Македонија
Медицинскиот тим од струшката Итна помош застанал на кафе на барање на ќерката на пациентот, кој лежел во комбето, Меџити сепак ќе бара одговорност
Министерот за здравство, Фатмир Меџити, ќе бара одговорност од Итната помош при Здравствениот дом Струга, чии здравствени работници беа фотографирани како пијат кафе на бензинска станица додека пациентот во комбето ги чека со маска за дишење. Од кабинетот на министерот за здравство, Фатмир Меџити, за „Макфакс“ велат дека разговарале со сите засегнати страни, вклучително и ќерката на пациентот.
„Се работи за пациент, кој во понеделникот беше испишан од болница и требало да биде пренесен во Општата болница во Струга. Пациентот бил во терминална фаза од болеста. Тој и ќерка му тргнале сами на нивно барање со сопствен превоз. Меѓутоа, кога стигнале до излезот на градот, ќерката сфатила дека нема да може сама и се јавила во Здравствениот дом во Струга. Од таму обезбедиле возило, кое набргу пристигнало. Кога дошло возилото, ќерката на свое барање, бидејќи ништо немала пиено и јадено цел ден, ги замолила да застанат. Татко ѝ бил свесен, контактибилен, во текот на целиот ден. Оваа информација во целост ја потврди ќерката на пациентот. И покрај тоа што таа барала, не е дозволено застанување на брзата помош на тој начин и Министерството за здравство поведе инспекциски надзор и побара изјаснување од страна на директорот на Здравствениот дом во Струга. По наодите, ќе се преземат соодветни мерки“, велат од кабинетот на министерот Меџити за „Макфакс“.
За овој случај вчера одговорност побара новинарка, која на министерот Меџити му покажа фотографија од пациентот и од медицинскиот тим од Итната помош седнат на кафе, а тој најави дека веднаш ќе го испита случајот и ќе преземе мерки.
Некои од медиумите денес јавија дека пациентот, кој бил болен од карцином, починал неколку дена по пренесувањето во Струга, но Министерството за здравство не одговори на прашањето дали е точна оваа информација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Мицотакис со предупредување: Ако некои веруваат дека можат да го игнорираат Договорот, треба да разберат дека нивниот пат кон Европа ќе остане затворен
Грчкиот премиер Киријакос Мицотакис уште еднаш ја предупредува Македонија дека прекршувањето на Договорот од Преспа, со кој се реши долгогодишниот спор за името меѓу двата соседа, ќе ги загрози амбициите на балканската земја за членство во ЕУ, пишува грчки „Катимерини“
Говорејќи од градот Верија во северна Грција за време на неговата кампања пред изборите за Европскиот парламент во јуни, Мицотакис изјави дека трите меморандуми за разбирање поврзани со договорот од 2018 година нема да бидат ратификувани од Парламентот се додека новото раководство во Скопје продолжи со прекршување на договорот.
„Ако некои веруваат дека можат да го игнорираат договорот, треба да разберат дека нивниот пат кон Европа ќе остане затворен, а меморандумите нема да бидат ратификувани освен ако не се почитува она што го предвидува договорот“, рече тој.
Македонија
Европски фронт: Скандалозен јавен политички притисок врз Управниот суд од страна на поразените на изборите
Европскиот фронт со голема загриженост ги проследи денешните скандалозни заканувачки изјави на лидерите на опозицијата кои загубија на претседателските и парламентарните избори кон Управниот суд, соопштија од оваа партија.
Европскиот фронт, како што велат, ги регистрирал заканитеи ја известил целата меѓународна заедница и сите локални и меѓународни институции за јавните изјави со закани како и обидот за изборен инженеринг со надворешно-институционални меѓупартиски договори за гласање и надгласување во Државната изборна комисија, како и со партиски притисоци до управниот суд.
Според нив, таквиот обид за изборен инженеринг има за цел да го промени односот на бројките во Собранието преку политички договор на маса.
„Со политички договори и монструозен антидемократски план, изготвен во партиските штабови на ВМРО, СДСМ и Влен, се прави обид да се наруши волјата на граѓаните.
Седницата на Државната изборна комисија беше скандалозна демонстрација на прегласување и суспендирање на принципите на Охридскиот договор.
Ги повикуваме сите институции да постапат согласно Законот, без партиски или политички директиви од која било партија и да го заштитат кредибилитетот на изборниот процес до крај, без да се стави никаква дамка на волјата на граѓаните изразена на изборите“, реагираат од Европскиот фронт.
Македонија
Мицкоски на средба со „Македонија 2025“: Следува забрзан економски развој и подобрување на животниот стандард на граѓаните
Претседателот на ВМРО-ДПМНЕ Христијан Мицкоски, заедно со потпретседателот Гордана Кочоска Димитриеска, членовите на ИК Сања Божиновска и Трајко Славески, меѓународниот секретар Стефан Андоновски и Зоран Ставрески, оствари средба со раководството на Македонија 2025.
На средбата беше потенцирана потребата од забрзан економски развој на Македонија и трансформација на државата, за што претседателот Мицкоски кажа дека е еден од приоритетите на ВМРО-ДПМНЕ како идна влада.
Владата предводена од ВМРО-ДПМНЕ ќе овозможи регулативна предвидливост за компаниите, поволен и ефикасен даночен систем и даночна администрација.
Воедно потенцирано е дека владата ќе работи на целосна дигитализација и на институциите и на услугите.
„За да се подобри животниот стандард на граѓаните, потребно е да се подобри бизнис климата, што е еден од главните приоритети на ВМРО-ДПМНЕ“, рекоа оттаму.