Свет
ОН: Повеќе од 700 милиони луѓе не знаат кога повторно ќе јадат

Глобалната криза со глад остави повеќе од 700 милиони луѓе несигурни кога или дали повторно ќе јадат, а побарувачката за храна незапирливо се зголемува како што пресушува хуманитарната помош, рече шефот на Агенцијата за храна при Обединетите нации.
Извршната директорка на Светската програма за храна (WFP), Синди Мекејн, на седницата на Советот за безбедност на ОН рече дека поради недостиг на финансии, Агенцијата била принудена да ги намали оброците на храна за милиони луѓе и дека тие сè уште се намалуваат.
„Сега живееме со серија симултани и долгорочни кризи, кои ќе продолжат да ги поттикнуваат глобалните хуманитарни потреби“, рече таа додавајќи: „Ова е новата реалност на хуманитарната заедница – нашата нова нормала – и ќе се справиме со последиците во наредните години“.
Синди Мекејн, сопруга на починатиот американски сенатор Џон Мекејн, рече дека се проценува оти речиси 47 милиони луѓе во над 50 земји се на само еден чекор од глад, а се проценува дека страдаат околу 45 милиони деца на возраст под пет години од акутна неисхранетост. Според процените на WFP, од 79 земји, во кои работи Агенцијата, со седиште во Рим, до 783 милиони луѓе – секој 10-ти од светската популација – сè уште легнуваат гладни секоја вечер, пренесуваат агенциите.
Повеќе од 345 милиони луѓе се соочуваат со високо ниво на несигурност во храната оваа година, што е зголемување за речиси 200 милиони луѓе од почетокот на 2021 година пред пандемијата на Ковид-19, се наведува во извештаите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Трамп воведува царини од 104 отсто за Кина

Во среда, претседателот Доналд Трамп ќе воведе дополнителен данок од 84 отсто за сите кинески увозни производи, објави портпаролката на Белата куќа, Каролин Левит. Тоа ќе значи дека сите стоки од Кина подлежат на царина од најмалку 104 проценти, пренесува CNN.
„Царините стапуваат на сила вечерва во 00:01 часот. Значи, всушност утре“, рече Левит, одговарајќи на прашањето дали ќе се изврши заканата на претседателот Доналд Трамп за Кина.
На прашањето за можен договор со кинескиот претседател Шји Џјинпинг, Левит рече:
„Претседателот верува дека Кина сака договор со САД. Кина мора да постигне договор со САД.
„Не беше во ред да возвратат. Кога Америка е погодена, таа посилно го возвраќа ударот“, рече таа.
„Земјите како Кина, кои одлучија да се одмаздат и да се обидат да го удвојат нивното малтретирање на американските работници, прават грешка“, изјави Ливит за новинарите
„Претседателот Трамп има челична кичма и таа нема да се скрши“, рече таа.
Ливит одби да каже под какви услови, доколку ги има, Трамп ќе размисли за намалување на царините за Кина.
Свет
Ал Каеда повикала на атентат на принцот Хари: тој се уште без државно обезбедување

Терористичката мрежа Ал Каеда повика на атентат на британскиот принц Хари, велејќи дека неговата смрт ќе ја задоволи муслиманската заедница, изјави денеска пред судот во Лондон правниот застапник на принцот.
Како што истакна адвокатката Фатима Шахид пред Високиот суд на правдата, Ал Каеда повика на убиство на принцот Хари откако во 2020 година беше намалено нивото на безбедност што му беше обезбедено за време на неговиот престој во Обединетото Кралство, пишува „Daily Mail“.
Принцот Хари на почетокот на 2020 година донесе одлука да се повлече од својата висока позиција во британското кралско семејство, да стане финансиски независен, да ја претставува британската монархија во намален обем и да помине половина од своето време во Северна Америка.
Потоа, Извршниот комитет за заштита на кралското семејство одлучи дека принцот уживал намалено ниво на заштита кога бил во Обединетото Кралство, по што следел судскиот случај на принцот со Министерството за внатрешни работи.
Оттогаш, принцот Хари нема заштита од телохранители финансирани од даночните обврзници.
Правниот застапник на принцот Хари, Фатима Шахид, денеска објави дека безбедносниот тим на принцот објавил документ во кој се наведува дека „смртта на принцот Хари ќе ја задоволи муслиманската заедница“.
Не е прецизиран точниот датум кога би требало да се случи убиството на принцот Хари, пишува „Дејли мејл“ и потсетува дека принцот веќе добил смртни закани откако во својата автобиографија напишал за убиство на 25 талибанци додека учествувал во борбите во Авганистан.
Правниот застапник изјавил дека намалувањето на безбедносното ниво на Хари, принцот и војводата од Сасекс, било неоправдано, пренесува Би-би-си.
Министерството за внатрешни работи, пак, соопшти дека судијата што ја донел одлуката за оправданоста за намалување на нивото на безбедност на принцот Хари постапил правилно и според законот, според светските медиуми.
Свет
Шефот на ОН: Газа е поле за убивање а цивилите се во бесконечен круг на смртта

Генералниот секретар на ОН, Антонио Гутереш денеска го отфрли новиот израелски предлог за контрола на испораката на помош во Газа, велејќи дека тоа може да доведе до дополнителни контроли и бесчувствително ограничување на помошта до последната калорија и зрно брашно.
„Да бидеме јасни, нема да учествуваме во никаков аранжман што не ги почитува целосно принципите на хуманост, непристрасност, независност и неутралност“, изјави Гутереш за новинарите. Ниту една помош не е доставена до палестинската енклава од околу 2,1 милиони луѓе од 2 март. Израел рече дека нема да дозволи влез на стоки и залихи во Газа додека палестинските милитанти на Хамас не ги ослободат сите преостанати заложници.
COGAT, израелската воена агенција која ја координира помошта, се состана со агенциите на ОН и меѓународните хуманитарни групи минатата недела и рече дека предложила структуриран механизам за следење и добивање помош во Газа.
„Механизмот е дизајниран да ги поддржува хуманитарните организации, да го подобри надзорот и одговорноста и да обезбеди помошта да стигне до цивилното население кое има потреба, наместо да биде пренасочена и украдена од Хамас“, објави COGAT завчера на платформата X.
Џонатан Витал, висок претставник на ОН за помош за Газа и Западниот Брег, минатата недела рече дека нема докази за пренасочување на помошта. Израел продолжи со бомбардирањето на Газа минатиот месец по двомесечното примирје и испрати војници назад во енклавата.
„Газа е поле за убивање, а цивилите се во бесконечен циклус на смрт“, рече Гутереш, повторувајќи го својот повик за итно и безусловно ослободување на сите заложници, траен прекин на огнот и целосен хуманитарен пристап до Газа. Тој додаде дека испораката на ОН е спречена поради затворените премини кон Газа и блокадата на помошта.
„Како окупаторска сила, Израел има јасни обврски според меѓународното право, кое вклучува меѓународно хуманитарно право и меѓународна заштита на човековите права“, рече Гутереш. Тоа значи дека Израел треба да ги олесни програмите за помош и да обезбеди стандарди за храна, медицинска нега, хигиена и јавно здравје во Газа, рече тој. „Ништо од тоа не се случува денес“, нагласи тој.