Култура
„Флипбук“ во знак на 100-годишнината од раѓањето на Ацо Шопов
Фестивалот за Европски авторски анимиран филм Flipbook Film Festival 2023 ќе се одржи од 10 до 13 август 2023 година, во летното кино на Кинотеката на С. Македонија. Оваа година фестивалот е во знакот на чествувањето на 100 годишнината од раѓањето на македонскиот поет Ацо Шопов и е под покровителство на претседателот на С. Македонија. Фестивалот ќе биде отворен со премиерата на омнибус четири анимирани филмови инспирирани од творештвото на Шопов, во режија на Иван Ивановски, Крсте Господиновски, Владимир Лукаш и Жарко Иванов.
Во другите три вечери ќе бидат прикажани близу 100 филмови во четири натпреварувачки програми и панорама на европски анимиран филм. Во главната селекција за најдобар анимиран филм ќе се натпреваруваат 14 наслови, најдобрите европски остварувања од минатата година: „Oneluv“ на руската авторка Варја Јаковлева, овогодинешниот победник на Анимафест, номинираниот за Оскар „Трговци со мраз“ на португалецот Жоао Гонзалез, и македонскиот анимиран филм „Безбојно огледало“ на Бесар Илјази. Во категоријата за најдобар студентски анимиран филм ќе се натпреваруваат вкупно 19 филмови од хрватската, британската, унгарската, белгиската школа и два македонски филмови, „Нонсенс“ на Ангела Грозданов, дипломски филм направен на катедрата за анимација на Еуропа Прима во Скопје и „Chill Stacy, chill“, филм на Тамара Таскова направен на нејзините филмски студии во Словенија.
Голем интерес на досегашните изданија на фестивалот предизвика натпреварувачката селекција на анимиран документарен филм, а меѓу десетте наслови, ќе бидат прикажани наградуваните „Сексуалниот живот на баба ми“ на Уршка Ѓукиќ, „Артефакти за тебе, артефакти за мене“ на Белгиецот Брехт де Кок, францускиот „Box Cutters“ на Наоми Ван Ниекерк. Во селекција на анимирани музички спотови, ќе бидат прикажани вкупно 19 анимирани видеа меѓу кои и два македонски, на Андреј Марјановиќ и Никола Радуловиќ.
За наградите од главната селекција и селекцијата на музички видеа ќе одлучуваат Надја Андрашев од Унгарија, продуцентка и режисерка на повеќе наградувани анимирани филмови, Марко Дјешка од Хрватска, наградуван режисер и стрип автор и основач на познатото студио за анимација Адријатик и Гоце Цветновски, македонски автор на анимирани и играни филмови. За наградите од селекцијата на анимирани документарци и студентската селекција, ќе одлучуваат Михал Бобровски од Полска, професор и теоретичар на филм, автор и приредувач на неколку значајни книги од областа филмот, Арба Хаташи од Косово, директор на фестивалот за анимиран филм Анибар и Наташа Андонова, македонска аниматорка, сликарка, илустраторка и филмски и театарска костимографка.
За време на фестивалот ќе бидат претставени изложби на цртежи и колажи од анимирани филмови и флип-бук тетратки изработени од учениците во средното-уметничко училиште Лазар Личеноски.
Влезот на проекциите и на сите останати настани поврзани со фестивалот е бесплатен.
Четвртото издание на Флипбук Филм Фестивал е поддржано од Агенцијата за филм, Министерството за култура, Еко Свест и Кинотеката на С. Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Култура
„Видик“ – нов фестивал за литература и општа култура
Скопје следниов период станува побогато со нова низа книжевни, музички, театарски и мултимедијални настани.
Почнува „Видик“ – нов фестивал, кој ќе се одржува од 16 мај до 16 јуни, во организација на „Литература.мк“.
Цел месец ќе уживаме во убава и динамична атмосфера во амбиентот на „Литература.мк“, која ќе комбинира литературни промоции, изложби, концерти и театарски изведби и ќе ги задоволи разновидните вкусови и интереси.
Прегледајте ја целата програма и придружете ни се!
ПР
Култура
Македонка Божиновска е лауреат за „Антево слово“ за 2024 година
Меѓународната поетска манифестација „Анџело Ла Векија“ (Il Parnaso – Concorso di Poesia – Premio Angelo La Vecchia), во соработка со Здружението за развој на културата и заштита на културното наследство „Контекст – Струмица“ (Kontext), годинава седми пат ја доделува наградата за најдобра необјавена поетска творба „Антево слово“ („Антево слово3), специјална награда на фестивалот утврдена во чест на великанот на македонската поезија – Анте Поповски.
