Македонија
Сите „борби“ на Арсовска – од министер до метач
„Време е да се одбере – празни ветувања или способни и исполнителни личности кои нема да потпаднат под политички притисоци и нема да се откажат од својата визија“ – рече Данела Арсовска кога ја поднесе својата кандидатура за градоначалник на град Скопје. Таа го победи својот против-кандидат, Петре Шилегов на локалните избори во 2021 со речиси 30 илјади гласови плус.
Набрзо по стапувањето на функцијата, одржа брифинг со новинарите на кој рече дека постојано е мета на закани. Се пожали дека одредени луѓе ѝ се закануваат за да им бидат простени криминали и злоупотреби, но не кажа кои се тие. На прашањето дали пријавила во полиција, таа одговори: „Каде да пријавам? Таму каде што треба да пријавам јас сум си пријавила. Ако треба да пријавувам закани, секој ден, по цел ден ќе треба да бидам во полиција“.
11 месеци соработуваше со градоначалниците од општините, како и директорите од ВМРО-ДПМНЕ. Заедно одеа на започнување на нови проекти, реконструкција на стари или увид во веќе започнати. Лидерот на ВМРО-ДПМНЕ, Мицкоски, дури ветуваше проекти во нејзино име. Па така, најавуваше дека биле во преговори со светски компании за набавка на 100 електрични автобуси за Скопје, а една од компаниите сакала да отвори и фабрика за производство на автобуси во главниот град.
Големиот пресврт се случи на 12 септември лани, кога Арсовска го разреши директорот на Водовод, Златко Перински, поради, како што рече, самоволие и несоодветно постапување за милионски тендер за пречистителната станица во Скопје. По 3 дена на седницата за советнички прашања скопската градоначалничка и советниците кои се поддржуваа и фалеа, сега се караа и навредуваа. Се обвинуваа меѓусебно за провизии од тендерот од 136 милиони евра. „Кога ви го фатив рачето во медот не ви чинам. На вашиот шпицен градоначалник сакам да му кажам да се бореше против власта и штетните договори ќе ја спасеше Македонија. Нека не ми се заканува, нека дојде”, рече Арсовска.
По разрешувањето на Перински, сите директори од ВМРО-ДПМНЕ самите си поднесоа оставки од функциите, а Данела стави кадри од ГРОМ, припадници на „огнените“ и други политички партии. Фотелјата ја напушти и заменик-градоначалничката на Град Скопје, Бујаре Абази, од Алијанса за Албанците, а на нејзино место дојде Александар Трајановски кој на секое излегување на говорница ги навредува советниците доколку упатат критика кон Арсовска.
„Драма“ имаше и со претседателот на советот, Трајко Славески. Откако му го укина копчето за вклучување и исклучување на тонот од говорница, тој на сите им нареди да зборуваат од место. Потоа Арсовска со поставен подвижен микрофон отиде на говорницата и му рече на Славески дека е Хитлер и крадец. „Господине Хитлер не ви доликува ова што го правите. Вие го кршите деловникот и сте крадец. Немате никаков интегритет”, рече Арсовска. Тој и рече да седи во „магарешка клупа“ и ја прекина седницата.
Оттогаш Арсовска ретко се појавува на седниците на Град Скопје, а кога доаѓа, од говорница редовно употребува метафори и се кара со присутните. На последната седница на која беше дојдена, на советничката од СДСМ, Љубица Јанчева и рече „вие ако се уличарка, ние не мора овде да ве трпиме“, а за Мицкоски рече дека е „рекет број 1“.
Градоначалничката се искара и со претставниците на Асоцијацијата на архитекти на Македонија, проектантите на Универзална сала и со министерката за култура Бисера Костадиновска-Стојчевска. На прес-конференцијата на која требаше да се бара чаре за Универзална, при доаѓањето, на поздравот од министерката Костадиновска-Стојчевска за добредојде, Арсовска ѝ рече „За разлика од вас на нас не ни е страв да дојдеме на покана“. Објектот на Универзална се распаѓа седум години. Реконструкцијата ја започна Шилегов и требаше да оди во две фази, а за првата Владата му даде на Градот 2 милиони евра. Градежните работи ги стопираше Данела бидејќи проектот бил небезбеден, а советниците не дадоа согласност објектот да се предаде на Владата за да го санира.
Арсовска не сакаше да го преземе парното во Скопје. Откако регулаторната комисија ја одзеде лиценцата на БЕГ, на распишаниот оглас за преземање на топловодната мрежа не се пријави „Градски енергетски системи“ (ГЕС) – акционерско друштво кое го формираше претходниот градоначалник токму за оваа намена. Парното го преземе државната ЕСМ, а министерот за економија, Крешник Бектеши, рече дека Арсовска нема капацитет да го реши проблемот. Таа, пак, му возврати: „Ако треба да бидам и министер за економија, Бектеши нека си даде оставка. Да потсетам, министерот кој се сликаше со дониран зејтин кој не можеше сам да го обезбеди, нема право да зборува за туѓа способност“. АД ГЕС лани во август остана без вработени бидејќи сите три месеци не земале плата. Се очекува на следниот состанок акционерите да донесат одлука за престанок со работа.
