Црна хроника
Обвинителството ќе истражува за четирите лица поврзани со запленетиот кокаин во Грција
Вчера, во текот на попладневните часови, јавен обвинител од Основното јавно обвинителство за гонење организиран криминал и корупција донесе наредба за спроведување истражна постапка против четири лица. Според наводите, во кривичната пријава поднесена од Министерството за внатрешни работи постои основано сомневање дека осомничените сториле кривично дело неовластено производство и пуштање во промет наркотични дроги, психотропни супстанции и прекурсори од чл. 215 ст. 3 в. в. со ст. 1 од КЗ.
Како резултат на повеќемесечна соработка и размената на информации со Директоратот за борба против дрога од Солун, Република Грција, утврдено е дека од почетокот на 2022 година до 8.5.2023 година, осомничените, како членови на меѓународна криминална група, заеднички дејствувајќи со грчки и албански државјани, организирале неовластена набавка и пренесување наркотична дрога кокаин од Еквадор, Јужна Америка, до Солун. Притоа секој од членовите имал своја улога при набавката, пренесувањето и складирањето на наркотичната дрога.
Првоосомничениот, со цел неовластена набавка и пренесување на наркотичната дрога кокаин, на почетокот на 2022 година остварил средба со второосомничениот. На средбата било договорено второосомничениот да биде основач и управител и да регистрира правно лице со дејност увоз-извоз, во кое целокупното работење ќе го извршува првоосомничениот, а на второосомничениот ќе му исплаќа паричен надомест од 50.000 денари месечно.
Второосомничениот, во согласност со договорот, на крајот на јануари 2022 година основал правно лице, кое во јуни истата година се јавува како основач на ново правно лице со неограничени овластувања во внатрешниот и надворешниот промет. На почетокот на оваа година второосомничениот, по инструкции на првоосомничениот, уплатил 19.000 долари на правно лице од Еквадор за набавка на 1.080 пакети банани.
Во договор со првоосомничениот, засега непознати лица во Еквадор ја сместиле наркотичната дрога кокаин во контејнер и заедно со уште два контејнера преку пристаништето Болвар – Еквадор ги испратиле кон пристаништето во Солун. Кога на почетокот на овој месец пратката пристигнала на солунското пристаниште, првоосомничениот за транспорт на контејнерот го ангажирал правното лице, каде што четвртоосомничената била управител. Таа ја изготвила комплетната документација, а третоосомничениот со товарно моторно возило требало да го пренесе контејнерот со наркотичната дрога од пристаништето во Солун до РС Македонија.
На 8.5.2023 година, по претходно добиени инструкции од првоосомничениот, третоосомничениот го презел контејнерот и се упатил во магацин во близина на Солун, каде што го паркирал товарното моторно возило. Од засега непознати лица наркотичната дрога кокаин била претоварена во комбе, кое набргу потоа било запрено од страна на Директоратот за борба против дрога во Солун. Во комбето се пронајдени 104 килограми и 644 грама кокаин, а во спроведената акција во Р. Грција од слобода се лишени седум грчки и тројца албански државјани.
Покрај наредбата за спроведување истражна постапка, јавниот обвинител ценејќи дека постојат околности што го оправдуваат стравот oд опасност од бегство, дека ќе ги скријат, фалсификуваат или уништат трагите на кривичното дело и дека со влијание врз сведоци и соучесници ќе ја попречат истрагата, како и стравот ако се бранат од слобода дека ќе го повторат делото, вчеравечер до судијата на претходна постапка при Основниот кривичен суд Скопје достави предлог за определување мерка притвор за осомничените. Судијата на претходна постапка делумно го прифати предлогот на Обвинителството и на двајца осомничени со решение им определи мерка притвор во траење од 30 дена, а на двајца осомничени им определи мерка куќен притвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Приведено лице од Битола барано со потерница
Денеска во 14.50 часот во Битола, полициски службеници од СВР Битола, врз основа на наредба од Основен суд Битола, го лишија од слобода С.Р.(31) од Битола, кој бил баран со потерница за издржување казна затвор од една година и шест месеци.
Лицето, како што соопшти полицијата, ќе биде спроведено во казнено поправната установа Затвор Битола.
Црна хроника
Малолетници се степале во автобус на ЈСП
Денеска во 11.30 часот во СВР Скопје, М.М.(53) од с.Стајковци, скопско, пријавил дека на 30.09.2024 околу 13.55 часот во автобус на ЈСП на подрачјето на Центар, неговиот малолетен син и двајца негови малолетни другари биле физички нападнати од други малолетници, кои употребиле и тврд предмет.
Според МВР се преземаат мерки за расчистување на случајот.
Црна хроника
Уапсен малолетник: со нож повредил друг малолетник во скопски Карпош
Вчера во 12.00 часот во Скопје, полициски службеници од Полициската станица Карпош лишиле од слобода малолетник од с.Чајлане, скопско, поради сомнение дека околу 07.30 часот на подрачјето на Карпош, по претходна расправија, со остар предмет нападнал малолетник од с.Семениште, скопско, и му нанел убодна рана.
По целосно расчистување и документирање на случајот, ќе биде поднесена соодветна пријава, соопшти полицијата.