Македонија
Тренчевска: Заедно да обезбедиме што повеќе топли домови за децата без родители и родителска грижа

Министерката за труд и социјална политика, Јованка Тренчевска, заедно со претставничката на УНИЦЕФ во Република Северна Македонија, Патриција ди Џовани, ја промовира новата комуникациска кампања насочена кон мобилизирање нови згрижувачки семејства.
„Во последните неколку години во Република Северна Македонија интензивно се работи на развивање на формата сместување во згрижувачко семејство како вонинституционална форма. Секоја наредна година се стремиме да бидеме што подобри, работиме кон исполнување на најдобрите можности за децата без родители“, објасни Тренчевска во своето обраќање.
Министерката зборуваше и за важноста од поддршката на згрижувачките семејства и истакна дека со реформата на системот за социјална заштита првпат се предвидени центрите за поддршка на згрижувачки семејства што треба да вршат промоција на услугата згрижување во семејство, подготовка, процена и обука на идни згрижувачки, како и следење и давање поддршка на постојните згрижувачки семејства.
Таа се осврна и на кампањата за згрижувачки семејства, која ја спроведе Министерството за труд и социјална политика заедно со УНИЦЕФ во 2018 година.
„Во 2018 година УНИЦЕФ и Министерството за труд и социјална политика спроведоа кампања на национално ниво наменета за мобилизирање нови згрижувачки семејства и подигање на свеста за нивната важност. Кампањата допре до 1 милион луѓе. Со ваков достигнат успех денеска се гордеам што ја промовираме новата комуникациска кампања за згрижувачки семејства со фокус на итни и специјализирани згрижувачки семејства“, рече Тренчевска.
Во моментот на територијата на Република Северна Македонија има 360 згрижувачки семејства, во кои се згрижени 608 деца. Според Тренчевска, спроведувањето на ваквите кампањи треба да придонесе кон зголемување на бројот на згрижувачки семејства. По обраќањето на министерката и на претставничката на УНИЦЕФ, од страна на присутните згрижувачи беа раскажани лични приказни за искуствата и мотивот за приклучување кон кругот на згрижувачките семејства.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
За три дена, 109 повредени од Кочани доставиле барања и предлози на телефонската линија на Владата

109 граѓани за три дена од пуштање на телефонската линија за повредените лица и нивните семејства, која е во директна комуникација со Канцеларијата на Ппретседателот на Владата, ја искористиле можноста и доставиле свои барања и предлози, соопштија од Владата.
Од таму велат дека тоа покажува дека оваа телефонска линија дава резултат и дека Владата е отворена за секаква сугестија и идеја.
„Како Влада преку низа на мерки помагаме за помош на повредените и нивните семејства. Ова е заедничка борба и нема да отстапиме од неа, бидејќи секој граѓанин има право на соодветна здравствена заштита и медицинска нега, токму поради тоа како Влада донесовме одлука за рехабилитација во Пониква на повредените лица кои се во стабилна здравствена состојба, но им е потребна дополнителна медицинска услуга. Тим на лекари од 10 јуни до 20 август во рехабилитацискиот центар Пониква на сите лица ќе им пружат дополнителна медицинска грижа, но и психолошка поддршка“, велат од Владата.
Од таму ги повикуваат и ги охрабруваат сите повредени лица кои се засегнати да се јават на телефонскиот број 070/355-526 и да ги изразат своите барања и потреби.
Македонија
Сончево време, попладне локален дожд

Времето денеска ќе биде сончево со мала до умерена облачност. Попладне ќе има услови за локален развој на нестабилна облачност со пороен дожд и грмежи. Ќе дува слаб ветер од променлив правец. Минималната температура ќе биде во интервал од 12 до 20, а максималната ќе достигне од 26 до 35 степени.
Во Скопје, сончево со мала до умерена облачност. Ќе дува слаб ветер од северен правец. Минималната температура ќе се спушти до 17, а максималната ќе достигне до 34 степени.
Од денеска следува период на стабилно и сончево време со мала до умерена локална облачност. Дневните температури ќе бидат без значителни промени.
Македонија
Мурал од балкански рис исцртан на фасадата на Театар Комедија

Со мурал од балкански рис и мала прослава, Македонското еколошко друштво вчера го прослави Светскиот ден на рисот.
„Конечно најдовме дом за муралот, најдовме и артист кој го нацрта, и најдовме човек кој има визија и кој е отворен за соработка, а тоа е директорот на Театар Комедија – Дарко Спасов. Целта ни е со овој мурал да ја подигнеме јавната свест, не само на рурално туку и на урбано ниво. Кога работите ќе згуснат ни треба секаква поддршка, од секоја популација“, изјави раководителот на Програмата за закрепнување на балканскиот рис, Диме Меловски.
Тој се заблагодари на поддршката од Театар Комедија и директорот Дарко Спасов.
„Велат исти птици во исто јато летаат“, вели директорот Спасов, кој го изрази своето задоволство од соработката со Македонското еколошко друштво.
Освен муралот на фасадата на Театар Комедија, пред објектот поставена е и инфо табла со основните податоци за рисот, како и QR код кој води до новата интернет страница посветена на балканскиот рис: balkanlynx.com.
По поздравните обраќања, присутните членови и соработници на МЕД, се упатија кон Бистро Комедија каде што во неформална атмосфера имаа прилика да поразговараат за досегашните постигнувања, но и да разменат идеи и предлози за идни активности.