Македонија
Подобри услови за вадење документи кај нас имаа 215 белосветски криминалци, велат од ВМРО-ДПМНЕ

Од ВМРО-ДПМНЕ велат дела македонските граѓани при валидни и важечки лични документи се принудени да вадат нови поради власта на СДСМ, која ги обврзува да го сторат тоа до февруари.
„Едно просечно семејство, за да извади нови документи, треба да потроши над 180 евра, многу време и нерви. Фотографиите од редици граѓани што брзаат да извадат документи потсетуваат на некоја земја од третиот свет, каде што пред хангари, во девалвирачки услови, под секое достоинство, граѓаните чекаат редици со часови“, изјавија од ВМРО-ДПМНЕ.
Според нив, за ова директна одговорност имаат Оливер Спасовски и Владата на СДСМ.
„Патем, да биде поапсурдно, подобри услови за вадење документи имаа 215 белосветски криминалци, наркодилери, убијци, мафијаши и слични ликови, кои добија сосема нови пасоши од просториите на МВР со злоупотребен идентитет, и тоа пред само некое време. Тие криминалци имаа ВИП-третман во споредба со македонските граѓани, кои на дожд, ветер и студено време чекаат пред хангар да се фотографираат за документ бидејќи власта на СДС ги обврзува“, завршуваат од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Откако МВР призна вина, началникот на Тошковски мора кривично да одговара

„Откако МВР ја призна вината и се потврди она што го говореше СДСМ, дека началникот на ОВР Демир Хисар, Роберт Мартиновски, постапувал незаконски, министерот Панче Тошковски не смее да се обидува да го заташка случајот“, велат од СДСМ.
„Не е доволно само да се води постапка пред внатрешна контрола. Тошковски е должен веднаш да поднесе кривична пријава и да обезбеди процесуирање на началникот пред лицето на правдата. Нема простор за изговори.
Истото важи и за Основното јавно обвинителство, кое по службена должност мора да постапи и кривично да го гони началникот за прекршување на законите.
Ако ОЈО тоа не го направи, ќе значи директна заштита на Мартиновски, а со тоа и на Панче Тошковски.
СДСМ бара ОЈО да покаже дека законот важи за сите, особено за началниците на Тошковски, и да стави крај на злоупотребите на партиската полиција во служба на ДПМНЕ.
Полицијата мора да биде заштитник на граѓаните, а не средство за политички прогон и заплашување“, соопшти СДСМ.
Македонија
„Влен“: Бујар Османи е пример за неефикасно и незаконско работење

„Во својата политичка кариера, Бујар Османи секогаш се грижел само за својата функција и личен напредок, но никогаш за интересот на граѓаните. Тоа не го тврдиме само ние, тоа го потврдуваат и официјалните институции на државата. Државниот завод за ревизија има изготвено повеќе негативни извештаи за неговото работење, меѓу кои и извештајот за времето кога беше министер за здравство (2008–2011)“, велат од „Влен“.
„Во 2010 година, Државниот завод за ревизија објави извештај за Министерството за здравство за 2009 година, за период во кој Османи беше министер. Извештајот констатира:
Незаконско користење на службени возила – без налози, без месечни извештаи, без збирен извештај за километража; исплатени 4,58 милиони денари за деривати без верификација и усогласување на фактурите.
Сервисирање на возилата без докази – исплатени 1,4 милиони денари за сервисирање без записници за квалитативен прием.
Незаконски вработувања преку агенции – ангажирање лица на проекти без да е предвидено со Правилникот за систематизација на работните места.
Сомнителни додатоци за членовите на Комисијата за јавни набавки – исплатени 410 илјади денари за наводен ангажман надвор од работно време, без докази за истиот.
Овој извештај е доказ дека Бујар Османи не само што не оставил трага на развој и подобрување на здравствениот систем, туку напротив – неговото раководење било пример за расипничко и незаконско трошење на јавните пари.
Денес, истиот тој човек кој добивал негативни извештаи од државните ревизори, бара доверба од граѓаните на Чаир за да го продолжи своето незаконско работење и на локално ниво. Граѓаните имаат право да знаат дека ваквите незаконски трошења се мерени со милиони потрошени без контрола, без одговорност и без законска основа. Чаир не е општини која треба да биде засолниште за незаконска работа на Бујар Османи додека неговата ДУИ е опозиција“, се наведува во соопштението на „Влен“.
Македонија
Нов топлотен бран во наредните денови, се очекуваат температури до 40 степени

Времето денеска ќе биде сончево и многу топло. Ќе дува слаб до умерен ветер од североисточен правец. Минималната температура ќе биде во интервал од 11 до 19, а максималната ќе достигне од 33 до 39 степени.
Во Скопје, сончево и многу топло со слаб до умерен ветер од североисточен правец. Минималната температура ќе се спушти до 18, а максималната ќе достигне до 39 степени.
Времето во наредните денови
Под влијание на многу топла воздушна маса од југ во текот седмицата времето ќе биде сончево и многу топло со појава на локална облачност преку денот. Дневната температура насекаде ќе биде над 30°C, а наместа се очекува да достигне и 40°C.