Топ
Почина маж од Свети Николе: со кабли сакал да го стартува возилото, паднал и бил прегазен
Вчера околу 10.30 часот во Полициска станица Свети Николе било пријавено дека во месноста викана „Круши“, светиниколско, пред дворно место од викендица, З.М.(58) од Свети Николе во обид со кабли да го стартува неговото паркирано возило „голф“ истото тргнало нанапред, и З.М. паднал, по што бил прегазен од возилото.
Од здобиените повреди З.М. починал на лице место.
Смртта е констатирана од лекар од итна медицинска помош, а по овластување на Јавен обвинител увид на лице место извршила увидна екипа од ОВР Свети Николе.
Телото на починатиот е предадено на семејството, соопшти полицијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Потврден 30-дневниот притвор за врховнот судија Наке Георгиев
Кривичниот совет од одделението за гонење организиран криминал и корупција при Основниот кривичен суд Скопје, постапи по жалба на одбраната на осомничениот Н.Ѓ. изјавена против решение на судија на претходна постапка од 21.05.2024 година:
„Денеска, по барање на одбраната на осомничениот одржа јавна седница на која по произнесување на одбраната и обвинителот во однос на наводите во предлогот за определување мерка притвор донесе решение со кое жалбата на одбраната се одбива како неоснована и се потврдува решението на судија на претходна постапка со кое му се определува мерка притвор во траење од 30 дена, заради постоење на основите од чл. 165 ст. 1 т. 2 и 3 од ЗКП.
Против ова решение странките имаат право на жалба пред Апелациониот суд Скопје“, се наведува во соопштението на Основниот кривичен суд Скопје.
Македонија
Одговорност од директорката и управниот одбор на Академијата за судии и јавни обвинители, бара антикорупциската комисија
Државната комисија за спречување на корупцијата покрена иницијатива до сите надлежни органи за утврдување одговорност на директорката, претседателот и членовите на Управниот одбор на Академијата за судии и јавни обвинители поради прекршување на Законот за спречување на корупцијата и судир на интереси, како и на Изборниот законик.
Надлежните институции имаат рок од 60 дена да ја разгледаат и да постапат по оваа иницијатива.
Потсетуваат дека ДКСК отвори предмет за вработувањата во Академијата за судии и јавни обвинители, за време на изборите, за што како што велат е утврдено дека е спротивно на законите.
„А тоа практично го потврдија и Управниот и Вишиот Управен суд, кои ја отфрлија жалбата на Академијата за судии и јавни обвинители.
Затоа, сметаме дека и оваа иницијатива е целосно оправдана и дека надлежните институции ќе постапат соодветно и во предвидениот рок“, се истакнува во информацијата од ДКСК.
Македонија
Позитивен знак е желбата на претседателката за средба, Бугарија очекува промена на реториката и крај на јазикот на омразата, порача Радев
Република Северна Македонија мора да покаже дека навистина сака да биде дел од обединета Европа со тоа што ќе ги исполни сите барања што ѝ ги поставува ЕУ како што беше за секоја земја членка. Ова го изјави бугарскиот претседател Румен Радев пред новинарите во Рим.
Мојата порака до претседателката на Република Северна Македонија е дека Бугарија очекува промена на реториката и конечно крај на јазикот на омразата, додаде шефот на државата, пренесуваат бугарските медиуми.
Претседателот објасни дека бугарската делегација не можела да се сретне со делегацијата на Република Северна Македонија, која престојува во Рим.
Претседателката на Република Северна Македонија, Гордана Силјановска-Давкова, ја предводи државно-црковната делегација на земјата во Италија и Ватикан по повод 24 мај, а настанот е под мотото „Македонија во чест на Св. Кирил“. Од кабинетот на Силјановска информираат дека таа ќе има аудиенција кај поглаварот на Римокатоличката црква, папата Франциско, а на 23 мај ќе се сретне и со државниот секретар на Светата столица, монсињор Пјетро Паролини, пишуваат бугарските медиуми.
„Позитивен знак е што претседателката на РСМ покажа стремеж за ваква средба“, одговори Радев на прашањето дали е побарана средба меѓу него и Силјановска-Давкова во Рим.
Тој објаснил дека програмата е исполнета до минута.
„Очекувам дека таква средба ќе има наскоро, додаде тој. Вчера имавме многу продлабочен и пријателски разговор со претседателите на Италија, Португалија и Грција“, рече Радев. Претседателот на РСМ со години го поканувам во Бугарија. Ја поканувам, секако“, одговори Радев на прашањето дали сега ја кани Силјановска-Давкова.
„Сметам дека желбата на PCM за дијалог е позитивен знак. Само преку дијалог ќе ја зајакнеме меѓусебната доверба, ќе ги решиме сите спорни прашања и ќе ја отвориме вратата на РСМ кон ЕУ. Се надевам и мој апел е дека оваа средба ќе се случи час поскоро. На ред е претседателот на РСМ, ако не се лажам, да дојде во Бугарија“, коментира шефот на државата.