Многу сериозно ова прашање го разгледуваме и во рамките на партијата и затоа денеска со мене се и двајцата потпретседатели. Сакаме да ги увериме луѓето што се дел од реалниот сектор и од бизнис-заедницата дека ВМРО-ДПМНЕ е пријател, ВМРО-ДПМНЕ како идна влада има намера сериозно да ја развива Македонија и ВМРО-ДПМНЕ како идна влада има намера сериозно да помага и да ѝ биде партнер на бизнис-заедницата, а не да биде непријател како што тоа се прави сега и со злоупотреба на европско знаменце насила да се наметнуваат законски решенија, меѓу кои што е и ова, солидарниот данок, истакна претседателот на ВМРО-ДПМНЕ, Христијан Мицкоски, за време на посетата на Гевгелија во рамките на кампањата „Важно е! Од тебе зависат промените!“ одговарајќи на новинарско прашање за став во врска со солидарниот данок, кој е обжален пред Уставниот суд.

Мицкоски додаде дека бизнисот заслужува поддршка и мора да престане односот кога власта нема пари, тие да се обезбедуваат преку бизнис-заедницата и граѓаните за да може потоа тие пари да ги дели преку тендери.

„Цениме дека бизнисот заслужува поддршка и цениме дека ние како ВМРО-ДПМНЕ мораме да ја разбиеме стигмата дека кога нема од каде, тогаш се притиска бизнис-заедницата и се притискаат граѓаните за да може Владата да обезбеди денар повеќе, а потоа тој денар повеќе преку наместени тендери во четири очи делумно, нормално да го злоупотреби, барем за тоа постојат основани сомневање“, потенцира Мицкоски и додаде:

„Така што, силна поддршка и порака на поддршка денеска од тука од Гевгелија за локалниот бизнис, но и генерално за бизнисот за Македонија, дека ВМРО-ДПМНЕ како идна влада има намера да биде партнер и пријател на бизнисот и да помогне тие да се развиваат, а развивајќи се, да ги задржиме и луѓето во Македонија, а задржувајќи ги луѓето во Македонија, ќе ја има и Македонија повеќе, ќе нè има и нас повеќе. Мислам дека тоа е природен начин на развивање на настаните“.