Црна хроника
Сузбиена меѓународна мрежа за шверцување мигранти, биле пренесувани преку Македонија
Во текот на јуни 2023 година, со координација и поддршка од Интерпол и Европол, а со активно учество на Министерството за внатрешни работи, беше реализирана меѓународна оперативна акција во пет земји, во која беа лишени од слобода 62 лица, од кои 25 кубански државјани, а беа запленети и фалсификувани документи и пари.
Членовите на криминалните групи за да ги промовираат своите услуги на ранливите граѓани (во случајот кубански државјани), користеле апликации на социјалните мрежи, при што за сума од речиси 9.000 евра криминалците ги организирале патувањето, трансферите и обезбедувале фалсификувана документација, потребна за влез во Европската Унија. Мигрантите користеле авионски превоз од Куба до Србија, па преку Северна Македонија се обидувале да остварат нелегален влез во Грција, од каде што го продолжувале патот кон Шпанија. Се проценува дека околу 5.000 кубански државјани биле прошверцувани во ЕУ генерирајќи им профит на криминалните групи од приближно 45 милиони евра.
Спроведената истрага открила комплексна криминална мрежа поставена во Грција, Србија и во Шпанија, чии членови се адаптирале на сите околности со цел да го продолжат криминалниот бизнис. Шверцерите и нивните соработници, кои го олеснувале движењето на лицата мигранти од Куба низ Северна Македонија, биле во најголем број српски државјани, а имале свои помагачи и во нашата земја. Притоа при откриените случаи на кривично дело шверцување мигранти на лица од Куба во Северна Македонија сторителите беа процесирани пред надлежните органи со соодветни поднесоци.
Имено, Србија и Северна Македонија имаа безвизен режим со Куба и тој беше искористен за остварување легален влез сè до 1.1.2023 година кога Северна Македонија донесе одлука за воведување виза за Куба, односно до април 2023 кога тоа го стори и Србија.
Истрагата, координирана од Интерпол и од Европол, беше поведена во октомври 2021 година кога Финска, Грција, Северна Македонија и Србија пријавија зголемен број кубански граѓани што се обиделе да влезат во Европа со лажни документи.
Најпрвин кубанските државјани користеле комерцијални летови за Русија, каде што криминалците им нуделе опција илегално да ја преминат руско-финската граница и така да влезат во ЕУ, а како друга опција им нуделе летови за Србија, па од таму да го продолжат своето патување во Централна или Јужна Европа. Меѓутоа, по почетокот на конфликтот во Украина, рутата се променила, па кубанските државјани летале од Германија за Србија. Криминалните мрежи потоа им го олеснувале илегалниот влез во Северна Македонија и во Грција често принудувајќи групи со мигранти да се движат ноќе со часови, без резерви храна и вода. Некои од најранливите мигранти, меѓу кои и малолетници, биле изложени на измами, грабежи и изнуда, а некои жени биле префрлени во други криминални групи заради сексуална експлоатација.
Министерството за внатрешни работи на Република Северна Македонија преку соодветните единици имаше активна улога од почетокот на оваа истрага.
Беа одржани оперативни состаноци со сите засегнати држави во седиштата на Интерпол во Лион, Франција и на Европол во Хаг, Холандија. Исто така, беа одржувани и состаноци на билатерално ниво помеѓу Северна Македонија и Србија и Грција за споделување информации што би можеле да бидат од корист за истрагата во земјите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Гостиварец измамен за сума од 760 евра: преку социјалните мрежи собирал пари за лекување во странство
Вчера во 14.40 часот во ОВР Гостивар, 31-годишен гостиварец пријавил дека бил измамен од едно лице за сума од 760 евра.
Според пријавеното, околу 09.00 часот лицето се јавило преку социјална мрежа и се претставило како Р.М. од Република Србија, кој работел во хуманитарна организација. Како што е пријавено, лицето го видело апелот за помош за негово лекување во странство и сакало да помогне со донација на поголем износ, но било потребно прво тој да уплати 760 евра бидејќи таква била процедурата.
Исто така, според пријавеното, откако ги пратил парите преку брз трансфер на пари, лицето го блокирало, по што сфатил дека е измамен.
Полицијата соопшти дека се преземаат мерки за расчистување на случајот.
Црна хроника
Тепачка во интернат во Битола: таткото го претепал цимерот на својот син
Во СВР Битола вчера во 14.00 часот Ј.Б.(41) од Кичево пријавил дека во неговата соба во интернат во Битола, неговиот малолетен син бил физички нападнат од М.Г.(37) од Вевчани, татко на неговиот цимер.
Полицијата соопшти дека се преземаат мерки за расчистување на случајот.
Црна хроника
Кривична за геометар од Струга: изработил лажно решение за приватизација на градежно земјиште
ОВР Струга поднесе кривична пријава против Р.А.(39) од Струга поради постоење основи на сомнение за сторени кривични дела „фалсификување исправа” и „злоупотреба на службена положба и овластувања“.
Тој, во својство на помлад референт – геометар во Министерството за финансии, Управа за имотно – правни работи во Струга, изработил лажно решение за приватизација на градежно земјиште по основ стекната со надомест, внел број од друг предмет, своерачно се потпишал и во име на овластениот потписник, фалсификувајќи го неговиот потпис, и го втиснал службениот печат од Министерството за финансии за првостепена постапка.
Изготвеното лажно решение на 29.05.2024 година го испратил во Одделение за катастар на недвижности во Струга со намера да биде катастарски впишано и спроведено, додека архивираниот предмет, чиј број го искористил, веднаш го уништил.