Македонија
Маричиќ: Со фокусот на ЕУ и со силната поддршка на земјите членки продолжуваме по европскиот пат и зацртаната цел – Македонија во ЕУ до 2030

Заменик-претседателот на Владата за европски прашања, Бојан Маричиќ, одржа завршна прес-конференција за 2023 година. На конференцијата вицепремиерот направи рекапитулација на најважните теми според динамиката за 2023 и го истакна успешното реализирање на скрининг-процесот.
Маричиќ ја истакна својата благодарност до вклучените институции, кои беа дел од најважниот процес за евроинтеграција на државата, почетокот за преговорите за членство.
Вицепремиерот ја назначи подготвеноста за следната фаза од преговорите за која неопходно е завршување на обврските од преговарачката рамка за пристапување на Северна Македонија во членство во Европската Унија, усвоена на 19 јули 2022 година.
„Покрај двата патоказа (патоказ за владеење на правото и патоказот за реформа на јавната администрација) и акцискиот план за унапредување на правата на заедниците помали од 20 % од населението во Република Северна Македонија, кои веќе се испратени до Европската Унија, ни останува и завршувањето уште една клучна обврска, а тоа се уставните измени. Целосна наша, домашна одговорност. На секој од нас и особено на секој пратеник“.
„Во согласност со новата методологија и преговарачката рамка, Северна Македонија имаше обврска да подготви три патокази, кои треба да ја рефлектираат политичката заложба за спроведување на клучните стратешки реформи преку дефинирање краткорочни и долгорочни цели, кои ќе кореспондираат со рокот 2030 година“.
Со подготовката и испраќањето на патоказите, Маричиќ истакна дека предвидените мерки предвидени во патоказите имаат цел деполитизирана, ефикасна, ефективна и одговорна јавна администрација, која обезбедува висококвалитетни политики и лесно достапни услуги за граѓаните и деловните субјекти, кои се засноваат на европските принципи, и вреднува и придонесува за одржлив економски раст, владеење на правото, унапредување на судската власт, пред сè, преку зајакнувањето на независноста на правосудниот и обвинителскиот систем, борба против организираниот криминал и корупција, социјална кохезија и благосостојба.
За крај, Маричиќ истакна дека уставните измени со ништо нема да му наштетат на нашето мултикултурно македонско општество, а со кои во исто време ќе се добие пристап кон нови европски фондови и кон отворање на поглавјата, кои ќе ни донесат реформи по европски стандарди.
„Да ја преземеме одговорноста, да се покажеме достојни на предизвикот за да го направиме новиот чекор за поблиску до евроинтеграцијата. Да постигнеме политички консензус за ова прашање, не заради партиските придобивки, туку заради заедничката иднина – заедно во државата до целта за да бидеме заедно и еднакви со другите во Европската Унија.
Уставните измени се влог за нашата иднина, без да изгубиме ништо. Напротив, ја прави европската перспектива на земјата реална и остварлива.
Целта е да не го пропуштиме моментот на позитивната политичката атмосфера и заложбата на земјите членки за проширување на Европската Унија и да поентираме во наша полза.
„Нашата мотивација да остане во фокусот на Европската Унија и со силната поддршка на земјите членки да продолжиме по европскиот пат и зацртаната цел – Северна Македонија во ЕУ до 2030“.
Да бидеме дел од семејството на европското заедништво, солидарноста и економскиот напредок. Да ги искористиме достапните и понудени фондови на Европската Унија за реформи според европски стандарди. Исправени сме пред шанса што мораме да ја искористиме без дилема. Без грижи и без страв, туку со уверување дека и тоа ќе придонесе за просперитет на државата и граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Бендевска: Да го продолжиме заветот од Илинден и пораката од АСНОМ

По повод 2 Август – Денот на Републиката, во име на претседателот на Собранието на Република Северна Македонија, Африм Гаши, потпретседателката на Собранието на Република Северна Македонија, Весна Бендевска, заедно со собраниска делегација во состав: Бране Петрушевски, Никола Коњановски, Даниела Николова и Даниел Стојчевски, одбележа 81 година од Првото заседание на АСНОМ, во Меморијалниот центар АСНОМ во Пелинце.
„На хероите на двата Илиндена кои се жртвуваа за денес да можеме да бидеме свои на своето, да им ветиме уште еднаш дека денешните генерации нема да го заборават заветот што ни го оставија. Да ги насочиме нашите погледи, стремежи и напори од заедничкото минато, кон заедничката сегашност и иднина. Да го продолжиме заветот од Илинден и пораката од АСНОМ“ – порача потпретседателката Бендевска.
Македонија
(Фото) Сиљановска-Давкова: Мора да го искорениме плевелот на корупцијата и криминалот, време е за нова пролет на нашата македонска република

