Регион
Политико: Немојте да се разболите во Грција – островите се полни со туристи, но без доволно лекари

Идиличните острови во Грција се полни со туристи, но нивниот медицински систем има пукнатини. Смртта на бремена тинејџерка и нејзиното неродено бебе се само два од најмалку девет потенцијални смртни случаи кои можеа да се избегнат летово во Грција, а сите се предизвикани од хроничен недостиг на амбулантни возила и медицински персонал, пишува „Политико“.
Некои островски болници немаат лекари со полно работно време и се потпираат само на привремен заменски персонал од копното, кој пристигнува на островот со финансиски стимулации. Итните служби се во уште полоша состојба. На многу острови на Кикладите и Додеканезите, едвај е достапно едно возило на брзата помош кое е на располагање 24 часа на ден. Овој проблем не е присутен само на островите, во Атина, на пример, има околу 50 амбулантни возила наместо потребните 85 до 90.
„Треба целосно да ја реновираме службата за брза помош бидејќи има огромни празнини низ целата земја“, изјави за „Политико“ Јоргос Матиопулос, претседател на грчката служба за итна медицинска помош (ЕКАВ).
Поголемиот дел од здравствените домови на малите острови во Егејското Море имаат ограничен број лекари кои мора да дежураат секој ден. Но, дури и кога државата одлучила да вработи повеќе луѓе, обидите биле неуспешни бидејќи персоналот одбива да се пресели на островите, каде што растечкиот туризам ги направил трошоците за живот неподносливи.
„Испративме неколку екипи од останатиот дел од земјата на островите за да ги покриеме потребите на сезоната“, изјави Матиопулос. Додава дека колегите поради ова биле принудени да го скратат летниот одмор, но очигледно тоа е само привремено решение.
Во јуни, 63-годишна жена на островот Кос почина во задниот дел на пикап додека ја возеле до локална болница откако се онесвестила, додека единствената достапна брза помош на островот била зафатена со уште еден случај.
Потребни се 11 лица за управување со брза помош 24/7. Островот Кос, со постојано население од 40.000, кој во лето е домаќин на повеќе од милион туристи, има три нови амбулантни возила, но може да користи само едно, бидејќи има само 10 медицински техничари, од кои двајца ќе заминат во пензија следната година.
Неколку дена по тој настан, 19-годишна трудница во осмиот месец од бременоста починала во населба во Атина, откако чекала повеќе од пет часа брза помош. Почина и нејзиното неродено дете. Во исто време, таа се јавила во итната помош повеќе од 20 пати.
Откако тоа се случи, откриени се уште најмалку шест случаи на луѓе кои умреле низ целата земја поради недостаток на медицински транспорт.
По критиките, владата регрутира пожарникари, воен персонал и возачи на локалните власти за да помогнат во недостигот на персонал во туристичките области. Лекарите се противат на таа одлука, велејќи дека тоа е само потрага по „брзи решенија“. Тие тврдат дека вработувањето некомпетентен персонал во итни ситуации може да биде опасно за пациентите на кои им е потребен третман на местото на настанот.
На 27 јули, грчкиот парламент усвои амандман за итно распоредување на пожарникари и воен персонал додека пожарникарите се бореа со сериозните пожари кои беснееја низ Грција.
Проблемот е покомплексен од недостатокот на финансии; малку лекари или персонал за итни случаи сакаат да работат на островите. Двајца лекари по општа медицина во болницата во Кос, единствените кои работеле таму, дале отказ во 2021 година. Болницата сега е зависна од привремен персонал додека се обидува да најде замена, но досега никој не се пријавил. Ист е случајот и со педијатар и со радиолог.
Тоа е проблем што е присутен во многу рурални области во Европа, од оддалечените села во Франција до северните краишта на Шведска.
На крајот на јули, единствениот кардиолог во болницата на Кос протестираше во дворот на болницата држејќи транспарент на кој пишуваше: „Ги надминав своите граници, потребна ми е помош“. На островот од почетокот на летото работел 28 дена по ред како единствен лекар на клиниката за кардиологија.
Прекумерната работа и „прегорувањето на работата“ се главната причина за серијата оставки на лекарите ширум островот.
„Ова не смее да се случи во цивилизираниот свет, во европска земја, во туристичка дестинација“, рече градоначалникот на Кос, Теодос Никитарас. Потребни се трајни вработувања и потребни се трајни решенија“, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Вучиќ: Србија мора да биде подготвена за безбедносни предизвици

Српскиот претседател Александар Вучиќ вечерва изјави дека Србија склучува договори со Унгарија и ја зајакнува својата армија, бидејќи мора да биде подготвена за безбедносни предизвици.
