Македонија
Доколку Владата сака да ги покачи пензиите нека намали со криминалот, вели Томовски
Ивица Томовски, член на ЦК на ВМРО-ДПМНЕ на денешната дебата насловена „Време за промени во пензиската политика – Нови политика до подобра иднина“ во рамки на кампањата „Важно е! Од тебе зависат промените“ рече дека постојат неколку начини доколку власта сака да ги исполни барањата на пензионерите, а тоа е првенствено да тргне со спречување на високиот степен на корупција, сива економија, како и инфлација.
Постојат неколку начини како владата може да ги задоволи пензионерите. Првенствено треба да спречиме иселувањето на младите, големата корупција, сивата економија, намалениот интерес на владата за решавање на овој проблем и инфлацијата. Мерките кои што владата треба да ги спроведе пред се треба да се вложува во стопанството, односно реалниот сектор и намалување на иселувањето на младите. А тоа може да го направи во три чекори, краткорочно, среднорочно и долгорочно, рече Томовски.
Според Томовски пензионерите наместо да уживаат во пензионерските денови тие сега се приморани преку протести да си ги бараат своите права.
Краткорочното треба веднаш да ги задоволи потребите на пензионерите, бидејќи тука има мајки, татковци, дедовци, кои што учествувале во градењето на оваа држава и те како истите треба да си ги уживаат своите права во пензионерските денови. Додека во долгорочни и среднорочни треба постојано власта да има комуникација со реалниот сектор и да се предвидуваат мерки за нови вработувања, повисоки плати какви што имаше во минатото, а кои оваа власт ги укина, изјави тој.
Томовски потенцираше дека ако пред 15 години имало 5 вработени лица на еден пензионер, денеска имаме 1,6 вработени лица на еден пензионер.
Има еден лош податок во делот на пензиите, ако пред 15 години имало 5 вработени лица на еден пензионер, денеска имаме 1,6 вработени лица на еден пензионер, нагласи тој и додаде дека целта на ВМРО-ДПМНЕ е биде 3 спрема 1, бидејќи како што рече на тој начин ние можеме да ги изедначиме минималната плата со минималната пензија во Македонија.
Она кое што ние како ВМРО-ДПМНЕ ќе го направиме во иднина, а е нашата цел и мисија е тоа да биде 3 спрема 1, односно на тој начин ние можеме да ги изедначиме минималната плата со минималната пензија во Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Во Куманово поставени корпи за отпад со уникатни еколошки пораки
Комуналното претпријатие „Чистота и зеленило“ и Општина Куманово во соработка со Мен енд Маунтен и со поддршка на невладината организација „СОН“ од Гент, Белгија, во текот на вчерашниот ден ги исчистија речните корита во центарот на Куманово.
Во овој дел од реката, се наоѓа и парк за рекреација, кој постојано е посетуван од граѓаните и загадуван со отпад.
Општина Куманово, со поддршка од провинцијата Источна Фландрија во Белгија и невладината организација „СОН“ токму во овој дел од градот поставија 16 нови GENERALKA корпи за отпад.
Во акцијата и чистењето на речното корито земаа учество вработените од ЈКП „Чистота и Зеленило“ и волонтери од здружението Кумановски Акцијаши со голема поддршка од администрацијата на Општина Куманово и градоначалникот Максим Димитриевски.
На секоја од корпите за отпад напишани се уникатни пораки на македонски и албански јазик: „Создавај и не уништувај“, „Фрлете го тука вашето ѓубре – не вашата иднина“, „Твојот град – твој дом“, „Биди решение, а не загадување“, „Користете ме, но не ме злоупотребувајте“, „Загадувањето значи твое труење“, „Престани да зборуваш – почни да делуваш“…..
Идејата е да се покрене свеста на граѓаните и овие пораки да натераат секој што ќе помине оттаму и ќе ги прочита да размисли за неговата одговорност кон околината и заедницата.
„Иако симболичен, ова е многу значаен проект за нас. ЈП “Чистота и зеленило” и Општина Куманово, со поддршка од провинцијата Источна Фландрија од Белгија и во соработка со невладината организација “СОН” од Гент, Белгија, во текот на вчерашниот ден го исчисти речното корито на градскиот кеј и поставија 16 нови GENERALKA корпи за отпадоци. На секоја корпа за отпад испишани се наменски и специфични пораки до граѓаните за тоа како треба да се однесуваат за да ја заштитат животната средина и да го чуваат нивниот град чист. Ова е мотивирачки пример како да ги означиме и другите места во градот со вакви специфични пораки до сите граѓани. Градот Куманово е благодарен“, вели Максим Димитриевски, градоначалник на општина Куманово.
Директорот на Јавното комунално претпријатие „Чистота и зеленило“, Ненад Стојановски, во придружба на заменик директорката на претпријатието, Цветанка Ивановска, апелира до граѓаните да се придржуваат до хигиената и ги повика другите организации што почесто да иницираат вакви еколошки акции:
„Пораките на корпите имаат намера да им укажат на граѓаните да одложуваат отпад на соодветно место. ЈП Чистота и зеленило ги поддржува сите вакви акции и ги охрабрува и другите организации да иницираат и организираат еколошки акции, а ние со нашиот потенцијал и механизација секогаш сме им на располагање. Апелираме до граѓаните да се придржуваат до хигиената“.
СОН е нова белгиска невладина организација со фокус на културата и општеството.
„Со поддршка од провинцијата Источна Фландрија (Белгија) и во соработка со Мен енд Маунтен / GENERALKA среќни сме што можеме да го поддржиме градот Куманово за да создаде поеколошка средина за целото општество “, велат Јан Хозе, претседател на СОН и Катинка Димкароска, член на управниот одбор на СОН.
