Македонија
Ковачевски: Со санација на делницата Младо Нагоричане – Куманово инвестираме во локалниот развој
Претседателот на Владата на Република Северна Македонија, Димитар Ковачевски денеска се сретна со жителите на Општина Нагоричане, каде е реконструирана патната делница Младо Нагоричане – Куманово.
Заедно со премиерот Ковачевски присутни беа и министерот за транспорт и врски Благој Бочварски, директорот на Јавното претпријатие за државни патишта Ејуп Рустеми, директорот на Јавното претпријатие Македонија Пат, Костадин Ацевски, како и заменик-градоначалникот на Старо Нагоричане, Бобан Цветановски.
Станува збор за надградба и поправка на патната делница Младо Нагоричане – Куманово. Инвеститор на делницата е Јавното претпријатие за државни патишта, а изведувач Јавното претпријатие Македонија Пат.
„Надградбата и санацијата на овој патен правец во должина од над три километри е инвестиција од над 292 илјади евра. Ги поврзавме жителите од околните места, како што го направивме тоа и со санацијата на патната делница Куманово – Старо Нагоричане во должина од три километри, во вредност од близу 570 илјади евра. Со овие инвестиции го заживуваме овој регион. Граѓаните нема веќе да патуваат небезбедно и подолго по делници стари со децении. Животот и секојдневието ќе им се олесни и ќе имаат побезбедно патување“, истакна премиерот Ковачевски за патната делница Младо Нагоричане – Куманово.
Притоа, премиерот Ковачевски го посочи и магистралниот пат Куманово – Страцин, инвестиција вредна 12 милиони евра, којашто е важен дел од Коридорот 8.
Оваа патна делница, како што нагласи премиерот, се рехабилитира за прв пат после повеќе од 32 години.
Премиерот Ковачевски додаде дека Владата се грижи за навремена и квалитетна изработка на модерни патишта како на регионално така и на локално ниво, што е и причината зошто денеска е во посета на овој регион со цел да разговара со жителите од овој крај за да ги слушне нивните мислења за сработеното.
Нагласувајќи ги инвестициите во различни сфери, премиерот рече дека Владата реализира капитални инфраструктурни проекти во патната инфраструктура.
Тој порача дека Владата секогаш ќе остане партнер на граѓаните, без разлика дали доаѓаат од урбаните или од руралните општини во државата.
Премиерот Ковачевски на средбата со жителите посочи дека ваквите инвестиции се важни не само за подобро поврзување со околните градови, туку и за локалниот развој.
На средбата со жителите од Младо Нагоричане се разговараше и за другите инфраструктурни проекти во овој регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Без струја корисници од село Долно Лисиче
Без струја од 08:30 до 15 часот ќе бидат корисници од село Долно Лисиче (објекти на патот кон Драчево и ул.„10“), најави Регионалниот центар за управување со кризи (РЦУК) Скопје.
Прекинот е поради планирани технички интервенции во електродистрибутивната мрежа.
Македонија
Времето променливо облачно со сончеви периоди
Времето денес ќе биде променливо облачно со сончеви периоди.
Попладне претежно во западните и југоисточните делови од земјата ќе има локална појава на краткотраен пороен дожд и услови за ретки грмежи. Ќе дува слаб до умерен ветер од северен правец. Минималната температура ќе биде во интервал од 4 до 12, а максималната ќе достигне од 19 до 26 степени.
Во Скопје променливо облачно време со сончеви периоди. Ќе дува слаб до умерен ветер од северен правец. Минималната температура ќе се спушти до 8, а максималната ќе достигне до 25 степени.
Во следните денови времето ќе биде променливо облачно со сончеви периоди. Во попладневните часови ќе има локална појава на нестабилна облачност со пороен дожд и грмежи, особено во вторник, кога дневните температури ќе опаднат за неколку степени.
Македонија
Пендаровски ја напушти Вила Водно, им се заблагодари на граѓаните и соработниците
Експретседателот на државата, Стево Пендаровски, чијшто мандат заврши денес, преку социјалните мрежи упати благодарност до граѓаните и своите соработници.
„Благодарност до сите граѓани за укажаната доверба и на сите соработници со кои заеднички работевме во изминатите пет години“, напиша Пендаровски.
Претходно тој во Вила Водно ја пречека новата претседателка Гордана Силјановска-Давкова, пришто свечено и’ ја предаде функцијата, а и’ ja честита и победата.
Пендаровски беше петтиот претседател од осамостојувањето на државата, а функцијата ја презеде во 2019 година од дотогашниот претседател, Ѓорге Иванов.
По престанокот на функцијата, на секој претседател му следат низа на доживотни бенефиции. Според Законот за правата на претседателот и неговото семејство по престанок на функцијата, претседателот има право на пензија чиј износ е еднаков со износот на платата што ја прима претседателот на државата, има право на канцелариски простор и најмногу три соработници. Има и право на лично обезбедување, како и право на користење службено возило и возач.
Пендаровски неодамна изјави дека по завршувањето на мандатот нема да бара претседателска пензија, ниту пак средства за отворање на канцеларија, туку ќе се врати на работното место професор.