Во Софија, Вучиќ за РТС изјави дека нема да бара објаснување за безбедносниот договор потпишан од Албанија, Косово и Хрватска, бидејќи, како што додаде, го поставил во разговорите со генералниот секретар на Европската унија Марк Руте и лидерите.
„Покрај тоа што кревавме раменици и велиме ете се случи, не можев да очекувам или да добијам друг одговор. Реагиравме соодветно. Сојузите се важни, но важно е да ја зајакнеме нашата позиција. Србија ќе продолжи да работи на зајакнување на својата армија, сите нејзини безбедносни капацитети, за да можеме да гарантираме мир на секое дете во нашата земја, на секој човек, на секој што живее во нашата земја.
Како што додаде, тоа е една од причините поради која Србија се повеќе се движи кон договор во таа област со Унгарија.
Вучиќ посочува дека ова не е начин да се креираат политички контрамерки, туку полека, длабински и суштински да се обиде да даде одговор на безбедносните предизвици.
Како што истакна, голем предизвик за Србија е се што се случува околу Република Српска.
„Она што ме загрижува е немањето желба за компромис. Разговарав со сите насекаде, од Брисел, вчера со Англичаните, со сите. Ја гледам нивната многу, многу силна посветеност“.
Голем предизвик за Србија, како што рече Вучиќ, е приказната за Бриселскиот договор.
Вучиќ наведува дека никому не му е грижа што Приштина не го почитува Договорот за регионална полиција, Договорот за правда и обвинителството, дека не се почитуваат шест од 15-те точки од Бриселскиот договор за формирање Заедница на српски општини, пренесува Танјуг.
„Формално ќе кажат дека им е грижа, но во суштина не им е грижа. Тоа е нивното дете што ќе го штитат, а Србија во исто време ја знае својата позиција, ние знаеме дека сме мали во споредба со големите, знаеме дека сме против нив во однос на почитувањето на меѓународното јавно право, нормите на Обединетите нации. Мораме да бидеме внимателни, но доволно цврсти, доволно храбри за да ја заштитиме нашата позиција порача Вучиќ, пренесува Танјуг.
Регион
Австрија и Германија воведоа забрана за влез на Милорад Додик

Австрија и Германија воведоа забрана за влез на водачот на босанските Срби, Милорад Додик. Покрај него, забраната важи и за двајца други политичари од Република Српска, изјави австриската министерка за надворешни работи Беате Мајнл-Рајзингер (НЕОС) во Сараево, каде што се сретна со германската државна секретарка за европски прашања Ана Лирман, пренесува „Die Presse“.
Забраната се однесува и на претседателот на Народното собрание на РС, Ненад Стевандиќ и Радован Вишковиќ.
Мајнл-Рајзингер во Сараево престојува до петок. Планира да се сретне со министерот за надворешни работи на Босна и Херцеговина, Елмедин Конаковиќ и со високиот претставник за Босна и Херцеговина, Кристијан Шмит.
Мајнл-Рајзингер ќе се сретне и со претседавачот на Советот на министри на БиХ, Борјана Кришто. Планирана е и посета на силите на ЕУФОР во кампот Бутмир.
Судот на Босна и Херцеговина побара распишување меѓународна потерница за Додик и Стевандиќ откако тие ја преминаа државната граница додека по нив беше распишана внатрешна потерница, потсетуваат тамошните медиуми. Судот на Босна и Херцеговина го поднесе барањето за меѓународна потерница до канцеларијата на Интерпол во Сараево. Меѓутоа, тоа барање беше одбиено. Додик потоа отпатува за Израел, па за Москва.
Дополнително, граничната полиција на БиХ спроведува истрага за тоа како Додик ја преминал границата, со оглед на тоа што има информации дека делегацијата под ротации без задолжително застанување, го минала граничниот премин Рача, според написите.
Регион
Можно е да се ограничи доаѓањето на работници од Западен Балкан во Германија

Германскиот медиум „Тагесцајтунг“ објави дека таканареченото правило за Западен Балкан, кое дозволува работници од неколку балкански земји да доаѓаат во Германија, може значително да се ограничи под новата влада.
