Европа
Разбиена криминална банда од Балканот во Франција и Монако: мафијата ја предводел Србин
Криминална група по потекло од Балканот падна во Монако и Франција по опсежна истрага на локалната полиција. Вкупно 19 лица се уапсени под сомнение за криминални активности, како шверц на дрога и оружје, како и перење пари преку лажни фирми, објави „Нова.рс“.
Како што наведува БФМТВ, минатиот вторник беа уапсени 13 лица во Франција и уште шест во Монако како дел од голема полициска операција, која беше резултат на обемна и сложена истрага на Националната управа за борба против организираниот криминал.
Групата падна благодарение на апликацијата „Скај ЕЦЦ“. Инспекторите ги снимиле разговорите разменети на оваа платформа откривајќи криминална мрежа основана на југоисточниот дел на Франција и увоз на многу големи количини дрога за францускиот и европскиот пазар.
Размената на пораките се одвивала во периодот од февруари 2020 година до февруари 2021 година, а врз основа на нив е идентификуван водачот на мафијата, кој има српско потекло.
11-те лица, вклучително и неодамна пензионираниот полицаец, кој работел за правосудната полиција на Монако, беа изведени пред истражен судија во понеделникот вечерта и обвинети како дел од повеќекратната судска истрага. На девет од овие осомничени им е одреден притвор.
Францускиот весник „Ле Паризиен“ наведува дека оваа мафија, чии членови се и српски државјани, се занимавала и со трговија со оружје, вклучувајќи митралези и автомати.
„За време на претресот, запленети се два пиштола, нешто повеќе од 19.000 евра во готовина, часовници и луксузни предмети и блиндирано ‘ауди А8’“, изјави Ен-Софи Колбо, шеф на OCRGDF.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Европа
Украина: Русите го нападнаа Харков, уништени се згради, меѓу повредените има и дете
Украина ги уништи сите 10 беспилотни летала во руски напад во текот на ноќта, но две лица се повредени, а станбени згради во регионот Харков беа зафатени од пожар, соопштија денеска украинските власти.
Воздухопловните сили на „Телеграм“ соопштија дека Русија лансирала и две противвоздушни наведувани ракети. Портпаролот на украинските воздухопловни сили во телевизиски пренос изјави дека руските ракети, најверојатно, биле насочени кон североисточниот град Харков.
Гувернерот на регионот Харков, Олех Синехубов, рече дека три станбени куќи биле запалени, а десетици биле оштетени како резултат на рускиот напад, чија цел, според него, биле и инфраструктурата и станбените области. На фотографиите што ги објави Синехубов на „Телеграм“ се гледаат големи пламени јазици од станбените згради.
„Две лица, меѓу кои и едно 11-годишно дете, се ранети во нападот и се на медицинска помош“, рече Синехубов на апликацијата „Телеграм“.
„Ројтерс“ сè уште не ја потврди независно оваа вест. Москва негира дека цели на цивили во овие „легитимни напади врз воената, енергетската и транспортната инфраструктура на Украина“.
Европа
Повредени двајца полицајци во Париз кога маж им го украл пиштолот и пукал во нив
Двајца полицајци се повредени во престрелка во полициската станица во Париз, кога на еден од нив му бил одземен пиштолот од маж кој претходно бил приведен поради напад со нож врз жена.
„Полицијата интервенираше и го донесе овде, во полициската станица, и тој потоа му го грабна пиштолот на полицаецот“, изјави началникот на полицијата Лорен Нунес.
Обвинителството соопшти дека еден од полицајците е во тешка состојба, пренесува „Монд“.
Полицијата возвратила, а напаѓачот се здобил со повреди во пределот на градниот кош, по што бил пренесен во болница.
Како што информираат од болницата, животот на напаѓачот не е во опасност.
Европа
Путин го избра премиерот
Рускиот претседател Владимир Путин предложи повторно именување на Михаил Мишустин за премиер во неговиот нов претседателски мандат, изјави утрово претседателот на Државната дума, долниот дом на рускиот парламент.
Откако Путин во вторникот положи заклетва за нов шестгодишен претседателски мандат, тамошната влада, според одредбите на рускиот Устав, поднесе оставка.
И додека во последните денови се шпекулираше дека може да има промени на некои важни и суштински позиции, а руските независни медиуми споменуваа евентуално заминување на Михаил Мишустин од премиерската позиција, Путин повторно го предложи за таа функција.
„Претседателот Владимир Владимирович Путин достави до Државната дума предлог за кандидатурата на Михаил Владимирович Мишустин за функцијата премиер. Денеска претставниците ќе донесат одговорна одлука за ова прашање во име на нивните гласачи“, изјави претседателот на Думата, Вјачеслав Володин на апликацијата Телеграм.
Ова е петти мандат на Путин на власт, а тој го номинираше Мишустин за премиер за прв пат во јануари 2020 година, кога Владата предводена од Дмитриј Медведев поднесе оставка по најавените важни уставни промени во политичкиот систем на земјата од страна на претседателот.
Мишустин, кој ќе зборува во Думата пред гласањето, мора да одговори како ќе реши низа задачи што Путин и ги постави на владата, вклучително и „зголемување на одбранбената способност на нашата земја“, рече Володин.