Арсовска се скара и со приватните превозници кои 7 месеци не возеа поради долг од 1,5 милиони евра. На почетокот, Арсовска не го признаваше долгот, а бидејќи приватниците не возеа им ги раскина договорите. Директорите на „Слобода превоз“ и „Макескпрес“ не ги примаше на преговори, па тие со денови ги блокираа трите главни крстосници во Скопје. Тогаш Ленин Јовановски, кој и даваше поддршка за време на целата камапања рече: Бев измамен од човек кој што многу перфидно умее да излаже, да заведе и да ти даде лажна надеж. Признавам дека сум изманипулиран и тоа на начин кој им поминува на психопатите. Арсовска бегаше од медиумите со недели, а откако се појави во јавноста рече „Градот Скопје може и без приватни превозници.“ Потоа формирани беа три нови фирми. Со новите директори таа се договори и откако долгот им го исплати тие се пријавија на огласите и повторно со своите стари и нееколошки автобуси сообраќаат низ скопските булевари.
На еден ден прекинаа да возат и автобусите на ЈСП затоа што им доцнеше една плата. Тогаш беше свикана итна седница на која се пренаменија средства и платите на возачите им беа префрлени.
Веќе следниот ден, синдикатот на Водовод најави штрајк затоа што директорот им се заканувал на вработените и им вршел мобинг и притисоци. Најавија штрајк доколку не биде сменет, односно се заканија дека нема да ги поправаат дефектите. Додека течеше помирувачкиот процес, Арсовска го разреши директорот.
Таа го разреши и директорот на МКЦ, Богоев, и го обвини дека ангажирал противзаконски 250 лица како хоноррарци, од кои повеќето биле блиски до ВМРО-ДПМНЕ. „Има и над 90 договори за времено ангажирање на шанкери на кои им биле исплаќани од 300 до 750 евра на месец“, изјави Арсовска. На негово место постави детектив, а Управниот суд пресуди дека назначувањето било незаконско. „Лицето Никола Алексов никогаш не било вработено во Јавната установа Младински културен центар- Скопје што значи дека не бил од редот на вработените за да може да биде избран за вршител на должност директор.“, рекоа од Управен.
Данела се скара и со деканот на градежен, Горан Марковски, кој рече дека мостот Беласица е сериозно оштетен и ќе треба многу време за да се поправи и да биде безбден за користење. „Тој го видел мостот од 50 метри мостот, болен од ковид“, рече Арсовска минатиот месец и најави дека следната недела мостот ќе биде пуштен. Сепак, најоптимистичките најави се дека по Беласица ќе се вози од есен.
Последни во низата се вработените во Комуналец, кои Арсовска ги нарече мафијаши. Од претрпијатието се избракани 70-ина лица за една недела бидејќи земале плата, а не доаѓале на работа. „Откривме луѓе што се во Германија пет години, а примале плата. Некој си ужива и чека џепарлак да му дојде секој први, во месецот, од тоа што е пријавен во некое јавно претпријатие, рече таа. На прес-конференцијата не кажа имиња, оти тоа било личен податок, но документи поднела до МВР и јавното обвинителство. Вчера и од двете институции демантираа дека е поднесена таква пријава.
На последната анкета на ИРИ, само 1% од граѓаните рекле дека се задоволни во целост од работата на скопската градоначалничка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Спасовски: Мицкоски го смени ставот за Преспанскиот договор, а програмата на Владата е далеку од ветувањата
Програмата на Владата и концептите на партиите кои се дел од мнозинството се различни од ветувањата коишто беа дадени пред граѓаните, а прашањата кои беа отворени во минатото на манипулативен начин и се наметнуваа во јавноста ги нема воопшто, рече пратеникот на СДСМ и координатор на пратеничката група Оливер Спасовски денеска во македонското Собрание во расправата за избор на Влада.
„Првиот основен приоритет, нашето членство во Европската унија во програмата е со сосема различен концепт од оној што го застапуваше како опозиција во изминатите 8 години и во времето на предизборието, како што е почитувањето на Преспанскиот договор, Договорот со Бугарија и Преговарачката рамка. Факт е дека нема ниту збор за укинување на Преспанскиот договор, ниту збор за укинување на Договорот со Бугарија и факт е дека нема план за тоа како ќе ја промените преговарачката рамка за којашто зборувавте со години наназад дека нема да ја прифатите“, рече Спасовски.
Деновиве се гледа и промената на личниот став на Мицкоски за Преспанскиот договор, потенцираше Спасовски.
