Македонија
Пендаровски тврди дека не ја помилувал Катица Јанева, нејзиниот адвокат пет месеци нема добиено одлука
Барањето за помилување на Катица Јанева е одбиено од претседателот Стево Пендаровски, а нејзиниот адвокат и син сè уште нема добиено одлука од Министерството за правда, каде што се поднесуваат барањата. „Макфакс“ праша и во Министерството за правда, а од таму велат дека ги немаат одлуките на претседателот. Од претседателскиот Кабинет посочуваат дека за помилувањето негативно мислење било дадено од Комисијата за помилување, па таква одлука донел и Пендаровски.
„Претседателот го одби барањето за помилување на Катица Јанева. Не се точни информациите дека било позитивно одговорено на барањето од Јанева од страна на Комисијата за помилување, односно и тие дале негативно мислење за нејзиното помилување“, информираат од Кабинетот на Пендаровски за „Макфакс“.
Адвокатот Лазар Јанев за „Макфакс“ посочува дека барањето за помилување го поднеле пред Нова година.
„Немаме добиено никаков одговор. Имаме поднесено барање“, вели кусо Јанев за „Макфакс“.
Одлуките од Пендаровски ги чека и Министерството за правда.
„Министерството за правда сè уште ги нема добиено одлуките за помилување и одбивање за помилување од претседателот Стево Пендаровски“, велат од таму за „Макфакс“.
Јанева побарала помилување како примерен затвореник кој ги почитува правилата на „Идризово“. Таа издржа повеќе од половина од казната, а ѝ остануваат уште три години до истекот. Јанева беше шефица на специјалното јавно обвинителство, потоа осудена во предметот „Рекет“ на седум години затвор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Фестивал за домување во Скопје – во фокус прашања поврзани со домувањето и потребите на младите
Организацијата за домување и станари (ОДС) и Фондацијата Фридрих Еберт – канцеларија Скопје денес го организираат вториот фестивал за домување, со почеток во 12.00 часот во Паркот на франкофонијата во Скопје.
На овој настан ќе се отворат прашањата поврзани со домувањето и потребите на младите, пристапното и достапно домување, родовата перспектива во домувањето, правата на потстанарите, безбедноста и сигурноста во домувањето, одржливото домување, граѓанското учество во донесувањето одлуки, како и за многу други важни теми.
Предвидено е учество на експерти од Шведска, Германија, Белгија и Меѓународната унија на станари, кои во партнерство со ОДС развиваат соработка за унапредување на домувањето во Северна Македонија. На фестивалот поканети се и претставници од Регулаторна комисија за домување, други релевантни институции, граѓански организации, претставници на младински и студентски организации, и други засегнати страни во процесот.
Македонија
Претпладне топло, попладне нестабилно со пороен дожд и грмежи
Времето денес ќе биде сончево и топло со мала до умерена облачност.
Ќе дува слаб до умерен, а во западните делови повремено засилен ветер од југозападен правец. Попладне и кон крајот на денот ќе има локална појава на пороен дожд и грмежи, а ќе има и услови за краткотрајно невреме. Минималната температура ќе биде во интервал од 7 до 15, а максималната ќе достигне од 26 до 33 степени. УВ=7
Во Скопје сончево со мала до умерена облачност, попладне во делови од котлината нестабилно со пороен дожд и грмежи. Минималната температура ќе се спушти до 12, а максималната ќе достигне до 31 степен.
Во следните денови ќе се задржи сончево и топло време со мала до умерена облачност. Ќе дува слаб до умерен, а наместа повремено засилен ветер од јужен и југозападен правец. Во попладневните и вечерните часови ќе има локална појава на пороен дожд и грмежи, а поради големата енергија во атмосферата наместа процесите ќе бидат и во форма на невреме со интензивен пороен дожд, силен ветер и изолирана појава на град.
Македонија
Oсмани и Блинкен разговарале за настаните во Македонија и трите договори
Министерот за надворешни работи во заминување на маргините на неформалниот состанок на НАТО во Прага се сретнал со државниот секретар на САД, Ентони Блинкен, пришто станало збор за актуелните настани во Македонија, пришто Османи укажал на потребата од почитувањето на охридскиот, преспанскиот и договорот за добрососедство со Бугарија.
„Со секретарот Блинкен разговарав за актуелните настани во нашата земја и за неопходноста од продолжување на евроатлантскиот пат на земјата, посветеноста кон функционалната мултиетничка демократија и почитувањето на трите договори. Му се заблагодарив за континуираната поддршка од САД“, напиша Османи на социјалните мрежи.
Претходно деновиве, ДУИ излезе со тврдење дека со тоа што не се дел од власта е прекршен Охридскиот договор. Од ВМРО-ДПМНЕ возвратија дека ако одењето на ДУИ во опозиција е кршење на договорот, тогаш и Али Ахмети го прекрши кога реши да ја изостави ВМРО-ДПМНЕ од владата и не го почитуваше резултатот на изборите во 2016 година кога победи ВМРО-ДПМНЕ, што само значи дека почитувањето на Охридскиот договор нема врска со фактот дали ДУИ е власт или опозиција.