Регион
Колапс во Хрватска: евтанизирани 20.000 свињи поради африканската чума, заразени 900 фарми
Од појавата на африканската свинска чума пред речиси три месеци, 20.000 од нив се евтанизирани во Хрватска, а инфекцијата зафати речиси 900 фарми, што доведе многу фармери во многу тешка ситуација, а големо прашање е дали ќе продолжи одгледувањето свињи во иднина, пишуваат тамошните медиуми.
Вонредниот професор на Факултетот за агробиотехнички науки во Осиек, Владимир Маргета, вели дека заканата за свињарството од африканската чума не се одразува само на бројот на евтанизирани свињи и затворените фарми, каде што се одгледувале.
Според него, околу два-три отсто од вкупниот број свињи во Хрватска во моментот се евтанизирани.
„Сепак, главниот проблем е што епидемијата сè уште не е под контрола и се очекува нејзино натамошно ширење во другите окрузи. Во моментот Осиек – Барањската жупанија е во најголем ризик бидејќи е дом на најголемиот број свињи во Хрватска, па затоа ширењето на епидемијата во оваа област – што е само прашање на време, ќе го нанесе најголемиот удар на целокупното хрватско свињарство“, рече Маргета.
Притоа, посочува, дека не се мисли само на бројот на евтанизираните свињи, туку на сите придружни мерки за заштита, како забраната за трговија, колење и преработка на свињи.
„Во окрузите Вуковар – Срем и Осиек – Барања се произведуваат повеќе од 40 отсто од сите свињи во Хрватска, така што оваа бројка говори сама по себе и за последиците што би ги имала врз секторот на свињарството“, предупредува Маргета.
Тој посочи дека евентуалното рестартирање на производството на моментно затворените фарми може да се воспостави во најдобар случај најрано во 2025 година, што значи дека прекинот на производството ќе биде две години.
„Искуствата на земјите што се соочија со појава на африканска свинска чума, како и нашите претходни искуства поврзани со прекин на свињарството на фармите, укажуваат дека само 15-20 отсто од производителите би се одлучиле да го обноват производството. Со други зборови, со оваа епидемија веќе неповратно загубивме стотици одгледувачи и фарми, што во иднина ќе влијае на намалувањето на вкупниот обем на хрватското свињарство, кое беше на историски минимум и пред оваа епидемија“, рече Маргета за загрепската телевизија „N1“.
Тој предупреди и на проблемот со извозот и консумацијата на свинско месо по оваа зараза, со оглед на тоа што, како што наведе, Хрватска денеска е означена на картата на Европа како жариште на африканската свинска чума и дека ќе биде речиси невозможно да се извезуваат свињи, свинско месо или свински производи, а најдобар начин е да се забрани увозот од Хрватска.
„Исто така, потрошувачката на свинско месо ќе се намали бидејќи, иако потрошувачката на свинско месо заразено со вирусот на африканската свинска чума нема негативни последици врз здравјето на луѓето, сепак психолошкиот момент за оној што го јаде е клучен и тој не сака да ризикува со такво месо. Затоа, покрај падот на производството, голема е веројатноста и да има пад на побарувачката и потрошувачката на свинско месо за што придонесува и моментно високата цена на свинското месо“, вели Маргета.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
Повредени и загинати при судир на воено и цивилно возило на патот Краљево-Рашка
Борбено возило „ПАСАРС“ на војската на Србија денеска околу 13 часот и 10 минути се судрило со цивилно возило кај градот Ушќе на патот Краљево-Рашка, соопшти Министерството за одбрана.
Борбеното возило – противвоздушен самооден артилериско-ракетен систем во колона под придружба на воената полиција се движело кон Рашка.
Според првите информации има повредени и загинати, се вели во соопштението на Министерството.
Регион
(Видео) Maж падна од опасна карпа на Паг и почина, спасена алпинистка
При искачување на опасна карпа на Паг, еден маж почина, а една жена беше спасена во голема операција на хрватската служба за спасување.
„Добивме пријава во 13 часот и 32 минути дека две лица наводно се качувале на карпа кај Метајна. Едното лице паднало и починало. Другото е на карпата. Засега не може да им се пристапи од копно“, рекоа од полицијата.
Покрај полицијата, на местото на настанот има и други служби за итна помош – брза помош, пожарникари.
Малку по 17:00 часот од карпите е спасена жена, откако спасувачите со чамци се приближиле до карпата од морската страна.
Регион
Додик: Нема да ја почитувам одлуката на Уставниот суд
Српскиот лидер во Босна и Херцеговина, Милорад Додик, изјави дека нема да ја почитува одлуката на Уставниот суд на таа земја, кој го оспори изборниот закон за ентитетите и покрај тоа што неговата партија ќе учествува на претстојните локални избори, кои се одржуваат според одредбите на друг државен изборен закон.
„Изборниот закон на Република Српска е уставен и овој правен акт ќе се применува“, изјави Додик за Радио-телевизија на Република Српска реагирајќи на вчерашната одлука на Уставниот суд на Босна и Херцеговина.
Тој суд оцени дека со донесувањето на Изборниот закон на Република Српска е прекршен Уставот на Босна и Херцеговина. На овој начин се оспорува улогата на Централната изборна комисија на БиХ, која е задолжена за организирање и спроведување на изборите.
На ваков потег се одлучија откако високиот меѓународен претставник, Кристијан Шмит, наметна измени во Изборниот законик на Босна и Херцеговина.
Сепак, Додик тврди дека само ќе го почитува Изборниот законик за ентитетите бидејќи тој не бил оспорен од Уставниот суд на Република Српска. Но, државниот е.
И покрај приговорите и отфрлањето на одлуките на Уставниот суд на БиХ, кои властите на Република Српска ги нарекуваат скратени затоа што двајца српски судии не учествуваат во неговата работа, партиите на власт од тој ентитет сепак ќе учествуваат на претстојните локални избори организирани од државната Централна изборна комисија.
Овие избори ќе се одржат на 6 октомври, а ќе се изберат нови свикувања на градските и општинските совети и раководители на 141 општина и град.