Меѓу учесниците, освен поети од Македонија, имаше автори и од Англија, Албанија, Бугарија, Тунис и Кипар, а во поширокиот избор влегоа: Ристо Маџунков, Ана Бунтевска, Дарко Лешоски, Соња Карбева, Милчо Мисоски, Елизабета Дончевка-Лушин, Љубица Шопова, Јулијана Младеновска-Тешија, Елизабета Бандиловска, Маја Апостолова, Ирена Павлова де Одорико и Марија Чокалова.
Жири-комисијата во состав: Митко Гогов (претседател), Виолета Танчева-Златева, Драгана Евтимова, Жорж Поповски (членови) и Геро Ла Векија (надворешен соработник), по пристигнати стотина песни, едногласно одлучи да ѝ ја додели првата награда на Македонка Божиновска за песната „Криенка“.
1. Македонка Божиновска – КРИЕНКА
2. Милена Сиљаноска – АКО ИМАМ УШТЕ ЕДЕН ЧАС СО ТЕБЕ
Александра Спасеска – „ИМАЛО ДЕНОВИ
3. Рекија Фебио (Италија) – ЌЕ ЧЕКОРИШ
Антева Темјана (псевдоним) – ОРЕВОТ
Млад автор:
Васја Мицковски – ЗА ПЛАШЛИВИТЕ
ОБРАЗЛОЖЕНИЕ:
Во својата кратка, но ефектна песна „Криенка“, Македонка Божиновска ни ја открива целата филозофија на човекувањето. Симплифицирана во изразот, со само неколку слики од детството, ни открива панорама на сеќавања, колективна носталгија, но и суштински светоглед, кој ја одразува длабочината на авторското восприемање на реалноста.
Првата строфа е блескава слика на актуелната состојба на современиот човек, неговиот зазор од Другиот и обидот да се скрие во својата лушпа. Но, дури и кога мисли дека нашол добар заслон, сепак сенката го издава и останува видлив и изложен во светот. Издигнувајќи се над другите во животот, освојувајќи високо место во хиерархијата на она што го нарекуваме успех, човекот сфаќа дека и покрај достигнатите височини, останува „најдолу од сите созданија“.
Стихови што говорат за минливоста, за непостојноста, невидливоста и за кревкоста на единката, преиспитувањето на индивидуална позиционираност во системот на животните вредности. И тоа е мигот кога човек би требало да сфати дека секој од нас е само капка во морето на животот и дека вистинскиот успех се мери со нешто друго – со загледувањето во себе и со победа над возгордеаноста и над потребата за издвојување. Само во дослух со своето божествено битие сме вистински заштитени од злините на светот и само од него можеме да црпиме сили за да ги надвиеме нив и да ги прифатиме различностите. А вистинското издигнување е можно само преку сознанието (росната капка), кое е способно да ни го исчисти и избистри духот за вистинско човекување, за слевање со сите созданија на светот.
Култура
Втор концерт на Влатко Стефановски и Мирослав Тадиќ во Македонската филхармонија
По распродавањето на првиот концерт на Влатко Стефановски и Мирослав Тадиќ по повод 20 години од издавањето на aлбумот „Трета мајка“, закажан е и втор концерт за сите оние што не успеаја да набават влезници, и тоа на 2 јуни, во Македонската филхармонија, со почеток од 20.30 часот, објави организаторот.
На 1 и 2 јуни македонската публика ќе има ексклузивна шанса по навистина долго време, во интимна атмосфера како онаа во Македонската филхармонија, да ужива во изведбата на албумот „Трета мајка“, „Крушево“ и сето друго што го имаат подготвено големите мајстори на гитарата, Влатко Стефановски и Мирослав Тадиќ.
Воедно, ексклузивно во Македонската филхармонија на 1 и 2 јуни ќе имате и ексклузивна шанса да си го купите својот примерок од изданието „Трета мајка“ на винил, потпишано од страна на Влатко Стефановски и Мирослав Тадиќ!
Влезниците за вториот концерт ќе бидат пуштени во продажба од среда (15 мај) во 9 наутро онлајн на ticketx и во продажната мрежа на ticketx во Македонија по цена од 1.500 и 1.990 денари.