Свет
Столтенберг: Ако сакаме крај на војната, воената поддршка за Украина е вистинскиот начин

На Украина итно ѝ е потребна воздушна одбрана, вклучително и муниција, резервни делови и одржување на системите што веќе ги има украинската војска, изјави денеска генералниот секретар на НАТО, Јенс Столтенберг.
Тој рече дека војната, сега веќе во својата втора година, е војна на исцрпување, но не и ќор-сокак, со оглед на она што Украина го доби за време на контраофанзивата што ја почна во јуни во обид да ја врати територијата што ја посочи, окупирана од Русија, пренесуваат агенциите.
„Ако сакаме крај на војната, ако сакаме праведен и траен мир, тогаш воената поддршка за Украина е вистинскиот начин“, изјави Столтенберг во интервју за „Ројтерс“ во Њујорк, каде што присуствуваше на Генералното собрание на Обединетите нации.
Според него, на Украина ѝ требаат многу видови поддршка.
„Има итна потреба од противвоздушни системи не само за нови системи туку и за муниција, одржување, резервни делови. Гледаме дека противвоздушната одбрана секојдневно спасува животи во Украина, а ние треба да ја одржуваме противвоздушната одбрана на Украина“, нагласи Столтенберг.
Тој одби да каже колку муниција сојузниците на НАТО би можеле да ѝ испорачаат на Украина секоја година или кога точно „Ф16“ ќе бидат испорачани на Киев.
„Сојузниците работат напорно за да ги обучат (пилотите на ‘Ф16’) што е можно побргу“, рече Столтенберг.
Тој посочи дека важноста од испраќањето на авионите „Ф16 “лежи и во тоа што испраќа порака за долгорочна и постојана поддршка.
„Подготвени сме за долги патеки. Не затоа што можеме точно да предвидиме колку долго ќе трае оваа војна, туку затоа што треба да му испратиме порака на претседателот на Русија, Владимир Путин, дека нема да го чекаме крајот без да правиме ништо“, нагласи лидерот на НАТО.
Столтенберг рече дека би сакал да види побрз напредок во украинската контраофанзива, но додаде дека она што го освоиле на југ и на исток е сепак огромно.
Според него, војната би можела да продолжи во текот на есента и зимата.
„Она што треба да продолжиме е да ги поддржуваме Украинците и потоа тие да носат одлуки на терен“, рече тој и додаде дека војната станува војна на логистика.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Европа
Трамп ја одби понудата на ЕУ: „Не, тоа не е доволно“

Актуелниот американски претседател Доналд Трамп изјави дека Европската унија мора да се согласи да купи американска енергија во вредност од 350 милијарди долари ако сака да ги избегне широките царини наметнати од неговата администрација.
Така тој ја отфрли понудата на Брисел за укинување на царините за автомобили и индустриски стоки.
Вчера вечерта, на прес-конференција во Белата куќа, Трамп реагираше на изјавата на претседателката на Европската комисија Урсула фон дер Лајен, која претходно истиот ден рече дека ЕУ е подготвена да ги укине сите царини за увоз на автомобили и индустриски производи од САД, доколку Вашингтон го стори истото.
Запрашан од новинарите дали смета дека таа понуда е доволна за да се намалат тарифите, Трамп рече: „Не, не е“.
„Имаме дефицит од 350 милијарди долари со Европската унија и тој брзо ќе исчезне“, рече Трамп. „Еден начин тоа брзо и едноставно да исчезне е тие да мораат да ја купуваат нашата енергија… ако ја купат, можеме да ги извадиме тие 350 милијарди за една недела. Тие мора да купат и да се обврзат да купат еднаква вредност на енергија“.
Фон дер Лајен ја даде понудата откако Трамп минатата недела воведе царини од 20 отсто за производите на ЕУ, како и најмалку 10 отсто за стоки од други трговски партнери. Како одговор, глобалните пазари загубија трилиони долари, а европските берзи во понеделникот го забележаа својот најголем еднодневен пад од почетокот на пандемијата со „Ковид-19“.
Свет
Единаесет дена по разорниот земјотрес во Мјанмар, тлото не се смирува: регистрирани 98 последователни потреси

Во текот на 11-те дена од 28 март, кога Мјанмар беше погоден од катастрофален земјотрес со јачина од 7,7 степени според Рихтер, земјата ја потресоа 98 последователни потреси, соопштија денеска властите.
Според метеоролошката и хидролошката служба на Мјанмар, новите земјотреси биле со јачина од 2,8 до 7,5 степени, објави новинската агенција Ксинхуа.
Бројот на жртвите од првичниот земјотрес се искачи на 3.600, 5.017 лица се повредени, а 160 се уште се водат како исчезнати, соопшти информативниот тим на Управниот совет на Мјанмар.
Свет
(Видео) Почина 99-годишна нацистичка „секретарка на злото“

Почина Ирмгард Фурхнер (99), поранешна секретарка во концентрациониот логор Штутхоф за време на нацистичката ера.
Според портпаролот на канцеларијата на државниот обвинител во Ицехо, Фурхнер починала на 14-ти јануари.
Таканаречената „секретарка на злото“ се најде во меѓународното внимание во 2022 година, кога германскиот суд ја прогласи за виновна за нејзината улога во убиството на повеќе од 10.000 луѓе за време на Втората светска војна.
Фурхнер била во доцните тинејџерски години кога работела како стенограф кај командантот на Штутхоф. Поради нејзината возраст во моментот на делото, ѝ судеше судот за малолетници, со што ѝ беше осудена условна затворска казна од две години.
Адвокатот тврдеше дека обвинителите не успеале да докажат дека таа знаела за убиствата во логорот.
Но, пред две години Фурхнер беше прогласена за виновна за нејзината улога во убиството на 10.505 луѓе во концентрациониот логор Штутхоф, кој се наоѓа во денешна Полска.
Германските медиуми ја опишаа пресудата како веројатно последна пресуда за учесниците во нацистичката машина на смртта, бидејќи повеќето од инволвираните починале или не се способни да им се суди поради нивната напредна возраст.
Нејзиниот адвокат тврдеше дека обвинителите не успеале да докажат дека таа знаела за убиствата во логорот, но германскиот суд во градот Лајпциг го отфрли тој аргумент.
„Нашиот аргумент беше дека административната поддршка на масовно убиство е еднакво на помагање и поттикнување убиство“, рече Томас Вил, обвинител кој ја предводи Германската Централна канцеларија за истрага на нацистичките злосторства.
Се проценува дека 100.000 луѓе биле депортирани во логорот Штутхоф за време на војната. Кампот бил опкружен со наелектризирани бодликави жици, а условите биле брутални. Многу затвореници умреле од епидемија на тифус, додека оние што чуварите ги сметале за премногу слаби или болни за да работат, биле убиени, објави Скај њуз.