Вчера, почна асфалтирањето на улицата Столтенбергова, која ги поврзува Градскиот парк, Градскиот стадион и кејот на реката Вардар и која е опфатена во меѓуопштинската соработка на Град Скопје и Општина Центар. Асфалтирањето го работи ЈП „Улици и патишта“ и се одвива на потегот пред Градскиот стадион, каде што беше вградена камена коцка, односно калдрма.

„Вчера, почна асфалтирањето на потегот пред Градскиот стадион ‘Тодор Проески’, кој беше покриен со калдрма, која беше навистина многу оштетена. Со асфалтирањето на овој потег практично се изедначува целиот круг околу Градскиот стадион, со што се доби целина земајќи го фактот што единствено на овој потег имаше калдрма “, вели градоначалникот на општина Центар, Горан Герасимовски.

„Со меѓуопштинска соработка со Град Скопје, претходно, во август, беше реконструирана и улицата Славејко Арсов на Водно, каде што беа поставени нов асфалт и нови рабници.
Општина Центар ќе продолжи да вложува во инвестиции во инфраструктурата со цел да се зголеми безбедноста на пешаците и возачите, но и да се нормализира одвивањето на сообраќајот“, велат од Општина Центар.