Европа
Две престрелки во Шведска, експлозија на бомба разнесе куќа, тројца загинати
Шведска забележа рекорден број смртни случаи од пукање овој месец од почетокот на евиденцијата во 2016 година. Две лица загинаа во одвоени престрелки синоќа, со што месечниот биланс на загинати се искачи на 11. Уште едно лице загина утрово по експлозија на бомба.
Земјата беше потресена од смртоносен бран престрелки и експлозии во последните недели. Се претпоставува дека повеќето од овие настани се поврзани со расколот во бандата „Фокстрот“. Во првото пукање синоќа 18-годишник беше убиен на спортски терен во Малархојден, југозападно предградие на Стокхолм.
Околу полноќ уште еден маж е убиен во Јордбро, јужно од Стокхолм. 25-годишна девојка утрово почина во болница од повредите добиени во експлозија на бомба во Сторврета, пред Упсала, универзитетски град северно од главниот град. Експлозијата во која беа оштетени пет куќи полицијата ја третира како убиство. Шведските медиуми наведуваат дека жената што загинала, најверојатно, не била цел.
Три лица се приведени под сомнение дека учествувале во престрелката во Јордбро, а двајца се уапсени за експлозијата во Упсала, која била толку бурна што биле оштетени фасадите на две куќи. Портпаролот на полицијата, Магнус Јансон Кларин, изјави дека полицијата работи на истрага и спречување нови акти на насилство.
„Ова не е забавно утро за будење“, изјави тој за телевизијата СВТ. Веќе неколку години Шведска е зафатена со конфликт меѓу бандите, кои се борат за трговија со оружје и дрога. Честа цел на напади се сметаат роднините на членовите на криминалните мрежи.
„Невозможно е да се следат сите. Има многу роднини. Знаеме дека некои луѓе си заминаа и отидоа на сигурно на нови адреси… тоа е многу напната ситуација“, нагласи Јансон Кларин.
Шведската централно-десничарска влада ги заострува законите за да се справи со криминалот поврзан со банди.
Шефот на шведската полиција призна дека завојуваните банди донеле невиден бран насилство во земјата. Минатата година во Шведска се регистрирани 391 престрелка, од кои 62 биле фатални, а во 2021 година од огнено оружје биле убиени 45 лица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Холандија и подари на Украина 24 авиони Ф-16: „Употребата не е ограничена“
Холандија дава 24 ловци Ф-16 на украинските воздухопловни сили што ќе може да ги користи и против цели во Русија.
„Ограничувањата за тоа каде Украина може да ги користи никогаш не беа дискутирани“, рече холандската министерка за надворешни работи Ханке Бруинс СлотБруинс Слот, додавајќи дека употребата не е ограничена ни на границата во близина на Харков.
Министерката во заминување ги негира претходните извештаи дека САД треба да ја одобрат испораката на овие ловци.
Украина очекува да добие 30 белгиски Ф-16, но може да ги користи само против цели во Украина, бидејќи тоа се услови поставени од Белгија.
Европа
(Видео) Зеленски во Шведска: Само заедно можеме да го запреме лудилото од Москва
Украинскиот претседател Володимир Зеленски денеска потпиша билатерален безбедносен договор со Шведска, еден од трите планирани со нордиските земји, бидејќи бара дополнителна воена поддршка од Западот во војната против Русија.
Соопштението доаѓа додека западните земји дебатираат дали да и дозволат на Украина да користи западно оружје за да нападне воени цели во Русија, поддржувајќи офанзива врз североисточниот украински град Харков.
„Можете да видите дека Русија се обидува да ја прошири војната… Само заедно можеме да го запреме лудилото од Москва“, рече Зеленски на потпишувањето на договорот, 13-ти таков договор што Киев го потпиша со западна земја.
Зеленски рече дека ќе потпише билатерални договори и со Норвешка и Исланд.
Воздушната одбрана, производството на муниција и заедничкото производство на оружје се на врвот на агендата на петочниот самит меѓу Зеленски и премиерите на Шведска, Норвешка, Данска и Исланд и претседателот на Финска.
Сите нордиски земји, кои цврсто ја поддржуваат Украина, се членки на НАТО.
„Постојано се повторува, вие буквално не се борите само за сопствената слобода, туку и за нашата слобода и нашата безбедност“, рече шведскиот премиер Улф Кристерсон.
„Ова е причината зошто поддршката на Украина е толку фундаментална, егзистенцијална задача за Шведска и за сите други нордиски земји“, додаде тој.
Претходно овој месец, Шведска соопшти дека се согласила за дополнителна воена помош за Украина во вкупна вредност од 7 милијарди долари во текот на три години, додека во последните недели Норвешка преговараше за билатерален безбедносен договор со Киев.
Данска и Финска веќе потпишаа 10-годишни безбедносни договори со Украина во февруари и април, соодветно.
Европа
Едногодишно бебе паднало низ прозорец во Австрија: „Се обиде да се држи за саксија“
Едногодишно Ддтенце паднало од прозорец на станбена зграда во Отакринг, Австрија и се здобило со сериозни повреди на главата.
18-месечното бебе паднало од прозорец во четвртокот околу 20 часот додека родителите биле во другата соба, зафатени со другото бебе, јавуваат австриските медиуми.
„Се качи преку трпезариската маса на прозорецот од кујната и се лизна надолу“, раскажува сведок.
Како што објаснил, детето се обидело да се потпре на саксија што стоела на прозорецот.
Меѓутоа, бидејќи саксијата не била соодветно потпрена, се превртела и паднала, а момчето паднало по неа.
Малото момче се здобило со сериозни повреди на главата поради што е хоспитализирано и сместено на одделението за интензивна нега.
Според првичните информации, неговиот живот не е во животна опасност.
Австриската полиција ги приведе родителите поради сомнение дека од небрежност му нанеле телесни повреди на нивниот син.