Свет
Путин е расипано човечко суштество, ќе нè надживее сите, вели руски опозиционер
Неодамнешните мисли на Владимир Путин се невообичаени дури и за неговите стандарди, пишува рускиот опозиционер Леонид Гозман за „Новаја газета Европа“. Како што наведува, неговите мисли предизвикале шпекулации за неговата психичка состојба.
Иако верува дека Путин веќе некое време не е способен да владее, вели дека, најверојатно, неговото здравје е доста добро.
„Всушност, тој веројатно ќе нè надживее сите нас. Она што се случи е што Путин престана да се воздржува и почна да размислува гласно“, вели Гозман и тврди дека Путин ја тргнал маската.
„Оваа комбинација на хомофобија, антисемитизам, сексизам, етноцентризам, теории на заговор и презир кон секој што рефлексно не се тресе пред авторитетот може да добие неколку научни имиња. Јас лично го нарекувам расипано човечко суштество“, пишува Гозман.
За отстранувањето на маската од лицето на Путин, наведува три можности:
Првата е дека тој доживува дегенерација на личноста поврзана со возраста со психопатско акцентирање, што резултира со опаѓање на самоконтролата.
Втората опција е дека тој, едноставно, престанал да се грижи што мисли некој: „јас ќе кажам што сакам, а вие сепак ќе ми аплаудирате за тоа“.
Третата можност е кревката контрола врз реалноста предизвикана од постојаниот тек на ласкање во комбинација со целосната осаменост на неговото постоење, што резултира со длабока заблуда, посочува опозиционерот Леонид Гозман.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Еден загинат и 11 повредени во руски напад со дронови врз Киев, меѓу нив и дете
Најмалку едно лице загина синоќа, а 11 се повредени во руски напад со дронови врз Киев, соопштија градските власти.
Градоначалникот Виталиј Кличко изјави дека меѓу повредените е тринаесетгодишно момче.
Воената администрација на Киев ги предупреди жителите и на заканата од напад со балистички ракети и ги повика да останат во затворен простор.
Шефот на воената администрација на Кијева, Тимур Ткаченко изјави дека еден човек загинал во нападот, како и дека бројот на повредени не е конечен.
Свет
Трамп ги поништил сите уредби и документи потпишани од Бајден
Американскиот претседател Доналд Трамп соопшти дека ги поништил сите уредби и документи потпишани од неговиот претходник на функцијата, демократот Џозеф Бајден, бидејќи користел уред за автоматско потпишување.
Кои се правните последици од одлуката на Трамп засега не е јасно.
„Секој документ кој го потпишал Поспаниот Џо користејќи автоматско пенкало, што е околу 92 проценти од нив, со ова се поништува и повеќе нема никаква правна сила или ефект“, напиша републиканскиот претседател на својата платформа Трут Соушл.
Свет
Преговорите со САД за мировниот план за прекин на конфликтот со Русија ќе почнат наскоро, вели Зеленски
Украинскиот претседател Володимир Зеленски изјави дека на преговорите со Соединетите Американски Држави за мировниот план за прекин на конфликтот со Русија, кои, како што наведе, наскоро ќе започнат, земјата ќе ја претставуваат началникот на Генералштабот на вооружените сили на Украина, Андреј Гнатов и секретарот на Советот за национална безбедност и одбрана Рустем Умеров.
Во синоќешното видео обраќање, Зеленски рече дека претставници на Министерството за надворешни работи и украинската разузнавачка служба ќе бидат меѓу членовите на украинската делегација, пренесува „Униан“.
Тој додаде дека во моментов се во тек подготовки за состанок со американската страна.
„Преговорите наскоро ќе започнат, а наши претставници ќе бидат таму – началникот на Генералштабот, претставници на Министерството за надворешни работи, секретарот на Советот за национална безбедност и одбрана и нашата разузнавачка служба. Состаноци со американската страна ќе се одржат во блиска иднина“, нагласи Зеленски.
Украинската делегација досега ја предводеше Андриј Јермак, кој вчера поднесе оставка од функцијата шеф на претседателскиот кабинет.

