејства, кои, кога слушнале за случката, се упатиле кон Скопје.
Тука беа мајките на двете девојчиња, тие тргнаа во 17 часот кон Скопје. Ги пребарувавме сите места на кои ни беше укажано дека децата се видени, бевме многу исплашени. Во тој момент сите имавме само едно во главата: да не се повтори Србија“, раскажува роднината за „Макфакс“.
Децата беа пронајдени синоќа по 23 часот во скопската општина Кисела Вода.
Во тој временски период и родителите, и роднините и наставничката, како и многубројните граѓани, сите биле во исчекување добри вести, раскажува тој.
Вели дека случката била огромен стрес за сите, но олеснително било тоа што настанот завршил добро. Се заблагодари на големиот одѕив на граѓаните, кои на секаков можен начин се обиделе да придонесат во потрагата по изгубените деца.
„Не можам да ја заобиколам ниту огромната помош од страна на полицијата, тие беа во голем број и на секој можен начин се обидуваа да ги пронајдеме девојчињата. Тука беа и огромниот број граѓани, кои споделуваа фотографии од сите можни места на кои биле видени изгубените девојчиња, па дури и ни помагаа да дојдеме до тие места“, раскажува роднината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.