Македонија
Бизнис делегација од Словенија во посета на Министерството за информатичко општество и администрација
Министерството за информатичко општество и администрација, денеска, беше домаќин на бизнис делегација од Република Словенија.
За време на средбата, министерот Азир Алиу ги истакна проектите и предизвиците со коишто се соочува Република Северна Македонија во сферата на дигитализацијата, информатичката технологија, администрацијата и медиумите.
„Ние, како две држави, веќе соработуваме на разни видови проекти во сферите од интерес. Драго ми е што сум домаќин на делегацијата составена од бизнисмени и ИТ експерти кои ги претставија потенцијалите на Словенија и можностите за соработка со МИОА и други државни институции. Како Министерство имплементираме процеси и стратегии кои веќе ги спроведе Словенија“, рече министерот Алиу.
Според Отмар Зорн, претставник на Делегацијата од Словенија, изразен е сериозен интерес за соработка со институции и компании од Северна Македонија во насока на размена на ИТ решенија, дигитализација, подобрување на административните капацитети и поддршка на проекти поврзани со медиумите.
Делегацијата од Словенија ја претставуваа бизнисмени од компаниите „Sfera IT“, “A-soft company“, „Actual IT“, „Interexport и CargoX“. На состанокот присуствуваа и претставници на Министерството за здравство, со кое постојат сериозни потенцијали за размена на знаења и ИТ решенија и соработка на разни проекти. Со словенечката делегација присуствуваше и поранешниот министер за образование, наука и спорт Јернеј Пикало, кој го сподели своето искуство во областа на дигитализацијата и јавната администрација, а пред се стратегии за едукација на населението за дигиталната ера. По овој состанок, делегацијата од Словенија имаше неколку бизнис средби со македонските компании.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Познат идентитетот на Македонката која загина во тешка сообраќајна незгода во Грција, тешко повредени уште две девојки
Министерството за надворешни работи соопшти дека денеска во 12 часот по локално време, на автопатот Егнатиа, во Република Грција, се случила тешка сообраќајна несреќа, во која М.Н. (1995), државјанка на Република Северна Македонија го изгуби животот.
„Претставниците на Генералниот конзулат на Северна Македонија во Солун, кои од времето на настанатата трагедија беа во контакт со блиски на жртвата, остануваат на располагање за асистенција во врска со преносот на останките на починатата во земјата.
Воедно, информираме дека засегнати се и три наши државјанки, сопатници на починатата, А.К (2000) и М.Р (2000), кои добиле тешки повреди и И.Ј (1999) која не е повредена, при што се соодветно хоспитализирани“, соопшти МНР.
Генералниот конзулат останува во постојана комуникација со надлежните институции и на располагање на повредените наши државјанки и нивните семејства при евентуална потреба за помош, до нивното враќање дома.
Македонија
(Видео) Хеликоптер на МВР исфрли над 20 тони вода врз пожар во кичевско
Денеска хеликоптер Бел-412 од Одделот за воздухопловни единици на МВР, по добиено барање од ЦУК, дејствуваше на пожарот на отворено во атар на село Цер во општина Кичево, извести МВР.
Хеликоптерот исфрли над 20 тона вода и го стопира кракот што се наближуваше да зафати букова шума, соопшти МВР.
Македонија
Топлото време продолжува и во наредните денови, утре температурите до 40 степени
Времето утре ќе биде сончево и многу топло со мала до умерена локална облачност. Попладне облачноста ќе се зголеми. Ќе дува слаб до умерен ветер од западен и југозападен правец. Минималната температура ќе биде во интервал од 15 до 23, а максималната ќе достигне од 33 до 40 степени. UV=9
Во Скопје сончево и многу топло со мала до умерена облачност. Ќе дува слаб ветер од западен правец. Минималната температура ќе се спушти до 21, а максималната ќе достигне до 40 степени.
Во деновите од викендот нашето подрачје и понатаму ќе биде под влијание на многу топла воздушна маса од југ поради што времето ќе биде претежно сончево и натпросечно топло. Од понеделник во попладневните часови ќе има локален развој на нестабилна облачност со краткотраен пороен дожд и грмежи. Дневните температури ќе бидат во постепено благо опаѓање.