Македонија
Потпишан регионален Меморандум за соработка во областа на односите со јавноста меѓу обвинителствата

Јавниот обвинител на Република Северна Македонија Љубомир Јовески денеска во Херцег Нови, Црна Гора го потпиша Меморандумот за соработка во областа на односите со јавноста меѓу јавните обвинителства од регионот, поддржан преку Проектот за сузбивање тежок криминал на Западен Балкан – ИПА 2019.
Со Меморандумот, изготвен на иницијатива на Врховното државно обвинителство на Црна Гора, се предвидува воспоставување регионална платформа на службите за односи со јавноста, како можност за комуникација и директна размена на информации, но и за координација при информирањето на јавноста за дејствијата кои се однесуваат на прекугранични предмети.
„Градењето на отчетен и одговорен однос кон јавноста е обврска за сите нас. Од тие причини, Јавното обвинителство на Република Северна Македонија континуирано се залага за унапредување на односите со јавноста“, рече Јовески.
Тој оцени дека регионалната платформа во која ќе бидат вклучени службите и лицата задолжени за односите со јавноста дополнително ќе ја олесни размената на информации меѓу обвинителствата и ќе овозможи јакнење на транспарентноста на постапките.
„Соработката меѓу јавните обвинителства во регионот е беспрекорна во многу области. Соочени со фактот дека криминалот веќе не препознава граници и се повеќе излегува од нашите национални рамки, ние неминовно сме упатени на соработка речиси на дневна основа“, додаде тој.
Важноста на соработката во облста на односите со јавноста ја истакнаа и останатите државни обвинителства од регионот, особено со оглед на тоа што и на регионално ниво довербата на јавноста во правосудните институции е ниска.
„Правдата не треба да биде само задоволена, туку треба да биде и видлива“, истална Татјана Беговиќ, в.д. врховна државна обвинителка на Црна Гора.
Словенечкото Врховно државно обвинителство ја поддржува оваа соработка као дел од поддршката на целиот регион во реализација на обврските од поглавјата 23 и 24 од пристапните преговори со ЕУ. „Со Меморандумот се демонстрира практична соработка меѓу обвинителствата од регионот, што е предуслов за вашето идно членство во ЕУ“, нагласи генералниот државен обвинител на Словенија Драго Шкета.
Меморандумот, освен македонското обвинителство, го потпишаа и Врховното државно обвинителство на Црна Гора, Републичкото јавно обвинителство на Република Србија, Врховното државно обвинителство на Република Словенија, Генералното обвинителство на Република Албанија, Обвинителството на Босна и Херцеговина, Федералното обвинителство на Федерацијата Босна и Херцеговина, Републичкото јавно обвинителство на Република Српска и Обвинителството на дистриктот Брчко на Босна и Херцеговина.
Претставници на службите за односи со јавноста во наведените обвинителства ќе ги усогласат модалитетите за функционирање на платформата за соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.