„На Германија и требаат работници – најмалку 400.000 годишно, велат експертите. Една од можностите овие луѓе да дојдат во Германија е таканареченото правило за Западен Балкан. Меѓутоа, под новата влада на чело со Фридрих Мерц, тоа правило би можело да биде значително ограничено“, наведуваат тие.
Медиумите дополнително објаснуваат дека оваа посебна регулатива им овозможува на луѓето од Албанија, БиХ, Црна Гора, Северна Македонија и Србија без проблем да доаѓаат во Германија на работа. Како што пишува ТАЗ, за тоа не им треба стручно образование или квалификација – доволно е да имаат понуда за работа и одобрение од Федералната агенција за труд и вработување.
Правилото беше воведено во 2015 година за да се намали бројот на често безнадежните барања за азил од овие земји, овозможувајќи им на луѓето редовен пристап до пазарот на трудот.
Оттогаш, според ТАЗ, значително е намален бројот на барања за азил од земјите од Западен Балкан. Мигрантите од овој дел на Европа често работат во медицинскиот и градежниот сектор, рестораните и хотелите. Во 2024 година, владата „Семафорск“ на Олаф Шолц (СПД, Зелените и Либералите) не само што го продолжи правилото за Западен Балкан, туку и ја зголеми квотата за давање работни визи од 25.000 на 50.000 годишно.
Новата влада речиси сигурно ќе ја предводи Христијанско-демократската унија (ЦДУ) на Фридрих Мерц, додека во моментов се водат коалициски преговори меѓу ЦДУ, баварската ЦСУ и СПД, пренесува ДВ.
„Но, на изненадување на сите, во документот на работната група за труд и социјални прашања не се најде ниту еден збор за регулативата за Западен Балкан“, пишува ТАЗ.
„Во еден претходен преговарачки документ беше наведена намерата преку ова правило повторно да се „ограничи“ имиграцијата на првичните 25.000 лица годишно. Од ЦДУ не се изјаснија за тековните преговори, а од СПД не одговорија до завршувањето на ова издание на ПАЗ.
Економскиот експерт Херберт Брикер од Институтот за истражување на пазарот на труд и занимања (ИАБ), кој ги оценуваше ефектите од доаѓањето на работната сила од Западен Балкан, смета дека укинувањето на ова правило не би било добра идеја бидејќи тие „одат многу добро на пазарот на трудот“.
Подобри резултати од која било друга имигрантска група – и многу домашни работници
Три до четири години по пристигнувањето во Германија, околу 95 отсто од нив остануваат вработени, што е поврзано со фактот дека дозволата за престој е поврзана со статусот на вработување.
„Во однос на стапката на вработеност, тие постигнуваат подобри резултати од која било друга група имигранти на пазарот на трудот. Всушност, тие се многу поуспешни од многу домашни работници“, го цитира ТАЗ, Брикер.
Мигрантите речиси и не користат социјална помош, а „нивото на квалификации е повисоко од очекуваното“. Иако правилото за Западен Балкан не бара квалификации, повеќето имигранти работат квалификувана работа.
„Тука имаме редовни работни односи, што е добро за економијата, компаниите и даночните приходи“, истакнува Брикер.
Германија губи 400.000 работници секоја година поради демографските промени.
„Ако дополнително ги намалиме каналите кои добро функционираат, ќе имаме сериозен проблем“, додава Брикер, а пренесува ДВ.
„Треба повеќе да зборуваме за способностите на тие луѓе“
Политикологот Холгер Колб од Советодавниот совет за интеграција и миграција објасни дека работната сила од Западен Балкан имала значително помалку можности да дојде во Германија кога е воведена регулативата отколку што има денес.
„Во меѓувреме, пристапот до германскиот пазар на трудот е олеснет, денес има подобри законски рамки за имиграција на трудот“, објаснува Колб и го наведува примерот на „партнерската програма за признавање на квалификациите“.
„Програмата им овозможува на луѓето да дојдат во Германија да работат во одредена професија додека се обидуваат да добијат признание на нивните сертификати и дипломи. Откако ќе се признаат квалификациите, лицето станува професионална работна сила и може да добие дозвола за постојан престој по само три наместо пет години. Обединувањето на семејството е олеснето и за квалификуваните работници“, посочува Колб.
За разлика од Брикер, Колб го поддржува намалувањето на квотите за Западен Балкан бидејќи смета дека прашањето за потеклото не треба да биде важно во миграцијата на работна сила.
„Треба повеќе да зборуваме за способностите на тие луѓе“, рече Колб. „Правилото за Западен Балкан е спротивно на оваа основна идеја“.