Македонија
Гаши-Бас: Поддршка ид Бундестагот на патот за членство во ЕУ
Претседателот на Собранието, Африм Гаши, денеска оствари средба со претседателката на Бундестагот на Сојузна Република Германија, Бербел Бас.
На средбата присуствуваше и нашиот резидентен амбасадор, Илбер Села и генералната секретарка на Собранието, Марина Димовска. Поздравувајќи го својот колега со топло добредојде, претседателката Бас ја искажа нејзината лична посветеност, но и посветеноста на пратениците во Бундестагот да се вложат за напредок на нашата земја на патот кон Европската Унија. Изрази почит и пофалби за досегашните успеси и преземени чекори на Република Северна Македонија на овој пат.
„Вашата земја е пример за успешно мултиетничко општество во целиот регион, нешто што е посебно вреднувано од Германија“, потенцираше Бас.
Претседателката Бас, потенцираше дека поканувањето на претседателката на Европската Унија, Урсула фон дер Лајер, на Самитот во Берлин е уште една потврда за германската визија за регионот и извесната европска перспектива на земјите учеснички во овој процес.
Претседателот Гаши изрази особено задоволство за одржувањето на средбата и за поддршката која како држава и Собрание ја добиваме во изминатите децении од германските политичари, институции, бизнисмени и граѓани. Беше упатена благодарност за Резолуцијата на Бундестагот, особено признанието на македонската посебност, не само како признание на македонскиот идентитет, туку како гест на почитување на оваа универзална и цивилизациска придобивка. Ја пренесе одлучноста на новата влада и Собрание по одржувањето на парламентарните избори за продолжување на процесот на евроинтеграции и спроведување на неопходните реформи во клучните области детектирани од Европската комисија. Посебен акцент стави на парламентарната соработка и динамиката на средби на сите нивоа и актуелно, експертизата на Бундестагот за независно парламентарно обезбедување.
Двајцата соговорници беа согласни дека во време на заканувачки предизвици, потребно е поголемо обединување на парламентите во нивната одбрана на демократијата, човековите права, транспаретноста, отвореноста и обезбедувањето на точни информации до граѓаните. Беше констатирано дека тековната соработка треба да продолжи, но и да се отпочне во нови области кои добиваат на значење, како што се обезбедувањето добри законски решенија на поле на енергетиката, користењето на алтернативни и онбовливи извори на енергеија, како и заштитата на животната средина.
Македонија
Во избришаната порака не пишувало „кажете само колку пари треба“, туку „полицијата не презема ништо, тврди дека Вања е избегана“, уверува Туфегџиќ
По денешното судење за убиствата на 14-годишната Вања Ѓорчевска и Панче Жежовски, адвокатот на таткото на Вања, Владимир Туфегџиќ, укажа дека полицискиот началник Дејан Димовски во сведоштвото не дал доказ дека татакото на Вања избришал порака на „Вибер“, во која зборувал за пари што бил спремен да ги даде. Началникот Димовски, објаснувајќи зошто се посомневале во таткото на Вања, Александар Ѓорчевски, рече дека една од причините била избришана порака во група на „Вибер“, која некои родители ја виделе и на полицијата ѝ кажале дека гласела „кажете само колку пари треба“.
„Началникот бил должен да спроведе целокупна постапка и да достави доказ дека тоа е така. Тој денес потврди дека, освен избришана порака, таква содржина во вибер-група меѓу другите родители нема. Кажува свои претпоставки што ги добил како сознание од други родители, па сега јас поставувам прашање, па зошто не е опфатен некој од тие родители денеска да биде дел од постапката. Тврдам, се знае и кој е родителот и кое е лицето. Александар има комуникација на прашање од тоа лице како загрижен родител, одговара на прашање и одлучува по ова, да ја избрише комуникацијата бидејќи смета, вели и самиот, да не сфати полицијата дека ја попречува истрагата. Тоа е лична комуникација во вибер-групата, од која се издвојува еден родител и упатува прашање, на кое тој одговара и потоа одлучува да ја избрише пораката, како што и самиот ми кажа – ‘за ако прочита полицијата, да не ми забележат дека ја опструирам постапката’. Инаку, неговиот одговор е баш така, децидно: што преземаат? – ‘ништо, тврдат дека Вања е избегана’“, рече адвокатот Туфегџиќ во изјава за медиумите по судењето.
Адвокатот тврди дека таткото на Вања, Александар, и неговиот кум Гоце Трајковски, три дена пред полицијата да дознае за смртта на Панче Жежовски побарале снимка од бензинска станица во Велес оти таткото на Вања се раководел од лични чувства, а пријателите од „Сејв сити“ им посочиле дека на снимката има автомобил што се бара, па затоа ја побарале и ја предале на полицијата. Туфегџик вели дека таа снимка е клучна за откривање на целиот случај.
„Јас лично тврдам, да не биле вклучени овие двајца луѓе, ние и денеска ќе имавме состојба при што Панче и Вања ќе се водеа за исчезнати и немаше да бидат пронајдени и во тоа сум сигурен“, рече адвокатот Туфегџиќ.
Ставот на одбраната е дека полицијата постапувала, без да следи правила и стандарди за постапување во вакви случаи, постапувале според свои видувања, а денешното сведочење на началникот го потврдило тоа.
Туфегџик сведоштвото на началникот го оцени како контроверзен исказ за кој ќе приговараат како одбрана, а по сослушувањето на таткото на Вања, за целосно расчистување на работите, ќе побараат негово соочување со началникот и неговиот колега, со кои бил во постојан контакт.