Регион
Уште една трагедија во Хрватска: се удави четиригодишно дете во реката Драва
Четиригодишно дете се удави денеска околу 14 часот во реката Драва во Осиек. Во текот на играта детето паднало во реката и исчезнало. Мајката видела како реката го исфрла телото на површината уште два пати пред да исчезне.
Очевидец кој го видел немилиот настан и се обидел да помогне, раскажува за „Глас Славоније“.
„Ја чистев терасата и слушнав како некој вреска, слушав крик по крик и првата мисла беше дека некој некого силува на другата страна. Врисоците беа многу гласни, речиси нечовечки и не престануваа, истрачав и наидиов на жена која беше во вода речиси до вратот“, раскажал Вук Огњеновиќ, кој живее недалеку од местото на несреќата.
„Од шок рече нешто и не можев да ја разберам. Претпоставував дека е дете, иако се надевав дека не е. Таа ми кажуваше и покажуваше: „Ене, таму, таму!“, а јас и реков дека ќе одам малку низводно и ќе тргнам кон неа. Таа ми велеше: „Не, не, не! Таму го видов сега! – додаде Огњеновиќ.
„Мислев дека го барам детето десет минути, но подоцна ми рекоа дека го барам повеќе од еден час – изјави Огњеновиќ.
Тој додаде дека во еден момент и самиот се заплеткал под понтонот и морал да се откаже од потрагата. Полициски нуркачи пристигнаа на местото на настанот и ја пребаруваа околината во следните часови. Околу 16 часот и 45 минути недалеку од местото на исчезнувањето, го пронашле телото.
Спасувачките екипи ги предупредиле сите кои со пловни објекти се движат по реката да се движат што подалеку од десниот брег на реката за да се олесни потрагата. Полицијата ќе спроведе увид за утврдување на сите околности на настанот. Мајката на детето со возило на брза помош била пренесена во Клиничката болница Осиек.
Претходно денеска исто така во Хрватска почина петгодишно дете. Рано утрото во Медулин била повикана Брза помош откако на детето му се слошило. Но и покрај напорите на лекарите, детето починало.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Земјотрес го погоди Сараево
Послаб земјотрес го потресе Сараево изутрината.
Како што соопшти Федералниот хидрометеоролошки завод во Сараево, во Центарот за сеизмологија е регистриран во 8.04 часот слаб земјотрес во областа на главниот град на Босна и Херцеговина.
Магнитудата на земјотресот била 2,2 степена според Рихтеровата скала, а интензитетот во епицентарот бил III степен според Меркалиевата скала.
Многубројни жители на Сараево пријавиле тресење на земјата на услугата EMSC.
„Кратко, но силно“, „Кратко, татнеж“, „Само мал трепет и силен звук“, „Кратко, но жестоко“, изјавија тие во своите коментари.
Регион
Ердоган ги спореди израелските напади во Газа со геноцидот во Сребреница
Турскиот претседател Реџеп Тајип Ердоган денеска по разговорот со претседавачот на Претседателството на БиХ, Денис Беќировиќ изјави дека Израел ќе одговара за злосторствата во Газа, споредувајќи ги со геноцидот во Сребреница.
„За жал, денес во Газа и на окупираните палестински територии сме сведоци на сличен масакр што беше извршен пред очите на целиот свет во Босна и Херцеговина во 1990-тите“, рече Ердоган, кој денеска го прими Беќировиќ во Истанбул.
Тој додаде дека Израел ќе биде кривично гонет за убиствата на повеќе од 41.000 Палестинци во Газа, вклучително и турскиот активист Ајсенур Езги Ејги, кој беше убиен на Западниот Брег минатата недела.
„Сторителите на геноцидот во Газа, како оние во Сребреница во 1995 година, ќе одговараат пред меѓународните судови“, рече Ердоган.
Тој потсети дека Турција ја спонзорирала Резолуцијата на ОН за осуда на геноцидот во Сребреница и дека таа земја се залага за стабилноста на Босна и Херцеговина. Тој ги повика властите во БиХ да се приклучат во борбата против движењето ФЕТО, сметајќи дека таа организација е терористичка.
Фето е движење на Фетулах Ѓулен, поранешен сојузник, а сега противник на претседателот Ердоган, кого го смета за виновен за обидот за воен удар во јули 2016 година. Беќировиќ рече дека пријателството меѓу Босна и Херцеговина и Турција е нераскинливо.
„Република Турција е докажан пријател на Босна и Херцеговина и една од најсилните членки на НАТО алијансата и затоа, меѓу другото, нејзината поддршка за Босна и Херцеговина е исклучително важна“, нагласи Беќировиќ.
Регион
Двe лица се удавија во Будва и Бар, холандски турист спаси жена и дете од разбрануваното море
Две лица се удавија во петокот вечерта во Будва и Бар, јавија денеска црногорските медиуми, повикувајќи се на полициски извори.
Едно лице се удавило во градот Дробни Пијесак кај Будва, соопшти Управата за поморска безбедност и управување со пристаништа (УПСУЛ), пренесува порталот ЦДМ. Удавеникот, како што се наведува во соопштението, бил извлечен од спасувачкиот чамец САР-5 заедно со екипажот на УПСУЛ и членови на Секторот за гранична полиција.
Претходно синоќа се удави и украинскиот државјанин О.Ј. (36) во морето кај Бар, пренесува порталот Бар инфо. Спасени биле сопругата и детето.
„Семејството на давеникот е спасено, благодарение на холандски државјанин кој скокнал во брановите за да им помогне, а потоа биле испратени во Општата болница во Бар за медицинска помош“, изјавија од полицијата за Радио Бар и Бар Инфо.
УПСУЛ предупреди дека е на сила црвен метеоролошки аларм и предупредување за многу силни ветрови кои создаваат големи бранови и силни струи.
И покрај ова предупредување, на плажите беа забележани капачи кои влегуваат во морето и на тој начин ги ризикуваат своите животи, но и животите на припадниците на службите кои ги спасуваат на многу турбулентен, карпест и непристапен терен.
Вакви и слични ситуации се повторуваат со години и, за жал, резултираат со непотребна загуба на човечки животи, а УПСУЛ ги повикува капачите да бидат многу внимателни во наредните денови за да се избегнат непотребни несреќи и давење, се заклучува во соопштението.
Од УПСУЛ потсетуваат дека граѓаните и туристите можат да се јават и да пријават каква било ризична ситуација на море директно на бесплатниот број 129 или преку мобилната апликација safesea.me.