„Ако ги погледнете изјавите од пред изборите, во коишто најавувате дека нема да го користите уставното име или дека нема да ја користите придавката денеска најавивте дека тоа ќе го направите. Тоа ли е новиот концепт? Ако е така чесно е да биде тоа кажано пред граѓаните. Затоа што едно е пред граѓаните да речете дури и мандатот ако треба нека ми го одземат јас нема да ја користам придавката на името а денеска овде пред македонското Собрание зборувате како мандатар најавувате почитување на Преспанскиот договор и уставното име на државата“, рече Спасовски.
Многу од проектите коишто се дел од Програмата немаат рокови за реализација, нема финансиска конструкција како и на кој начин ќе се дојде до реализација, а не се зборува ништо ниту за задолжувањето од 1 милијарда коешто се најавуваше во јавноста, дополни Спасовски.
„Има дел во програмата коишто сте ги ставиле како големи достигнувања а веќе постојат и функционираат. Тоа зборува за една програма за работа којашто е напишана со цел само колку да кажете дека нешто ќе правите во иднина. На пример во делот на безбедноста и одбраната сте навеле дека ќе воспоставите систем за видео надзор на граничните премини. А таков систем функционира веќе 30 години на сите гранични премини. И тоа не е еден систем туку два, и на Царинската управа и на МВР“, рече Спасовски.
Иако се најавуваше многу во делот на инфраструктурата освен доградба и довршување на проектите кои веќе се започнати, нема нови проекти, додаде тој.
-Дури и толку напаѓаниот од Ваша страна проект за коридорите, кој се работи од страна на Бехтен и Енка, тој договор за којшто велевте дека е криминален гледам дека со задоволство е прифатен и ставен во програмата на Владата, рече Спасовски.
Македонија
Мицкоски од Собранието: Државата е во клиничка смрт, не барам сто дена меден месец туку најавувам инвестиции и реформи
Од она што го дознаваме за состојбите во државата, ситуацијата е рамна на клиничка смрт во повеќе клучни области, девастирана до мера на непрепознатливост каде институциите се доведени пред буквална пропаст и незапаметена нефункционалност. И за се ќе биде известена јавноста, изјави претседателот на ВМРО-ДПМНЕ, Христијан Мицкоски во експозето како мандатар за новата влада на денешната собраниска седница.
Мицкоски додаде дека ова не го говори како изговор туку дека одлучно ќе се одговори, затоа што оваа генерација нема опција за неуспех и заедно ќе мора да направиме големи чекори напред.
– И затоа нема да барам никакви 100 дена меден месец, туку најавувам фуриозен почеток на проекти и нови инвестиции веднаш. Впрочем немавме ниту една секунда изминатиов период. Веќе во вторник најавувам нова инвестиција над 400 милиони евра, потоа ќе ги намалиме даноците, покачиме пензиите, ќе обезбедиме пари за капитални проекти. Доста времето се трошеше на измислени теми, и етнички прашања, време е да се засукаат ракавите решат проблемите и ова да биде влада на економија и развој. Тоа го сакаат сите, истакна Мицкоски.
Мицкоски потенцираше дека носечка цел е да се обнови довербата во институциите на државна власт, да се елиминира корупцијата и да се обезбеди владеење на правото.
Централно место во нашата животна мисија е економското заживување. Ќе започнеме нов силен циклус на економски раст, поттикнат од стабилни јавни финансии. Поддршка за конкурентен приватен сектор и значајни инвестиции во иновациите и во информатичката технологија. Нашата цел е да создадеме продуктивни и добро платени работни места, да ја намалиме невработеноста и да поттикнеме средина каде што бизнисите можат да се развиваат, рече Мицкоски.
Македонија
Мицкоски: Денес е историски ден, време е да ги засукаме ракавите
Денес е историски ден. Почнува собраниската дебата која ќе стави крај на периодот на неработење, криминал, лоши вредности и разочарувања, напиша на социјалните мрежи лидерот на ВМРО-ДПМНЕ, Христијан Мицкоски, пред почетокот на седницата за избор на влада.
„Со изборот на новата реформска влада, конечно започнува ново поглавје за нашата земја. Нашите граѓани во минатото се соочуваа со многу предизвици, но секогаш беа лојални кон државата и правеа се’ за таа да биде слободна, независна и просперитетна. Иако имаше разочарувања и предизвици, граѓаните опстојуваа и гордо ги поднесуваа сите случувања“, порача Мицкоски.
Како што додаде, сега е време Македонија да направи повеќе за секој граѓанин. Секој Македонец, Албанец, Турчин, Србин, Ром, Влав, Бошњак и сите останати кои вложија се’ за својата татковина.
Нагласи дека е време да се засукаат ракавите и да ги решат проблемите и повика на единство и заедничка работа.