Македонија
Бугарската блокада за Македонија предизвика жестока дискусија во Европскиот парламент, Денков се правда дека Бугарија не е виновна
Жестока дискусија меѓу двајца бугарски и еден германски пратеник во Европскиот парламент во Стразбург поради блокадата на Северна Македонија од страна на Софија.
Бугарските десничарски европратеници влегоа во вербален судир со пратеници на либералите и зелените поради блокадата на Северна Македонија во ЕУ, во Европскиот парламент во Стразбур, на седница на која гостин беше бугарскиот премиер Николај Денков, пишува „Дојче веле“.
Најпрвин европратеникот Ангел Џамбаски, кој доаѓа од редовите на бугарското ВМРО, го критикува претседавачот на либералната групација во ЕП, „Обнова на Европа“, забележувајќи му дека „не споменал ниту еден збор за репресијата, насилствот, и негирањето на правото на самоопределување“, против Бугарите во Македонија.
Потоа, пратеникот на зелените од Германија, Рајнхард Бутикофер, му порача на Денков дека во обраќањето „ниту еднаш не го споменал името Северна Македонија, земја чиј влез во ЕУ досега беше блокиран од Бугарија“.
„Може ли некој да ги оспори искрените европски аспирации на Северна Македонија, која дури си го смени и името за да ѝ ги отвори вратите на Европа? По говорот на омраза од г. Џамбаски, би сакал да ве прашам, г. премиер, што ќе сторивте за да ја отворите вратата за Северна Македонија?“, го праша Бутикофер бугарскиот премиер Денков.
Потоа се јави уште еден бугарски европратеник, Андреј Слабаков, исто така член на бугарското ВМРО, кој му реплицира на Бутикофер.
„Сакам да му порачам на колегата од зелените дека додека тепаат и убиваат Бугари и им забрануваат да се самоопределат, не кажувајте ми дека Џамбаски користи говор на омраза, туку дознајте што се случува во Македонија“, рече Слабаков.
Бугарскиот премиер Денков наведе дека неговата земја е првата што ја признала независноста на Северна Македонија, но и дека нема други барања, освен она што беше договорено минатата година со т.н. француски предлог. За жал, рече тој, во текот на годините нашите односи се влошија и не мислам дека Бугарија е виновна за тоа. Затоа сакам јасно да кажам дека во моментот Бугарија нема никакви други барања кон Северна Македонија, освен оние наведени во одлуката на ЕУ од минатата година.
„Денес, нема односи меѓу Бугарија и Северна Македонија, има односи меѓу Северна Македонија и ЕУ. Тие мора да се исполнат од Северна Македонија за да се отвори преговарачкиот процес. И од тој аспект не прифаќам никаква критика за нашата земја“, рече Денков.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Денеска без струја делови од Аеродром, Сопиште и Зелениково
Поради планирани прекини во електро снабдувањето денеска, без електрична енергија ќе бидат следните корисници:
– Во период од 09.00 до 15.00 часот дел од корисниците во Тоар, Ново Село, Градовци, Гумалево, Орешани, Смесница, Тисовица, Дејковци, Добрино, Пакошево. (општина Зелениково)
– Во период од 09.00 до 12.00 часот дел од корисниците од село Горно Соње (кај црквата) (општина Сопиште).
– Во период од 09.00 до 14.00 часот во Поликлиника Јане Сандански (општина Аеродром)
Македонија
Времен прекин на вода за жителите на улицата Васил Стефановски 16 во Скопје
Од ЈП Водовод и канализација – Скопје, изветсуваат дека денеска поради изведување на водоводен приклучок ф-80 мм на ул. Васил Стефановски 16, прекинато водоснабдување ќе имаат корисниците на дел од истата улица.
Водоснабдувањето ќе биде прекинато од 09:00 часот до завршување со работните активности, информираат надлежните.
Македонија
Променливо облачно време со сончеви периоди
Времето ќе биде променливо облачно со сончеви периоди. Наместа ќе има услови за слаб локален дожд. Ќе дува слаб до умерен ветер од јужен правец. Минималната температура ќе биде во интервал од 2 до 13, а максималната ќе достигне од 16 до 20 степени.
Во Скопје променливо облачно со сончеви периоди. Ќе дува слаб до умерен ветер од југоисточен правец. Минималната температура ќе се спушти до 8, а максималната ќе достигне до 20 степени.
Во деновите од викендот ќе се задржи променливо облачно и посвежо време со услови за слаб локален дожд. Потоа следува период на стабилно и тивко време со ниски утрински температури. По одделни котлини ќе има услови за појава на утринска магла.