Претседателката Гордана Сиљановска-Давкова, денеска се обрати на чествувањето на 2 Август – Илинден, Денот на Републиката на Мечкин Камен во Крушево.
Во својот говор, Сиљановска-Давкова рече дека е „време за нова пролет на нашата македонска република, за навраќање на републиканските корени“.
„Што значи тоа? Македонските граѓани од својата република очекуваат барем две нешта ̶ слобода и правда. Кога зборувам за слобода, не мислам само на политичката, туку и на економската, на академската, на културната, на социјалната… Кога зборувам за правда, не мислам само на правосудството, туку и на социјалната, еколошката и на генерациската правда. Не смееме да изумиме дека предуслови за слободата и за правдата се владеењето на правото и еднаквоста пред законот“, истакна претседателката.
Таа додаде дека „мора да го искорениме плевелот на корупцијата и на криминалот“.
„Никој не смее да биде недопирлив, независно дали е поранешен или актуелен политичар или функционер, судија или влијателен бизнисмен. За правдата да биде неселективна и навремена, потребни се забрзани и длабоки реформи во правосудството, а тие почнуваат со европска правна рамка, но и со европски критериуми на регрутирање, како и со европски стандарди на функционирање и одговорност“, вели Сиљановска-Давкова.
Според неа, потребен ни е здравствен систем по мерка на здравјето на пациентите и на нацијата. За креативните умови, потребни се инвестиции во образованието и науката, во истражувањето, во развојот и дигитализацијата.
Претседателката се осврна и на пожарите.
„Деновиве, републиката ни е во пламен. За помалку шумски пожари, потребен е не само правен, туку и ефикасен институционален систем, вистински луѓе на важни позиции, вградена превентивна и волонтерска димензија, стимулативни мерки за пожарникарите, пожарникарството и за волонтерите. И овие активности се во ек. За да се заштити здравјето на луѓето и на природата, мора да ставиме крај на дивите депонии и на нивното палење, но и да имаме контрола врз палењето“, вели претседателката.
Сиљановска-Давкова истакна дека имаме потреба од длабоки и суштински реформи во секоја област по европска мерка: со заштитени слободи и права, со владеење на правото и бескомпромисна борба со корупцијата; со стратегиски партнерства со државите со заеднички вредности и интереси; со независни и функционални институции; со компетитивна економија и со капитални инвестиции; со партиципативна политичка култура.
„Ние не сме стебло без корен. Нашата слобода и нашата република се вкоренети во европската пролет на народите, во демократските и хумани визии на „Млада Европа“. И затоа, на оној што ќе ни рече „вие сте млад народ со млада држава“, ќе му одговориме дека сме чеда на Гоцевата визија за „Млада Европа“ обединета Европа, и за светот како поле за културен натпревар на народите!
Колку и да ни е тешко, не треба да се обесхрабруваме од пречките и препреките. Сме опстоиле и сме надминале и потешки проблеми. Не сме сами. Имаме пријатели – демократи кои го почитуваат нашето право на национален и културен идентитет, на граѓански дигнитет и интегритет зашто и самите го сакаат и уживаат. Верувам во нивната поддршка и помош. Тие не се плашат да укажат и да се спротивстават на двојните стандарди и на анахроните обиди за ревизија на историјата.
Ние не се откажуваме од природниот пат кон членството во ЕУ, оти отсекогаш сме дел на Европа: географски, историски и културно, зошто да не и политички. Едноставно, ние балканските народи и нации сме биле, сме и ќе останеме Европејци.
Цврсто сме решени како што беше европски зацртано да стигнеме до целта до 2030 година, европеизирани по словото на Копенхагенските критериуми!“, рече претседателката Сиљановска-Давкова.
Македонија
Филков од Пелинце: АСНОМ нека ни биде потсетник – патот на правдата бара храброст, истрајност и одговорност

Министерот за правда, Игор Филков, беше дел од владината делегација која оддаде почит по повод 81 година од Првото заседание на АСНОМ, во Меморијалниот центар АСНОМ во Пелинце.
„Денес сме овде, во Меморијалниот центар АСНОМ во Пелинце, за да оддадеме почит на државничката визија и храброста на генерациите кои пред 81 година го поставија темелот на нашата државност.
Првото заседание на АСНОМ не е само историски момент, туку жив доказ дека борбата за правда, слобода и достоинство е темел на нашето постоење како народ и држава.
Како министер за правда, должност ми е да го чувам тој завет – да се грижам за правна држава, за независни институции и за заштита на човековите права.
Нека ни биде потсетник – патот на правдата бара храброст, истрајност и одговорност. АСНОМ ни остави обврска, а ние имаме должност таа обврска да ја преточиме во дела“, истакна министерот Филков.