Родилката Викторија Крстевска од Битола, чие бебе почина кусо по раѓањето во битолската болница пред три месеци, јавно ѝ даде поддршка на 21-годишната родилка, која вчера, во истата болница, роди мртво бебе. Крстевска уште еднаш побара одговорност за случувањата во болницата и повика на заедништво за да се стави крај на таквите случувања во болницата.

Заедно со повикот и поддршката Крстевска објави и фотографија, на која се гледа труднички стомак со модринки и гребаници.

„Да, ова беше моето ‘ненасилно’ породување. Доста е! Нема да молчиме!“, напиша Крстевска на „Фејсбук“.

Таа е згрозена од речникот на болницата, од каде што изјавија дека мртвороденото бебе на 21-годишната родилка било извадено со царски рез, немалтретирано.

Во април годинава во болницата во Битола лекарите ја породија Викторија, но бебето почина набргу по раѓањето. Вонредниот инспекциски надзор на Државниот здравствен и санитарен инспекторат утврди недостатоци при третманот на родилката, но од административна природа, за што најавени беа парични и прекршочни казни. По смртта на новороденчето, тогашниот директор на болницата во Битола, доктор Александар Обедниковски, си поднесе оставка од морални причини.

Адвокатот на Крстевска, Јанаки Митровски, пред две недели објави дека лекарите што ја породиле сакаат вината да ја префрлат на гинекологот што ѝ ја водел бременоста и не учествувал во породувањето. Адвокатот се сомнева дека сестрите што давале искази во Обвинителството се подготвувани оти дале ист исказ, од збор до збор. Единственото нешто од кое е задоволен е коректната вонредна инспекција на Министерството за здравство, каде што се детектирани серија недостатоци, грешки, недостиг на опрема или нејзина неисправност, како и непочитување протоколи и процедури од страна на болницата и лекарите.

Во март годинава во истата болница почина и петгодишната Јана Христовска по примање инфузија. Нејзините родители низ судскиот систем се обидуваат да докажат дека се работи за лекарска грешка.