Свет
Израелските сили гранатираа јужни делови на Либан по експлозија на границата

Израелските одбранбени сили (ИД) денеска ги гранатираа јужните делови на Либан, како одговор на експлозијата на безбедносната ограда во близина на кибуцот Ханит.
„ИД одговори со артилериски оган кон либанска територија“, се вели во соопштението на ИД.
Како што јави Си-Ен-Ен, израелските сили претходно ги активираа предупредувањата за можна наводна инфилтрација на терористи во кибуцот Ханит и дека ИД сега ја пребарува областа.
Воените власти соопштија дека експлозијата предизвикала „мали оштетувања“ на оградата.
Си-Ен-Ен објави дека палестинската милитантна група Хезболах со седиште во Либан, најверојатно, ќе влезе во конфликтот за поддршка на Хамас.
ИД претходно оваа недела објави дека распоредила дополнителни десет илјади војници на границата со Либан, како одговор на можен напад од север.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Германија: Татко ја убил партнерката, па влегол во автомобилот со децата и предизвикал страшна несреќа, бебето починало

Страшно злосторство ја потресе германската покраина Баден-Виртемберг. Во неделата навечер, околу 20:00 часот, во градот Валдахтал се случил крвав семеен конфликт кој завршил со тројна трагедија.
Според „Билд“, за време на жестока расправија во станот, 37-годишен маж ја убил својата 34-годишна партнерка „користејќи остро оружје“. После тоа, седнал зад воланот на автомобилот во кој биле и нивните деца – тримесечно бебе и 22-месечно момче, објавува „Хојте“.
Истражителите се сомневаат дека мажот намерно го возел својот автомобил во спротивната лента, каде што се судрил челно со Фолксваген управуван од 29-годишна жена. Тој и бебето починале на самото место од повредите. Двегодишното дете и возачот на Фолксвагенот се тешко повредени и итно префрлени во болница, но нивните животи се надвор од опасност.
Двете возила се запленети, а патот каде што се случила несреќата бил затворен неколку часа. Истрагата е започната истата вечер, а во работата е вклучена и судска медицина од Тибинген за да се утврди точната причина за смртта на жената.
Обвинителството и полицијата наведуваат дека мотивот за овој крвав чин сè уште е непознат.
Свет
Макрон: Израелскиот план за Газа е катастрофа во најава

Францускиот претседател Емануел Макрон остро ги осуди плановите на Израел да ја засили својата воена операција во Газа како катастрофа во најава и предложи меѓународна коалиција со мандат од Обединетите нации за стабилизирање на Газа.
Минатата недела, израелскиот кабинет за безбедност одобри план за преземање контрола врз Газа, во обид да ги прошири своите воени операции на опустошената палестинска територија. Ова предизвика остри критики во земјата и во странство.
„Објавата на израелскиот кабинет за проширување на операциите во градот Газа и бегалскиот камп Маваси и за повторна окупација најавува катастрофа од невидена сериозност што само чека да се случи и движење кон бесконечна војна“, рече Макрон во коментарите што неговата канцеларија ги испрати до новинарите. „Израелските заложници и народот на Газа ќе продолжат да бидат главните жртви на оваа стратегија“, додаде Макрон.
Палестинците денес пријавија најсилно израелско бомбардирање во последните неколку недели источно од градот Газа, неколку часа откако израелскиот премиер Бенјамин Нетанјаху изјави дека очекува прилично брз крај на проширената офанзива.
Шест новинари, вклучувајќи го и дописникот на Ал Џезира, Анас ал-Шариф, беа убиени во офанзивата во близина на болницата Ал Шифа, пренесува ДПА. Сведоците известуваат дека израелските тенкови и авиони ги насочиле кон Сабра, Зејтун и Шеџаја, трите источни предградија на Газа на север од енклавата, предизвикувајќи голем број луѓе да избегаат на запад.
Некои жители рекоа дека претходната ноќ била една од најлошите во последните неколку недели, плашејќи се од можноста за подлабока офанзива во нивниот град, кој е дом на милион Палестинци. Германија пред три дена објави дека го запира извозот на оружје во Израел поради израелскиот план, а Италија предупреди дека новата офанзива може да биде „Израелски Виетнам“.
Свет
Зеленски го предупреди Трамп: Путин ќе се обиде да те измами

Украинскиот претседател Володимир Зеленски изјави дека Владимир Путин ќе се обиде да го измами Доналд Трамп за време на нивниот состанок на Алјаска закажан за овој петок, пишува „Политико“.
„Ја разбираме намерата на Русите да се обидат да ја измамат Америка – нема да го дозволиме тоа. Многу ја ценам решеноста на претседателот Трамп да ја спречи смртта во војната. Многу луѓе ги даваат своите животи секој ден“, рече Зеленски.
„Но, единствената коренска причина за овие убиства е желбата на Путин да се бори и да манипулира со секого што доаѓа во контакт. Ние во Украина добро ја познаваме Русија и затоа Украинците веќе издржаа повеќе од три години тотална војна“, додаде тој.
Зеленски исто така рече дека давањето какви било отстапки на Русија нема да доведе до крај на војната. Зеленски во објава на „Телеграм“ нагласи дека отстапките нема да го одвратат убиецот истакнувајќи дека само во последните 24 часа на фронтовската линија регистрирани се 137 борбени конфликти. Според него, Русија „не го намалува притисокот и не ги брои своите загуби“.
„Русија ја продолжува војната и затоа заслужува посилен притисок од светот“, напиша тој. „Русија одбива да ги запре убиствата и затоа не треба да добива никакви награди или позитивни исходи за себе. И ова не е само морална позиција – тоа е рационална позиција“, напиша Зеленски.
Долгоочекуваниот самит на Алјаска доаѓа во време кога Трамп се обидува да изврши притисок врз Путин да ја прекине војната против Украина. По разговорите од минатата недела меѓу Путин и претставникот на Трамп, Стив Виткоф, во Москва, наводно се разгледува можноста за територијална размена.
Зеленски остро ја отфрли таквата идеја и наместо тоа, повика на воведување силни санкции од САД против Русија. Европските сојузници на Киев исто така инсистираат украинската позиција да се земе предвид за време на преговорите.