Македонија
Стојанче Ангелов објасни како автоматска порака на телефонот спаси Македонец по сообраќајка
Веста за необичната автоматска порака на англиски јазик која ги алармира институциите дека е загрозен жиотот на маж по тешка сообраќајка кај Велес, го разбуди интересот во јавноста.
Пораката стигнала до Центарот за управување со кризи на телефонскиот број 112 во 4 часот утринава. Операторите го лоцирале телефонот и на местото од каде што била автоматски испратена пораката затекнале маж заглавен во возилото и тешко повреден.
Станува збор за македонски државјанин, кој по пристигнувањето на Итната помош бил однесен во болница во Велес, а потоа, поради сериозноста на повредите е пренесен во Хируршките клиники во Скопје.
За настанот објаснување даде првиот човек на ЦУК, Стојанче Ангелов. Објасни дека постојат апликации што граѓаните треба да ги симнат, за во случај на незгода, телефонот да испрати порака дека неговиот сопственик е во животна опасност.
Ангелов објасни дека некои уреди имаат вградени софтвери кои помагаат да се детектираат несреќи. Таков пример, вели Ангелов, е „ајфон 14“ којшто има т.н. „краш детектор“, односно специјален програм како дел од софтверот којшто детектира удар и веднаш по автоматизам врти на бројот 112.
„Ваквиот повик го добиваме во ЦУК. Потоа ние го лоцираме местото од каде што доаѓа повикот. Понатаму ги известуваме полицијата, Итната помош и по потреба пожарникарите“, рече Ангелов.
Впрочем, секој граѓанин со помош на инсталирање на апликации може да биде сигурен дека во случај на опасност, ЦУК, а потоа и екипите на Итната помош ќе бидат автоматски известени. Конкретно „андроидите“ можат да инсталираат Accident detection или Crush detection. Тие програми, како што објасни Ангелов, во случај на несреќа автоматски упатуваат повик кон 112.
Ангелов укажа и на можноста со кој било смарт телефон, со брзо стискање на копчето за вклучување, односно исклучување на телефонот да го добијат бројот 112. Истата опција треба претходно да се намести во сетинзите на апаратот.
„Aко граѓаните немаат можност да се јават на 112, повредени се, имаат итен случај, нападнати се или исплашени, темно е, доволно е панично да стиснат 5-6 пати на копчето за вклучување и да го добијат бројот 112“, рече Ангелов, демонстрирајќи како изгледа тоа.
Додаде дека разговорите се снимаат, а укажа и дека операторите се соочуваат и со злонамерни повици, од луѓе кои без причина ја држат зафатена линијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Мециновиќ: Владата води историски најопасна надворешна политика по државните интереси
На денешната седница за пратенички прашања, пратеникот од Левица Амар Мециновиќ даде критички осврт на надворешната политика која ја води владата на ВМРО-ДПМНЕ. Мециновиќ на почетокот се осврна на тоа зошто министерот Муцунски не е присутен на пратеничките прашања и праша дали можеби неговото отсуство е поврзано со градењето на новиот објект на покривот на Министерството за надворешни работи.
„Јас и претходно реагирав за едно многу контроверзно гласање во Генералното собрание на Обединетите Нации. Тоа е гласањето против обидот за носење на резолуција за прекин на огнот во Газа. Тогаш вие гласавте против, надвор од очекувањата на македонското општество и надвор од традицијата дипломатска која Македонија ја има”, истакна Мециновиќ.
Пратеникот од Левица дополни дека ова е првиот владин кабинет за надворешна политика кој гласал против кревањето на ембаргото на Куба. Ваквиот чекор според Мециновиќ претставува најгруб дисконтинуитет во традицијата на македонската дипломатија.
Тој се осврна и на односите со Кина, безвизниот режим и прашањето за Тајван, како и на поширокиот геополитички контекст на продлабочена криза во трансатлантските односи. Ја обвини Владата дека во момент кога САД стануваат сè понепредвидлив партнер, таа ја врзува Македонија исклучиво за американската линија, занемарувајќи ја европската траекторија.
„Албанија воведе безвизен режим со Кина и се приближува кон Европската Унија. Вие не воведувате безвизен режим и се оддалечувате од Европската унија. Моето пратеничко прашање е: каде оди овој брод?” – праша пратеникот од Левица.
Македонија
Министерство за правда: Собранието ја изгласа потребата од носење на Предлог законот за Судски совет
Со мнозинство гласови пратениците ја изгласаа потребата од носење на Предлог законот за Судски совет. Законот се проследува на второ читање, информираат од Министерството за правда.
Министерот за правда Игор Филков во своето обраќање рече дека со овој закон во министерството е започната нова ера на работа и функционирање, во којашто секој битен и суштински закон за граѓаните на Република Македонија ќе се изготвува низ отворен, јавен и транспарентен процес.
,, Клучни новини кои се предвидени со Законот се:
Јавност во постапката за разрешување на претседател на Судскиот совет,
За прв пат прецизирање на критериумите за избор на „истакнат правник“.
Воведување јавна расправа при избор на кандидатите за не-судски членови со цел поголема транспарентност и одговорност,
Зајакнување на критериумите за избор, одговорност и разрешување на членови на Советот од редот на судиите,
Јасно прецизирање на постапката за дисциплинска одговорност на судиите, но и на членовите на судскиот совет,
Воспоставување обврска Судскиот совет да ги прецизира, индивидуализира и образложи одлуките за избор и утврдување одговорност на судиите,
Утврдување на рокови за преземање дејствија за дисциплинска одговорност на судиите, како и прецизирање на основите и постапката за жалба против одлуката на Судскиот совет, како и
бројни други решенија за унапредување на целокупната правна рамка согласно препораките на ЕУ”, рече Филков.
Тој изрази жалење што дел од опозицијата не беше присутна на седницата за носење на, како што оценува, исклучително важен закон кој е дел од Реформската агенда.
Македонија
Утре, во утринските часови наместа со појава на магла, во текот на денот сончево со умерена облачност
Утре во утринските часови наместа ќе има појава на магла, а во текот на денот сончево со умерена облачност и претежно тивко. Во северозападните делови повремено ќе има зголемена облачност со услови за слаб дожд.
Минималната температура ќе биде во интервал од -4 до 1, а максималната ќе достигне од 8 до 13 степени.
Во Скопје, претпладне во делови од котлината ќе има појава на магла. Во текот на денот времето ќе биде умерено до значително облачно и претежно тивко.
Минималната температура ќе се спушти до -4, а максималната ќе достигне до 8 степени.
Во наредните денови продолжува периодот на стабилно и претежно тивко време. Во утринските и ноќните часови по одделни котлини ќе има појава на магла.

