Македонија
Јавните институции злоупотребиле европски пари во рамките на просекот, Битиќи уверува дека нема ништо спектакуларно
Јавните институции, кои злоупотребиле европски пари добиеnи преку разни фондови, проекти и програми, злоупотребувале во рамките на просекот во ЕУ, вели вицепремиерот за европски прашања Фатмир Битиќи. Тој не ги откри имињата на јавните институции поради предистражните постапки, но најави дека ќе ги соопшти кога ќе имаат исход од постапките.
„Она што е увидено како евентуална злоупотреба е во рамките на просекот што се увидува во секоја земја членка на Европска Унија, дури и во земјите потенцијални кандидати за членство во ЕУ. Ништо спектакуларно, морам да признам, тоа е 5 отсто од средствата што се користат. Сè уште нема исход од ниедна од постапките во однос на конечниот исход во однос на тоа дали ќе треба да се вратат средства. Во Европската Унија постои еден механизам, ако се увиди дека има неискористеност или искористеност на средства што не е ниво на планирани и признати трошоци, тие во суштина или се намалуваат од други програми или се бараат од крајниот корисник. Во овој случај тоа се јавни институции, веројатно штом добиеме одлука за која било од нив, ќе им се намали од редовните програми и секако ќе се бара лична одговорност од луѓето што ги воделе институциите во тој одреден временски период“, рече вицепремиерот Битиќи по панелот „Економските придобивки од интеграцијата во ЕУ за компаниите и граѓаните во Северна Македонија“, кој е дел од кампањата на Владата, која треба да нѐ доближи до Европската Унија.
На почетокот на минатата година почна судењето на Лидија Димова, поранешна директорка на Националната агенција за европски образовни програми и мобилност, осомничена за злоупотреба на 320.000 евра европски пари, а обвинет за злоупотреба на европски пари уште во 2021 година е поранешниот државен секретар во Министерството за информатичко општество, Јахи Јахја. Осомничена за злоупотреба на европски пари е и поранешна сметководителка во ФФМ за проневера на над еден милион евра, но за некаков вид злоупотреби медиумите изминативе години јавуваа речиси во секоја институција што имала пристап до европски пари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Нестабилно време со дожд и грмежи до среда
По врнежите и невремето по кое во текот на ноќта полавени беа подруми во Охрид, од УХМР најавуваат дека до среда ќе се задржи нестабилно време, претежно во попладневните часови со локален пороен дожд и грмежи.
Во четврток ќе има услови за краткотраен дожд, претежно во планинските подрачја, а преодно стабилизирање на времето се очекува во петок.
Температурите ќе бидат без значителна промена.
Македонија
Делови од Аеродром, Карпош и Ѓорче Петров утре без струја
Без електрична енергија утре ќе останат делови од општините Аеродром, Карпош и Ѓорче Петров.
Како што соопшти РЦУК – Скопје, без струја во периодот од 09:00 до 15:00 часот ќе останат корисниците на дел од село Долно Лисиче, реонот околу чаталот, ул.10 во општина Аеродром, од 10:30 до 14:30 часот дел од улица 16, на патот кон Визбеговово општина Карпош, а од 13:00 до 14:30 часот објектите на градинката Росица, на ул.„Мечкин Камен“, бр.45А. во општина Ѓорче Петров.
Македонија
Скопските и тетовските пожарникари гасеа три огнови на отворено, соопшти ЦУК
Во изминатото деноноќие Центарот за управување со кризи информира дека биле евидентирани три пожари на отворено.
Регионалниот ЦУК Скопје соопштил дека БППЗ на Град Скопје во изминатото деноноќие имала две помали интервенции поради запалено ѓубре и тоа на ул. „Ферид Заири“ во Општина Чаир и кај Езерото Треска во Општина Сарај.
Регионалниот ЦУК Тетово известил дека ТППЕ Тетово имала една помала интервенција поради запалена ниска вегетација кај село Чифлик во Општина Желино.
Центарот за управување со кризи соопшти дека изминатите 24 часа имало вкупно 1.491 повици на Единствениот повикувачки број за итни случаи 112. Од нив „реални“ повици биле 62,84 отсто, а 37,16 отсто биле за други потреби на граѓаните што не биле итни.
Кон полиција биле упатени 63,18 отсто, кон итната медицинска помош 29,09 проценти, кон пожарникарите 2,73 отсто, a кон АМСМ 1,36 отсто од повиците кон бројот 112.