На единствениот број за итни повици 112 во ЦУК, вчера во почетокот на ноќта, конкретно 21.30 часот имаше пријава од рекреативен риболовец дека е забележано безживотно човечко тело на вливот на реката Тополка во река Вардар. Конкретно, тоа било во близина на мостот на околу петнаесетина метри од брегот на попречни шипки во речната надојдена вода.

Од Секторот за операции и координација во Центарот за управување со кризи (ЦУК) веднаш биле известени сите субјекти од Системот за управување со кризи за безживотното човечко тело за да се постапи според итниот случај (МВР, ДЗС, ТППЕ Велес, лицето за контакт во Општината Велес како и тимот спасители на вода од Доброволното друштво „Македонски спасител“, за безбедност на вода и планина од Велес). Но, истите не интервенираа вечерта заради опасноста, по учесниците во акцијата, од надојдената вода во Вардар и брзото речно корито. Акцијата координирана на терен од СВР Велес продолжи утрово.

Безживотното човечко телото е извлечено од речната вода денеска, по 10.00 часот, од страна на Единицата за специјални задачи при МВР, а потоа е идентификувано од страна на синот, којшто вчера во 08.30 часот во СВР Велес го пријавил за исчезнат неговиот татко.

Претседателот на ВМРО-ДПМНЕ, Христијан Мицкоски, на денешната прес-конференција рече дека поднесува предлог-закон за измена на Законот за организација и работа на органите на државната управа по скратена постапка.

„Врз основа на членот 71 став 1 од Уставот и врз основа на членовите 139, 144 и 175 од собранискиот Деловник поднесувам предлог-закон за измена на Законот за организација и работа на органите на државната управа по скратена постапка.

Имено, во членот 71 став 1 од Уставот, како и членовите 139 и 144 од Деловникот, е уредено дека право да предлага донесување закон има секој пратеник во Собранието, Владата и најмалку 10.000 избирачи. А со членот 175 од Деловникот на Собранието е уредено дека предлагачот на предлог-законот може да му предложи на Собранието да расправа по него по скратена постапка“, рече Мицкоски.

Тој ја побара поддршката од сите пратеници во македонскиот парламент, без исклучок на која политичка партија ѝ припаѓаат.

„Легитимитетот и легалитетот на ова барање го темелам на изборниот резултат пред неколку недели кога коалицијата ‘Твоја Македонија’, предводена од ВМРО-ДПМНЕ, и новата претседателка, професорката Гордана Силјановска-Давкова освоија 436.000 гласа, односно 561.000 глас. Легитимитетот од страна на граѓаните е јасен, кредибилитетот и легалитетот е исто така јасен“, рече Мицкоски.

„Имено, со овој нов закон, кој веќе е доставен до архивата, се предвидува да бидат формирани или реорганизирани определен број министерства во рамките на самата влада, и тоа ќе почнам со Министерството за економија и труд, кое практично ќе биде министерство што ќе ги опфаќа некои од ингеренциите на старото Министерство за економија, а на тоа министерство ќе му биде додаде сегментот труд за да може работодавците и работниците да бидат на едно место и на тоа место заедно да ги реализираат своите права, дијалог и така натаму, така што Министерството за социјална политика и труд, кое беше досега, ќе биде сега министерство за социјална политика, демографија и млади. Агенцијата за млади и спорт, која постоеше, досега нема да постои и ќе имаме посебно министерство за спорт.

Исто така, некои од надлежностите што ги имаше досега Министерството за економија во делот на рударството и енергетиката ќе бидат дел од надлежностите на новото формирано министерство, а тоа е министерство за енергетика, рударство и минерални суровини.

Некои од ингеренциите што ги имаше Министерството за економија, особено во делот на туризмот, сега ќе бидат присоединети во новото министерство – министерство за култура и туризам.

Ќе имаме ново министерство, кое ќе има задача да спроведе еден многу важен проект, кој ќе ја зголеми транспарентноста, владеењето на правото ќе го намали основаното сомневање за корупција во рамките на администрацијата, а тоа е новоформираното министерство за дигитализација, кое во суштина ќе ги наследи обврските што ги имаше досегашното Министерство за информатичка технологија и администрација.

Ќе имаме исто така ново министерство, тоа е министерство за администрација, така што мислам дека со ваква реорганизација ќе добиеме ефикасност, ќе добиеме осовременување на самата влада и ќе го добиеме, пред сè, она што го ветувавме за време на кампањата, а тоа е да ги подобриме животот и стандардот на сите граѓани во Македонија, без разлика на нивната политичка и партиска припадност“, изјави Мицкоски.

Вчера во 13.53 часот во СВР Битола било пријавено дека на крстосница од улицата „Наум Наумовски“ со улицата „Прилепска“ во Битола се случила сообраќајна несреќа помеѓу патничко возило „фолксваген голф“ со битолски регистарски ознаки, управувано од 65-годишниот Д.П. од Битола и патничко возило „шкода“ со скопски регистарски ознаки, управувано од 53-годишниот Г.С. од Куманово, извести МВР.

„Во несреќата со тешки телесни повреди се здобил возачот Д.П. и бил пренесен во Клиничка болница Битола, каде што подоцна починал. Со телесни повреди се здобила К.С.(53) од Скопје, сопатничка во возилото „шкода“, констатирани, исто така, во Клиничка болница Битола“, соопшти МВР.

Извршен бил увид од увидна екипа од СВР Битола, а по наредба на јавен обвинител телото на починатиот било предадено на обдукција.