Свет
(Видео) Војници ги хранеле децата: објавено ново видео од децата пронајдени во џунглата еден месец по авионската несреќа
Колумбискиот јавен сервис објави нова снимка од четирите деца, кои беа пронајдени во џунглата пет недели по авионската несреќа.
На видеото се гледа како колумбиските војници ги хранат децата.
Тие се на возраст од 13, 9, 4 години и 11-месечно бебе, патувале со мајка им од амазонското село Аракуара до градот Сан Хозе дел Гуавијаре кога авионот „цесна“, во кој се наоѓале, се урна откога пилотот пријавил дефект на моторот. Несреќата се случи рано утрото на 1 мај.
Децата, кои се членови на домородната заедница Хуито, беа пронајдени од воено куче во петокот по поминат повеќе од еден месец во област полна со змии, комарци и други животни.
Мајката и уште двајца од авионот загинале, а децата преживеале во џунглата јадејќи овошје и семки. Тие беа пронајдени во мало чистилиште во џунглата и однесени во болница во Богота, каде што ги посети претседателот на земјата, Густаво Петро.
Лекарите соопштија дека децата добиле каснувања од инсекти и полесни повреди, но дека се во стабилна состојба. Вчера, семејството на децата ги откри последните моменти на мајка им и советот што им го дала за да се спасат по авионската несреќа во амазонската прашума.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Зеленски се обрати до нацијата: Се браниме кај Харков, во Доњецк е исклучително тешко
Украинските сили продолжуваат со одбранбените операции околу северните погранични населби во регионот Харков, изјави украинскиот претседател, Володимир Зеленски во вечерното обраќање до нацијата.
„Нашите сили извршуваат контранапади и ја штитат украинската територија веќе втор ден“, рече Зеленски.
Украинската војска претходно соопшти дека руските сили се задржани во пограничните села во „сивата зона“, додека Русија објави дека зазела пет локални населби.
Ситуацијата, рече Зеленски, е особено напната во регионот на Доњецк, поточно во правец на Покровское, кај селата Семенивка и Нетаилова.
Зеленски додаде дека попречувањето на руските офанзивни акции сега е задача број еден.
Свет
Макрон: Се надевам дека Французите нема да мора да се борат во Украина
Францускиот претседател Емануел Макрон уште еднаш не ја исклучи можноста за интервенција на француската армија во Украина, но истовремено изрази надеж дека неговата земја нема да мора да војува и да испраќа свои војници во војна.
Како што пренесува „Украинска правда“, Емануел Макрон рече дека во одреден момент Европејците треба да бидат подготвени да ја спречат Русија да напредува понатаму во Украина, но тој најискрено се надева дека нема да мора да се борат.
„Ако сакаме мир, мораме да го заштитиме. Затоа треба да се вооружиме и затоа треба да бидеме средство за одвраќање и убедување. Ако одите предалеку и ги загрозувате нашите интереси и нашата безбедност, тогаш јас не исклучувам интервенци во конфликтот“, рече Макрон.
Тој нагласи дека украинскиот суверенитет и територијалниот интегритет се под закана, но истовремено владеењето на правото и општите правила се под закана.
„И ако оставиме сè како што е во Украина, тогаш ќе победи правото на посилниот. И не можеме да бидеме сигурни бидејќи тоа се случува на 1.500 километри. Значи, во Украина нашата иднина и нашата безбедност се во прашање“, заклучи францускиот претседател.
Свет
Големи пропалестински протести во Малме пред евровизиското финале, се бара исклучување на Израел од натпреварот
Денеска во центарот на Малме, Шведска се одржува масовен пропалестински протест поради учеството на Израел на овогодинешното натпреварување.
Голем број луѓе почнаа да се собираат на главниот плоштад во Малме од 16 часот.
Протестот почна на главниот плоштад во Малме, а насобраните од ова место се упатија кон арената Малме, каде што се одржува Евровизија.
Во четвртокот, кога претставничката на Израел настапи во втората полуфинална вечер, на улиците на Малме протестираа повеќе од 30.000 луѓе, според проценките на шведската полиција.
Барањата се исти – бојкот на Евровизија и исклучување на Израел од натпреварувањето.