Македонија
Демократското движење: Депонијата „Дрисла“ е вистинска еколошка бомба
Депонијата „Дрисла“ претставува јавен еколошки и здравствен проблем, реагираат од Демократското движење. „Дрисла“, велат од таму, веќе 30 години функционира без да ги исполнува потребните еколошки критериуми во согласност со Законот за заштита и унапредување на животната средина и Законот за менаџирање со отпадот, а де не зборуваме за современите европски стандарди.
„Едноставно, тука имаме една примитивна депонија, една површина или огромна дупка од 76 хектари, каде што годишно се фрлаат околу 200.000 тони комунален, индустриски и медицински отпад, како и друг вид отпад со висок ризик на инфективност и канцерогеност.
Ова ја прави депонијата „Дрисла“ една вистинска еколошка бомба. Со други зборови, тука имаме постојано опасно загадување на почвата, водата и воздухот, што е потврдено и Државниот инспекторат за животна средина. Оваа состојба постојано го загрозува и го оштетува здравјето на над 50 илјади жители на Батинци (на растојание од 500 метри) и другите населени места во регионот на Каршијака, населбата Драчево и пошироко. Истовремено, емитувањето на отровните гасови (CO, SO2) што се ослободуваат при согорување на медицинскиот отпад влијае на високиот степен на загадување на воздухот не само во Батинци туку и во градот Скопје и пошироко“, појаснуваат.
Како последица, додаваат дека во овие населени места има зголемена стапка на заболени од канцерогени и тешки хронични респираторни заболувања, кои често се смртоносни за локалните жители.
„Жителите на Батинци, општина Студеничани, наместо да ги почувствуваат бенефитите што им се ветувани на времето кога е инсталирана депонијата ‘Дрисла’, во почетокот на 90-тите години, напротив, нивната согласност за депонијата тогаш ја плаќаат со здравје, дури и со живот денеска.
Да не заборавиме дека ресорот животна средина (Министерството за екологија) од 2008 до оваа 2023 година е предводена од кадри на партијата на власт – ДУИ, кои, и покрај уставната, законската и моралната обврска, не направија ништо за да се спречи оваа еколошка катастрофа.
Голема одговорност за оваа состојба има и Град Скопје, кој од 2012 година, преку промоција на проекти за јавно- приватно партнерство ветуваше милионски инвестиции за модернизација на депонијата „Дрисла“. Но, до ден-денеска, освен сериозни сомненија за милионски бизнис со отпад во „Дрисла“, нема ништо од тие проекти“, се истакнува во соопштението од Демократското движење.
Оценуваат дека долгорочно решение би било само модернизација на депонијата „Дрисла“ – изградба на фабрика за селектирање, обработка и рециклирање отпад, како и систем за соодветно третирање на медицинскиот отпад и вградување филтри за отровниот екстракт и мерна станица за мониторирање на загаденоста на воздухот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Намалена видливост поради магла на патниот правец Лисец – Попова Шапка
Сообраќајот на државните патишта се одвива непречено, по наместа влажни коловози на повисоките и претежно суви коловози на пониските места. Намалена видливост поради појава на магла од 40 – 50м. има на патниот правец с.Лисец – Попова Шапка.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Претежно облачно со врнежи од дожд
Времето денеска ќе биде претежно облачно со врнежи од дожд, наместа во западните делови пообилни (над 40 l/m2). Ќе дува засилен јужен ветер, кој во текот на ноќта ќе го промени правецот во северен (над 70 km/h). Во текот на ноќта врнежите од дожд најпрвин на планините ќе преминат во снег, а потоа и на некои пониски места и ќе се формира снежна покривка. Минималната температура ќе биде во интервал од -3 до 4, а максималната ќе достигне од 9 до 14 степени.
Во Скопје претежно облачно, попладне и во текот на ноќта со врнежи од дожд, повремено пообилни. Ќе дува умерен до засилен јужен ветер. Во текот на ноќта со засилен северен ветер ќе има услови во повисоките делови од котлината врнежите од дожд да преминат во снег со слаб интензитет. Минималната температура ќе се спушти до -1, а максималната ќе достигне до 12 степени.
ВРЕМЕТО ВО НАРЕДНИТЕ ДЕНОВИ
Во сабота во претпладневните часови времето ќе биде променливо облачно со повремен снег, претежно во западните делови. Ќе дува умерен, долж Повардарието засилен ветер од северен правец (над 70 km/h). Во деновите потоа времето ќе биде стабилно и тивко со ниски утрински температури и појава на магла по котлините.
Скопје
Без струја делови од општините Карпош, Ѓорче Петров и Кисела Вода
ЕВН Македонија, известува дека поради планирани зафати на електродистрибутивната мрежа денеска без напојување со електрична енергија ќе останат делови од општините Карпош, Ѓорче Петров и Кисела Вода.
– Од 09:00 до 13:00 часот, корисниците дел од ул. Козле, дел од објектите над КАМ-маркет кон Центар во општина Карпош;
– Од 09:00 до 13:00 часот, корисниците на ул. Ѓорѓи Андреевиќ и ул, Горно Лисиче во општина Ѓорче Петров;
– од 09:30 до 13:00 часот, корисниците на ул Јабланица бр.101А во општина Кисела Вода.