Македонија
Тренчевска им честита Нова Година на сите работници и посака повисоки плати и поквалитетни работни места во претстојната година
Министерката за труд и социјална политика, Јованка Тренчевска се обрати на презентацијата на новата Mетодологија за пресметка на синдикалната кошничка, настан во организација на Сојузот на синдикати на Македонија.
Тренчевска во своето обраќање на почетокот истакна дека е значително задоволна што токму во нејзиниот мандат се направени најголемите исчекори во подобрувањето на правата на работниците. Посочувајќи на: недела неработен ден, новиот предлог Закон за работни односи, новиот колективен договор, Законот за минимална плата која континуирано ќе се зголемува.
Министерката истакна дека работата која се карактеризира со компетенции, знаења и вештини го претставува столбот на општеството и дека плодовите од трудот кој се вложува се манифестираат во плата која не само што ќе го издржува работникот туку ќе овозможи на нив и на семејствата достоинствен живот.
„Со задоволство најавувам значаен исчекор во оваа насока – воведување нова методологија за пресметка на минималната синдикална кошничка. Оваа методологија ќе ни овозможи да ги анализираме вистинските и релевантни потреби на семејствата во реално време, олеснувајќи го формулирањето на политики кои промовираат економски развој, ја намалуваат сиромаштијата и го подигнуваат севкупниот квалитет на живот за нашите граѓани“ рече Тренчевска.
На крај таа истакна дека граѓаните ги препознаваат чекорите на Владата во насока на подобрување на квалитетот на живот на работниците.
„Верувам дека граѓаните го препознаваат значењето на нашите колективни напори во обликувањето на општество каде што се одржува достоинството на трудот, а наградите од работата се сразмерни на потребите на нашите граѓани кои се развиваат. Заложбата на Владата на Република Северна Македонија за оваа кауза останува непоколеблива и заедно ќе го изградиме патот кон поправедна и попросперитетна иднина за сите“ рече Тренчевска.
На крај министерката им честита Нова Година на сите работници и посака повисоки плати и поквалитетни работни места во претстојната година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кавадарци му предаде 220 безбедносни камери на МВР и се вклучи во проектот „Безбеден град“
Со повеќе од 220 камери на територијата на градот кои денеска му беа предадени на Министерството за внатрешни работи, Кавадарци денеска се приклучи на проектот „Безбеден град“ заедно со Куманово, Тетово и Скопје.
Министерот за внатрешни работи Панче Тошковски денеска беше во работна посета на Општина Кавадарци каде оствари средба со градоначалникот Митко Јанчев по повод добивањето директен пристап на МВР – ОВР Кавадарци во современиот мониторинг центар, кој е во состав на општината.
„Овој директен пристап во сопствените простории до системот ќе биде во насока на координирано, брзо и ефикасно работење на полицијата заедно со локалната власт во интерес на јавната безбедност на граѓаните на Кавадарци.Со овој систем од над 200 камери кој ќе го имаме во рамки на системот на министерството значително ќе го подигнеме квалитетот на работењето на полицијата. Факт е дека криминалитетот во Кавадарци е значително намален во изминатиот период и очекуваме со пристапот на МВР до овој систем и посветеното работење уште повеќе да се подобри безбедносната состојба во општината. Ние како министерство сме фокусирани максимално на проектот којшто е поврзан генерално со зголемување на безбедноста на граѓаните на целата држава, проектите од ‘Безбеден град’ како во Кавадарци, така и Скопје, Куманово и Тетово. Ќе сториме сѐ во најбрз можен рок да ги ставиме во употреба сите тие технолошки системи во овие четири града, а понатаму на целокупната територија се со цел да добиеме едно побезбедно општество“, потенцираше министерот Тошковски.
Кавадарци во изминатите пет години постави над 220 камери на територијата на градот со цел заштита на урбаната опрема.
„Истите камери со меморандум за соработка ги префрламе на ОВР Кавадарци каде полиција ќе делува првентнтивно во заштита на безбедноста на жителите на Кавадарци. Со поставување на камерите, криминалитетот последните четири години е во драстичен пад, а огромен број од откриените кривични дела се откриени заради присуството на камерите“, нагласи градоначалникот на Кавадарци, Митко Јанчев.
Македонија
Јаболкото „ајдарет“ ќе се продава по минимална цена од 18 денари
Од Министерството за земјоделство, шумарство и водостопанство (МЗШВ), преку соопштение, вечерва информираат дека и денеска се разговарало за пласманот на јаболкото од оваа реколта.
Министерот Цветан Трипуновски во писмена изјава по средбата со откупувачи на јаболка во Ресен, наведува дека денеска имале втора средба во рок од 10 дена.
– Откупувачите ги соопштија цените и тие веќе од понеделник треба да бидат истакнати на секое откупно место. И она што јас можам да го ветам према земјоделците, е, дека процесот ќе го следиме преку Земјоделскиот инспекторат, да помине сѐ согласно законите и процедурите и она што сме го договориле, истакнува министерот.
Трипуновски додава дека ќе се следи состојбата и секоја тенденција за зголемување, согласно потребите на пазарот, ќе има и корекција на самата цена.
– Овојпат за првпат како Министерство покажавме како на заедничка маса помеѓу откупувачите и земјоделците можеме да извлечеме некои цени, што, се надевам, дека ќе бидат прифатливи од двете страни, додава тој.
Тој посочува дека во наредниот период, Министерството останува отворено за да се разговара за сите програми и сите поддршки што треба да ги дава, како и за измена на законите и процедурите што ќе значат „дефинирање на одредени слабости што низ годините се случувале во текот на откупот“.
Според еден од откупувачите, како што се додава во соопштението, на денешната средба се дошло до решение да оваа сезона се започне со минимална цена со што јаболкото од прва класа „ајдарет“ да биде до 18 денари со тенденција на пораст. Сортите да бидат со минимални цени од 20 до 22 денари. Но, сепак, се додава во соопштението, сѐ ќе зависи од сортата на јаболка.
– Доколку имаме добри земјоделци, ќе имаме и добри фирми понатака. Откупната цена на индустриското јаболко ќе започнува со цена од 8 денари со тенденција од побарувачката и таа цена да расте кон повисока цена, се цитира откупувач во соопштението на МЗШВ.
Македонија
СДСМ: Мицкоски лаже, во изминатите години ние ја зголемивме просечната плата до над 41.000 денари
„Христијан Мицкоски денеска повторно излажа. После седум години постојан раст на просечната плата, во јули годинава има пад за речиси 1.000 денари, според официјалните податоци од Државниот завод за статистика“, велат од СДСМ.
„Тоа се фактите. Просечната месечна исплатена нето-плата по вработен, во јули годинава изнесувала 40.961 денар и е за 1.000 денари пониска од јуни кога изнесуваше 41.939 според податоците од Државниот завод за статистика. СДСМ во изминатите години ја зголеми просечната плата до над 41.000 денари. Во времето на ДПМНЕ просечната плата беше на половина, едвај 20.000 денари. Во 2015 година, во времето на ВМРО-ДПМНЕ просечната плата изнесуваше 20.853 денари. Платата постојано растеше со СДСМ со години наназад, во 2020 година просечната плата беше 28.294 денари, во 2022 година беше 34.364 денари а во 2024 година достигна над 41.000 денари. Тоа е таа разлика. Дојде ВМРО-ДПМНЕ и Мицкоски и платите почнаа да паѓаат. Платите се намалуваат а цените остануваат високи и растат. Со вакви погрешни економски политики на Мицкоски стандардот на граѓаните само ќе опаѓа“, се вели во соопштението на СДСМ.