Македонија
Зечевиќ со амбасадорката Дрекслер: Очекуваме Германија да остане наш силен поддржувач
Генералниот секретар на СДСМ, Миле Зечевиќ-Вардарски, денеска се сретна со амбасадорката на Сојузна Република Германија, Петра Дрекслер, во седиштето на партијата. Се разговараше за актуелната политичка состојба во земјата, процесот на уставните измени во македонското Собрание и поддршката од Германија за членството во ЕУ.
„Процесот за уставните измени во парламентот почна. Собраниската седница ги кристализира двата политички блока на македонската политичка сцена, едниот проевропски предводен од СДСМ, и вториот – антиевропски. СДСМ и проевропскиот блок ќе продолжи да работи за обезбедување мнозинство за продолжување на европскиот пат. Станува збор за иднината на земјата, на народот, битката за ЕУ е битка за младите македонски генерации и решени сме да ја добиеме“, рече генералниот секретар Зечевиќ на средбата.
Зечевиќ додаде дека оваа историска шанса за продолжување на европската интеграција не смее да се пропушти. Време е да бидеме во ЕУ, рамноправни и рамо до рамо со европските народи. Неодговорно е да се одолжува пристапувањето во ЕУ. Ризикот е повторно земјата да биде заглавена 11 години во изолација, со нарушени односи со ЕУ и загрозени стратешки позиции, додаде тој.
„Имаме единствена можност, отворена врата за европскиот пат и оваа шанса ние сметаме дека е исклучително важно сега да ја искористиме. Во спротивно, ќе видиме како земји од регионот напредуваат, а ние стоиме во место, со нарушени односи со ЕУ и со загрозени стратешки позиции. Тоа значи загрозување на националниот и на државниот интерес. И прашањето е колку генерации ќе загубиме за 11 години? Не смееме тоа да ѝ го направиме на сопствената татковина“, додаде Зечевиќ.
Изолацијата на земјата може да е посакувана варијанта, еднакво за луѓе од внатре, но и за структури од надвор, кои не им мислат добро на македонската држава и сакаат да останеме надвор од ЕУ, надвор од европските интегративни процеси, додаде тој.
„Наивно е да се мисли дека причината за тоа е единствено зачувување партиски или личен рејтинг, станува збор за нешто многу подлабоко. СДСМ е подготвен да се спротивстави на сите деструкции и процесот на интеграција во ЕУ да продолжи. Се работи за Македонија, за иднината на македонскиот народ и сите наши граѓани. Оваа битка за младите македонски генерации мора да ја добиеме и ќе ја добиеме“, посочи Зечевиќ.
Генералниот секретар потенцира дека сочувувањето на националните атрибути на македонскиот народ, македонскиот идентитет, јазик, култура и наследство, е можно само со полноправно членство во ЕУ и целосна интеграција на македонскиот идентитет во комплексниот мозаик на европскиот.
-Во оваа смисла благодарни сме за поддршката на Германскиот Бундестаг и усвоената Резолуција со која се признава и се оддава длабока почит на македонскиот идентитет, јазик, култура и историја. Германија не е само наша пријателска земја која силно го поддржува европскиот пат, туку и најголем трговски партнер, со голем број инвестиции кај нас, а заеднички делуваме како партнери во НАТО и ОБСЕ. Очекуваме Германија да остане посветена на процесот на проширување на ЕУ и да остане силен наш поддржувач, додаде тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Денеска без струја делови од Аеродром, Сопиште и Зелениково
Поради планирани прекини во електро снабдувањето денеска, без електрична енергија ќе бидат следните корисници:
– Во период од 09.00 до 15.00 часот дел од корисниците во Тоар, Ново Село, Градовци, Гумалево, Орешани, Смесница, Тисовица, Дејковци, Добрино, Пакошево. (општина Зелениково)
– Во период од 09.00 до 12.00 часот дел од корисниците од село Горно Соње (кај црквата) (општина Сопиште).
– Во период од 09.00 до 14.00 часот во Поликлиника Јане Сандански (општина Аеродром)
Македонија
Времен прекин на вода за жителите на улицата Васил Стефановски 16 во Скопје
Од ЈП Водовод и канализација – Скопје, изветсуваат дека денеска поради изведување на водоводен приклучок ф-80 мм на ул. Васил Стефановски 16, прекинато водоснабдување ќе имаат корисниците на дел од истата улица.
Водоснабдувањето ќе биде прекинато од 09:00 часот до завршување со работните активности, информираат надлежните.
Македонија
Променливо облачно време со сончеви периоди
Времето ќе биде променливо облачно со сончеви периоди. Наместа ќе има услови за слаб локален дожд. Ќе дува слаб до умерен ветер од јужен правец. Минималната температура ќе биде во интервал од 2 до 13, а максималната ќе достигне од 16 до 20 степени.
Во Скопје променливо облачно со сончеви периоди. Ќе дува слаб до умерен ветер од југоисточен правец. Минималната температура ќе се спушти до 8, а максималната ќе достигне до 20 степени.
Во деновите од викендот ќе се задржи променливо облачно и посвежо време со услови за слаб локален дожд. Потоа следува период на стабилно и тивко време со ниски утрински температури. По одделни котлини ќе има услови за појава на утринска магла.