Македонија
Бочварски и Костадиновска-Стојчевска: Инвестициите во инфраструктурата и културата се влог за идните генерации

Инвестициите во инфраструктурата и културата се траен влог за идните генерации, беше заклучено на денешната панел-дискусија посветена на инвестициите во овие два сектора во рамките на годишната конференција „Година на европски можности“.
На панел-дискусијата, покрај министрите за транспорт и врски и култура, Благој Бочварски и Бисера Костадиновска-Стојчевска, учество зедоа и Ејуп Рустеми, директор на ЈП за државни патишта, Зоран Трифуновски, директор на „Железница – Инфраструктура“, потоа професорката од Институтот за македонски јазик, Весна Костовска, и Зоран Павлов, директор на Управата за заштита на културното наследство.
Во своето обраќање министерот Бочварски истакна дека оваа Влада реализира најголем обем капитални инвестиции во висина од над 2 милијарди евра.
„Инвестициите во инфраструктурата имаат клучно значење за развојот на економијата, регионалното поврзување и тоа е клучното прашање што Владата го креира за реализација на капиталните проекти. Со ова креиравме политики на развој на градежниот сектор и отворање нови работни места. Само минатата година имаме 707 милиони евра реализација на капитални инвестиции во патишта, железници, гасоводна мрежа, водоводи и канализации и социјални станови.
И убеден сум дека ова е решението и дека Владата мора да продолжи по овој пат што го трасиравме. Градежништвото во овие години дожувива рестарт токму поради градежната реформа што ја направивме со новиот принцип на градење, кој го применуваме на терен на изградба на коридорите и кој ги дава посакуваните резултати. Ова е шанса по 30 години самостојност, да покажеме дека инфраструктурата е на приоритетно ниво“, изјави министерот за транспорт и врски, Благој Бочварски.
Министерот потенцира дека во делот на станбената политики за ранливите категории граѓани до сега се изградени над 860 социјални стана, а во делот на градежната дејност се реализира најголемата реформа со креирање нови закони и акти, кои ја подобрија работата на целиот градежен сектор.
Директорот на ЈП за државни патишта потенцира дека изминатата година Јавното претпријатие реализирало над 400 милиони евра капитални инвестиции и најголем приход од наплата на патарини.
„Минатата година остваривме рекорден приход од патарини, и тоа во висина од 62 милиона евра, и 400 милиони евра капитални инвестиции. За неполни три години, завршивме 630 км патна мрежа, а во фаза на изгрaдба и рехабилитација се речиси 300 километри патишта. Го почнваме најголeмиот проект за изгрaдба на коридорите 8 и 10 д“, рече директорот на ЈП за државни патишта, Ејуп Рустеми.
Тој исткна дека оваа година ќе продолжат инвестициите во подобрување и модернизација на патната мрежа на целатата територија на државата, при што е предвидено изградба на уште 70 км државни патишта со проценета вредност од речиси 400 милиои евра.
Изградбата на пругата кон Бугарија е со засилено темпо, истакна директорот на „ЖРСМ – Инфраструктура“, Зоран Трифуновски.
„Првата и втората фаза од изгрaдбата на пругата кон Бугарија се одвиваат интензивно во согласност со динамичките планови на изведувачите. Првата делница до Бељаковце очекуваме да заврши до октомври оваа година, а втората до Крива Паланка во текот на 2026 година. Во однос на третета делница од Крива Паланка до граничниот прмеин Деве Баир, теденрската постапка е во тек. Очекуваме в година да избереме изведувач и да почнеме да градиме и тука морам да нагласам дека само во оваа фаза предвидени се 22 тунела и 52 моста“, истакна директорот Труфуновски.
Во однос на важните инвестиции во културата, министерката Костадиновска-Стојчевска го посочи покачувањето на платите на вработените во секторот од 43 проценти како една од главните придобивки во културата изминатите години. Таа истакна дека последните две години се вложени 900 милиони денари за санација, реконструкција и продолжување на градбата на постојните објекти од областа на културата.
„Капиталните дотации за ЕЛС се ставка што се актуализира минатата година и која досега не изнесувала повеќе од еден милион денари. Она што е значајно е фактот што минатата година за капитални дотации беа издвоени 40 милиони денари. Инвестиравме во општините Кратово, Валандово, Кривогаштани и во Делчево, општини во кои, како што кажаа и самите градоначалници, никогаш досега немало капитални дотации. Оваа 2024 година оваа ставка изнесува 50 милиони денари и целта е секоја наредна година таа сума да изнесува што е можно повеќе“, потенцира Костадиновска-Стојчевска.
Министерката за култура ги издвои и инвестициите од 120 милиони денари за реновирање на Универзалната сала, 32,8 милиона денари за целосна обнова на старото училиште во Љубојно, финализирање на реставрацијата на црквата „Св. Ѓорѓи“ во Курбиново, како и други проекти.
Професорката од Институтот за македонски јазик „Крсте Мисирков“, Весна Костовска, пред претстојната собраниска седница на која треба да се гласа новиот закон за употреба на македонскиот јазик истакна: „Со овој предлог се прошируваат областите во кои употребата на македонскиот јазик ќе биде задолжителна, ќе има задолжително вработување лектори, што ќе значи и задолжително лекторирање на текстовите. Се предвидува стипендирање на учениците на сите нивоа на образование, што ќе биде мотив за зголемување на интересот за студирање на македонскиот јазик“.
Директорот на Управата за заштита на културното наследство, Зоран Павлов, говореше за напредокот во заштитата на Охридскиот Регион и унапредувањето на правните механизми за ефикасно спроведување на препораките од УНЕСКО. Во однос на заштитата на културното наследство, Павлов истакна дека во новиот закон и Националната стратегија за заштита и користење на културното наследство посебен акцент се става на одржливиот раст на културното наследство во насока на негова трајна заштита.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Им побарал 10.000 евра за да им среди во постапки во Кривичен и Апелационен суд во Скопје

