Црна хроника
Вработена во МВР наплаќала на рака за издавање лични документи, присвоила 600.000 денари
Вработена во МВР, која работела во одделот за издавање лични карти, на граѓаните им барала пари на рака наместо да им наплаќа со картичка.
Денеска (17.7.2023), Одделот за внатрешна контрола, криминалистички истраги и професионални стандарди до надлежното Јавно обвинителство поднесе кривична пријава против Н. Л., вработена во отсекот за управни работи во Штип за Виница, поради постоење основи на сомнение дека сторила кривично дело проневера во службата по член 354 став 5 вв став 1 и 2 вв чл. 45 од Кривичниот законик.
Имено, Н. Л. во својство на службено лице што врши работи од јавен интерес, со намера за себе да прибави противправна имотна корист, во периодот од јануари до мај 2023 година, во повеќе наврати присвоила пари доверени во службата, така што барала од граѓаните – баратели на услуги за издавање лични документи, да ѝ дадат пари на рака при поднесување барање за издавање патна исправа и лична карта под изговор дека можноста за плаќање на ПОС- терминалот со платежна картичка во моментот не е во функција. Притоа таа го искористувала нивното непознавање на законските прописи во МВР, а доверените пари си ги присвојувала стекнувајќи се со противправна имотна корист од речиси 600.000 денари на штета на буџетот на РСМ.
Воедно, Одделот за внатрешна контрола, криминалистички истраги и професионални стандарди ќе поведе постапка за утврдување дисциплинска одговорност, а вработената ќе биде суспендирана од работното место до завршување на дисциплинската постапка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Нормализиран сообраќајот на патот Битола-Прилеп по сообраќајната несреќа
Од 19:35 часот сообраќајот на магистралниот пат Битола-Прилеп е нормализиран по сообраќајната несреќа, информира АМСМ.
Несреќата беше пријавена во 15 часот и 48 минути во близина на ѓубриштето, а сообраќајот се пренасочуваше по стариот пат.
Засега нема информации за состојбата на учесниците во несреќата.
Црна хроника
Масовна тепачка пред маркет во Брвеница, шестмина уапсени
Вчера во 18.45 часот во Тетово, на патот за тетовска Брвеница, полициски службеници од СВР Тетово ги лишиле од слобода С.А.(49) и С.Л.(19) од тетовска Мала Речица, Г.Ц.(52) од Тетово и М.А.(28) и Ф.М.(44), двајцата од Република Косово, а во 19.40 часот во Клиничка болница Тетово и С.Р.(29) од Мала Речица, кои околу 18.30 часот пред маркет на улица „Брвенечка кривина“, по вербална расправија, започнале физичка пресметка во која користеле и тврди предмети, извести МВР.
„Според пријавеното, во текот на пресметката било оштетено и патничко возило „БМВ“ со косовски национални ознаки, управувано од 44-годишната Ф.М.“, соопшти МВР.
Тие се задржани во полициска станица за понатамошна постапка и против сите инволвирани лица ќе следува соодветен поднесок.
Црна хроника
Се преврте кајак во Охридското езеро, двајца малолетници спасени со полициски чамец
Денеска во 09.30 часот во Полициската станица за граничен надзор „Охридско Езеро“ пријавено е дека во водите на Охридското Езеро, на плажата „Бафало бич“, се превртел кајак, сопственост на кајак клуб од Охрид во кој имало две малолетни лица, извести СВР Охрид.
По добиената пријава, полициски службеници од Езерската полиција со пловен објект се упатија на посоченото место и во водите на езерото, на околу 100 метри од плажата, забележани се двете малолетни лица кои на себе имаа појаси за спасување. Тие со полицискиот чамец се префрлени во полициската станица, каде им е укажана прва помош, соопшти СВР Охрид.