Во Владата почна средбата помеѓу премиерот Христијан Мицкоски и претседателот на СДСМ, Венко Филипче.

Филипче пред почетокот на состанокот изјави дека очекува конструктивен разговор. Изрази жалење што одредени политички партии уфрлиле етничка димензија за средбата, бидејќи повикот за меѓупартиска средба беше упатен кон сите партии. Со оглед на тоа што Мицкоски прв прифатил, ќе поразговараат за теми кои смета дека заеднички треба да се менаџираат.

„Отворен сум да разговараме за сите опции. Внимателен оптимист сум“, рече Филипче.

Додаде дека средбата е иницијатива која произлезе после трагедијата во Кочани и време е за поинаков пристап кон одредени важни прашања.

Со линеарното зголемување од 2.500 денари најниската плата во здравство изнесува нешто над 27.000 денари, соопшти денес директорот на Фондот за здравствено осигурување, Сашо Клековски. Тој попладнево прикажа како растела најниската плата во здравството изминативе пет години.

„Во однос на најниските плати во здравството, значи платите што ги добиваат чистач или хигиеничар, во 2020 година сме почнале со нешто помалку од 15.000 денари за во 2022 година да се стигне до 18.000 денари, зборувам за нето бидејќи во нашата јавност подобро се разбира нето отколку бруто-износот. Со ова зголемување најниската плата во јавното здравство сега е нешто над 27.000 денари или околу 27.000 денари, што ќе биде релативно повисоко од најниската плата утврдена на национално ниво. Мислам дека со ова се трудиме да го вратиме достоинството на здравствените работници и на здравствениот сектор бидејќи нашата земја сè уште има релативно ниски плати во однос на платите во јавното здравство кај соседните земји“, рече директорот Клековски.

Тој потсети дека линеарното покачување е резултат на соработката на Министерството за здравство, Фондот за здравствено осигурување и синдикатите и најави дека таа соработка ќе продолжи и во следниот период. Ќе настојуваат да се намали бројот на колективните договори по кои се работи во здравството оти сега има вкупно 15 разни колективни договори.

Министерот за здравство Арбен Таравари попладнево рече дека со линеарното зголемување просечната плата во јавното здравство изнесува 50.200 денари и најави дека ќе настојуваат да продолжи растот на платите.

Колку што сум информиран од страна на Министерството за внатрешни работи, истрагата сè уште е во тек и претпоставувам по службена должност комуницира со ОЈО и во рамките на таа истрага дека или ќе има или ќе нема нови елементи, ќе видиме, ОЈО ќе се произнесе, му одговори претседателот на Владата, Христијан Мицкоски, на пратеникот од ДУИ, Блерим Беџети, на денешната собраниската седница за поставување пратенички прашања во однос на трагедијата во Кочани.

Мицкоски потенцира дека ОЈО треба да ја заврши истрагата и да се утврди дали приведените лица имаат сторено криминал или не, посочувајќи му дека тој не може да обвинува никој како што Беџети вели дека обвинувал предвреме.

„Јас никогаш не се изразив така како што вие велите, да осудам предвреме, иако и јас лично и како политичка партија, но и голем дел од нас знае што значи да се биде жртва на таков тип на политички квалификации, сме го почувствувале тоа изминатите 7 години. Знаеме точно тоа како изгледа и не би сакале никому да му го правиме бидејќи за нас важи едно правило, не им го прави на луѓето она што не сакаш тебе да ти го прават.

Така што, истрагата е во тек, ОЈО претпоставувам ќе се произнесе кога ќе ја заврши и доколку ја заврши оваа истрага, претпоставувам, а и вие како правни лица многу подобро од мене и повешто го знаете, ќе се произнесе дали лицата што во моментот се обезбедени имаат основано сомневање за сторено кривично дело или немаат. Јас не би навлегувал во детали ниту, пак, би обвинувал, а не сум ни обвинувал, како што вие велите“, му порача Мицкоски на Беџети.

Мицкоски истакна дека вакви фалсификувани лиценци издадени од секторот угостителство под Министерството за економија и труд се утврдени од страна на Државниот пазарен инспекторат во целата држава.

„Точно е тоа дека јавно кажав оти е возможно да влијаам на истрагата ако кажам дека постои фалсификуван документ, односно лиценца за истиот клуб во кој се случи овој трагичен настан. И точно е дека откога се провери во архивата на Министерството за економија и труд, под тој архивски број е заведен поинаков документ. Јас не го измислив тоа, тоа го покажа сопственикот на клубот во текот на самата истрага. Дали тоа ќе влијае позитивно или негативно – не знам, исто како што, господине Беџети, ДПИ и Министерството за економија и труд констатираа дузина вакви слични документи за други клубови во Македонија.

Еве, ако влијаеме селективно, како што вие велите во овој клуб, тогаш што е со другите дузина вакви документи за дузина вакви ноќни клубови во целата држава“, праша Мицкоски и посочи дека таквите документи биле издавани од страна на Министерството за економија, односно Секторот за угостителство.

Мицкоски нагласи дека од 2008 година министер за економија е лице на предлог на политичката партија на ДУИ.

„Од 2008 година па наваму министри биле на предлог на ДУИ и ако се види почетокот на овој клуб кога почнува да функционира, во 2012 или 2013 година, повторно министер во ова Министерство бил предлог на ДУИ. Од тогаш па натаму додека постоел овој клуб, министер бил на предлог на ДУИ. Се поставува тогаш прашањето кој ги потпишувал и кој ги издавал овие документи, таму стои по овластување на некого, овластување на министерот, а некои и своерачно ги потпишувал министерот, но тоа ќе оставиме да покаже истрагата и да даде одговор“, вели Мицкоски.