Јавен обвинител од Основното јавно обвинителство за гонење на организиран криминал и корупција донел Наредба за спроведување истражна постапка против едно лице осомничено за кривично дело – Примање награда за противзаконито влијание.
Како што соопшти денеска Јавното обвинителство, од април до август годинава осомничениот примил награда од 10.000 евра за да со искористување на своето претпоставено влијание интервенира да се изврши службено дејствие што не би смеело да се изврши, односно наводно да влијае врз одлуки во граѓански судски постапки пред Основниот граѓански суд Скопје и пред Апелациониот суд Скопје.
-Сведок-пријавител кој во граѓанската постапка е управител на правно лице, како што велат од Обвинителството, почнал да добива информации дека спротивната страна во судскиот спор врши сериозно влијание врз судиите кои одлучувале во првостепените и второстепените постапки давајќи поткупи за да се донесат одлуки во нивна полза. Сакајќи да ги провери таквите информации, од свој познаник-пензиониран судија добил контакт од осомничениот, кој му бил претставен како „лице кое ги познава состојбите во судовите и е близок со судии од Апелациониот суд Скопје“, се наведува во соопштението.
Сведокот и неговиот брат, како што велат од Обвинителството, се сретнале со осомничениот кој директно им побарал 16.000 евра за да се заврши спорот во корист на правното лице – семејната фирма на сведокот.
– Осомничениот ги уверувал дека другата страна давала многу повисоки износи, но судиите не сакале да се нафатат за да пресудат нешто што не било правно основано. Бидејќи сведокот му кажал дека не може да обезбеди толку пари наеднаш, се договориле за исплата на три рати. На 30 април, чувствувајќи дека нема друг избор, сведокот му дал на осомничениот 5.000 евра, по што осомничениот го уверувал да не се грижи за исходот и целиот период биле во комуникација во врска со постапката. Во тој период сведокот решил да ја пријави трговијата со влијание и при следната исплата на 5.000 евра, осомничениот е лишен од слобода веднаш по приемот на парите, се наведува во соопштението.
Јавниот обвинител до судијата на претходна постапка од Основниот кривичен суд Скопје денеска доставил предлог за определување мерка притвор за осомничениот, ценејќи дека се исполнети законските основи.
Македонија
Левица: Штрајкот во пералната на Клинички центар е аларм за распад на јавното здравство

Штрајкот на вработените во пералната на Клиничкиот центар „Мајка Тереза“ е аларм за целосен распад на јавното здравство, предупредуваат од партијата Левица. Според нив, болниците се во хаос, операциите доцнат, недостасува чиста облека, а пациентите се изложени на ризик од зарази, додека министерот за здравство Азир Алиу останува пасивен и без конкретни одговори.
„Клучното прашање е кој управува со пералната – приватната фирма ‘Скопстер’, позната по енормно високите цени и протуркана од поранешниот министер Арбен Таравари, или пак Службата за општи и заеднички работи? Додека институциите си ја префрлаат одговорноста, вработените остануваат без плати, без здравствено осигурување и со неизвесна иднина,“ велат од Левица.
Тие додаваат дека постои сомнеж за финансиско „перење раце“ меѓу институциите, кои си фактурираат високи суми за услуги, додека интересите на пациентите и вработените се оставаат на страна.
Од Левица потсетуваат и дека, во исто време кога здравството е во хаос, Владата предводена од Христијан Мицкоски најавува ново задолжување од една милијарда евра. „Резултатите во здравството се поразителни – нема нови инвестиции, нема капитални проекти и нема реформи,“ посочуваат од партијата.
Како решение, тие предлагаат инвестирање во современа перална и стерилизација по примерот на Клиниката за гинекологија и акушерство, што, според нив, би значело намалување на трошоците, помалку инфекции и побрз третман на пациентите.
„Очигледно е дека партиите на олигархијата свесно го рушат јавното здравство за да создадат простор за профит во приватниот сектор, каде цените се енормни. На крајот, најголемата штета ја плаќаат граѓаните, кои цел живот издвојувале средства за здравствениот фонд, а сега се приморани да плаќаат скапи услуги во приватни болници,“ велат од Левица.
Македонија
Помалку од еден час се чека на граничните премини Богородица и Табановце

Поради летните одмори, се бележи зголемена фреквенција на возила на граничните премини. На ГП „Табановце“ утрово времето на чекање за излез од државава е околу 30 минути, додека на ГП „Богородица“ се чека околу 40 минути, соопшти Авто мото сојузот на Македонија.
На останатите гранични премини од македонска страна, нема подолги задржувања за влез или излез од државата.
Од АМСМ информираат дека поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила.
Интензитетот на сообраќајот на патиштата надвор од градските средини е зголемен.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.